ກອງປະຊຸມສະຫຼຸບການຕິດຕາມ, ກວດກາການປະເມີນຜົນການຈັດຕັ້ງປະຕິບັດກົດໝາຍ ວ່າກໍາລັງປ້ອງກັນຄວາມສະຫງົບປະຊາຊົນ ເພື່ອປັບປຸງເນື້ອໃນກົດໝາຍໃຫ້ມີຄວາມລະອຽດ, ຖືກຕ້ອງ ແລະ ສອດຄອງກັບສະພາບຄວາມເປັນຈິງຂອງກຳລັງປ້ອງກັນຄວາມສະຫງົບປະຊາຊົນໃນປັດຈຸບັນ ໃນວັນທີ 11 ຕຸລາ 2023, ເປັນປະທານໂດຍ ພົທ ສຸວອນ ເລືອງບຸນມີ ກຳມະການສູນກາງພັກ ຮອງປະທານສະພາແຫ່ງຊາດ, ມີ ພົທ ກົງທອງ ພົງວິຈິດ ກຳມະການສູນກາງພັກ ຮອງລັດຖະມົນຕີກະຊວງ ປກສ, ມີບັນດາທ່ານກໍາມະທິການຂອງສະພາແຫ່ງຊາດ, ຮອງຫົວໜ້າຫ້ອງວ່າການສໍານັກງານປະທານປະເທດ, ສໍານັກງານນາຍົກລັດຖະມົນຕີ, ອົງການກວດກາແຫ່ງລັດ, ຮອງ ລມຕ ກະຊວງຍຸຕິທຳ, ສະຫະພັນນັກຮົບເກົ່າແຫ່ງ ຊາດລາວ, ຄະນະສະມາຊິກສະພາແຫ່ງຊາດ, ຄະນະກຳ ມະການ ປກຊ-ປກສ ຂອງສະພາແຫ່ງຊາດຂັ້ນແຂວງ 17 ແຂວງ ແລະ ພາກສ່ວນທີ່ກ່ຽວຂ້ອງອ້ອມຂ້າງກະຊວງເຂົ້າຮ່ວມ.
ພົຕ ຄຳກິ່ງ ຜຸຍຫຼ້າມະນີວົງ ຮອງລັດຖະມົນກະຊວງ ປກສ ຫົວໜ້າຄະນະປະເມີນກົດໝາຍຂອງກະຊວງ ປກສ ກ່າວວ່າ: ກົດໝາຍ ວ່າດ້ວຍກຳລັງປ້ອງກັນຄວາມສະຫງົບປະ ຊາຊົນ ໄດ້ຮັບຮອງໂດຍສະພາແຫ່ງຊາດ ສະບັບເລກທີ 03/ສພຊ, ລົງວັນທີ 2 ກໍລະກົດ 2007 ແລະ ໄດ້ປັບປຸງໃນປີ 2017 ເຊິ່ງມີພາກ, ໝວດ ແລະ ມາດຕາ ຂຶ້ນກັບຄື: ມີ 9 ພາກ, 6 ໝວດ ແລະ 55 ມາດຕາ, ໄດ້ກໍານົດທີ່ຕັ້ງ, ພະລະບົດບາດ, ສິດ ແລະ ໜ້າທີ່ຂອງກຳລັງປ້ອງກັນຄວາມສະ ຫງົບປະຊາຊົນ. ຜ່ານການຈັດຕັ້ງປະຕິບັດຕົວຈິງໃນສະ ພາບປັດຈຸບັນ ເຫັນວ່າມີຄວາມຈໍາເປັນຕ້ອງໄດ້ປັບປຸງບາງມາດຕາ, ບາງເນື້ອໃນ ເພື່ອຕອບສະໝອງໄດ້ຕາມຄວາມຮຽກຮ້ອງຕ້ອງການ ແລະ ສອດຄອງກັບສະພາບຄວາມເປັນຈິງ.
ພົທ ສຸວອນ ເລືອງບຸນມີ ກ່າວວ່າ: ກອງປະຊຸມຕິດຕາມ, ກວດກາ ການປະເມີນຜົນການຈັດຕັ້ງປະຕິບັດກົດໝາຍ ວ່າດ້ວຍກໍາລັງປ້ອງກັນຄວາມສະຫງົບປະຊາຊົນຄັ້ງນີ້ ແມ່ນການປະເມີນ ແລະ ຕີລາຄາໃນການຈັດຕັ້ງປະຕິບັດຕົວຈິງ ອາດຈະມີຫຼາຍມາດຕາທີ່ຍັງບໍ່ທັນສອດຄ່ອງກັບສະພາບຄວາມເປັນຈິງ ແລະ ບໍ່ທັນຕອບສະໝອງໄດ້ຕາມຄວາມຮຽກຮ້ອງຕ້ອງການຂອງວຽກງານປ້ອງກັນຄວາມສະຫງົບໃນໄລຍະໃໝ່ ກໍຄືການຈັດຕັ້ງຕົວຈິງຍັງບໍ່ທັນເຂັມງວດ, ເດັດຂາດ, ບໍ່ສັກສິດ ຈຶ່ງໄດ້ດຳເນີນປະເມີນຊອກໃຫ້ເຫັນຂໍ້ສະດວກ, ຜົນສັກສິດ, ຄວາມສອດຄອງຂອງກົດ ໝາຍ ລວມທັງຂໍ້ຄົງຂ້າງທີ່ມີຄວາມຫຍຸ້ງຍາກ ແລະ ບໍ່ສາ ມາດຈັດຕັ້ງປະຕິບັດໄດ້ ເພື່ອກ້າວໄປເຖິງການຄົ້ນຄວ້າປັງປຸງໃຫ້ດີຂຶ້ນກວ່າເກົ່າ ເຮັດໃຫ້ການຄຸມຄອງ, ຕິດຕາມ, ກວດກາການຈັດຕັ້ງ ແລະ ການເຄື່ອນໄຫວວຽກງານປ້ອງ ກັນຄວາມສະຫງົບ ດ້ວຍກົດໝາຍໃຫ້ມີຄວາມສັກສິດເຂັ້ມງວດຫຼາຍຂຶ້ນ, ຜົນຂອງການປະເມີນກົດໝາຍວ່າດ້ວຍກໍາລັງປ້ອງກັນຄວາມສະຫງົບປະຊາຊົນຄັ້ງນີ້ ຈະໄດ້ຜ່ານການຄຳເຫັນຂອງຄະນະປະຈໍາສະພາແຫ່ງຊາດ ກ່ອນນໍາເຂົ້າລາຍງານ ເພື່ອຈະໄດ້ພິຈາລະນາໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ 9 ໃນລະ ຫວ່າງທ້າຍເດືອນຕຸລາ ຫາ ເດືອນພະຈິກ ປີ 2023 ນີ້.
