ໃນຕອນບ່າຍ ວັນທີ 9 ຕຸລາ 2024, ພົນຕີ ປອ ສຸວັນນີ ສີສຸພາບມີໄຊ ຄະນະປະຈໍາພັກກະຊວງ ຫົວໜ້າກົມໃຫຍ່ການເມືອງປ້ອງກັນຄວາມສະຫງົບ, ພ້ອມດ້ວຍຄະນະໄດ້ນໍາພາຄະນະຜູ້ແທນຂັ້ນສູງ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ທີ່ນໍາພາຄະນະໂດຍ ພົນໂທ ເຈິ່ນ ກວັກ ຕໍ ກຳມະການສູນກາງພັກ ຮອງລັດຖະມົນຕີກະຊວງປ້ອງກັນຄວາມສະຫງົບ ສສ ຫວຽດນາມ ພ້ອມດ້ວຍຄະນະນຳ ກະຊວງປ້ອງກັນຄວາມສະຫງົບຫວຽດນາມ ແລະ ອົງການຜູ້ຕາງໜ້າກະຊວງປ້ອງກັນຄວາມສະຫງົບຫວຽດນາມປະຈຳລາວ, ໃນໂອກາດທີ່ໄດ້ເດີນທາງມາເຮັດວຽກຢ່າງເປັນທາງການຢູ່ ສປປ ລາວ ກໍຄື ຕິດຕາມນາຍົກລັດຖະມົນຕີ ແຫ່ງສາທາລະນະລັດສັງຄົມນິນົມຫວຽດນາມ ເພື່ອເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44 ແລະ 45 ໃນລະຫວ່າງວັນທີ 8-11 ຕຸລາ 2024ນີ້, ໃຫ້ການຕ້ອນຮັບຄະນະຜູ້ແທນຂັ້ນສູງ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດ ນາມ ໂດຍ ພັອ ຊາຍຄອງ ເພັດຊະວົງ ຫົວໜ້າອຳນວຍການວິທະຍາຄານການເມືອງປ້ອງກັນຄວາມສະຫງົບ ພ້ອມດ້ວຍຄະນະ.
ໃນໂອກາດທີ່ ທ່ານ ຮອງລັດຖະມົນຕີກະຊວງ ປ້ອງກັນຄວາມສະຫງົບ ແຫ່ງ ສສ ຫວຽດ ນາມ ໄດ້ມາຢ້ຽມຢາມເຮັດວຽກຮ່ວມໃນຄັ້ງນີ້, ໄດ້ຮັບຟັງການລາຍງານປະຫວັດຄວາມເປັນມາຂອງວິທະຍາຄານການເມືອງປ້ອງກັນຄວາມສະຫງົບ, ການກໍ່ສ້າງວິທະຍາຄານການເມືອງປ້ອງກັນຄວາມສະຫງົບ ແລະ ວຽກງານອື່ນໆ, ພ້ອມທັງແລກປ່ຽນຖອດຖອນບົດຮຽນກັບຄະນະຜູ້ແທນຝ່າຍກະຊວງປ້ອງກັນຄວາມສະຫງົບຫວຽດນາມຫຼາຍວຽກງານ ໂດຍອີງຕາມ ສັນຍາຮ່ວມມືຂອງ 2 ກະຊວງ ກໍຄືບົດບັນທຶກຊ່ວຍຈຳຂອງ 2 ວິທະຍາຄານການເມືອງປ້ອງ ກັນຄວາມສະຫງົບ ລາວ-ຫວຽດນາມ ທີ່ໄດ້ລົງນາມກັນ ວັນທີ 23 ພຶດສະພາ 2024 ທີ່ນະ ຄອນຮ່າໂນຍ ສສ ຫວຽດນາມ, ເຊິ່ງປະຈຸບັນທາງວິທະຍາຄານການເມືອງປ້ອງກັນຄວາມສະຫງົບ ສສ ຫວຽດນາມ ແມ່ນຈະນໍາເອົາຊ່ຽວຊານ ມາຊ່ວຍວິທະຍາຄານການເມືອງປ້ອງ ກັນຄວາມສະຫງົບລາວ ໃນຂົງເຂດການຮຽນ-ການສອນ, ວຽກງານຮັບປະກັນຄຸນນະພາບການສຶກສາ, ການສ້າງເວບໄຊ້, ການສ້າງວາລະສານ, ວຽກງານເສນາ ແລະ ວຽກງານຄົ້ນຄ້ວາວິທະຍາສາດ, ການກໍ່ສ້າງ-ບຳລຸງ ພະນັກງານຄູ-ອາຈານ ແລກປ່ຽນຊ່ຽວຊານ, ຕໍ່ກັບບັນຫາ ດັ່ງກ່າວຈີ່ງໄດ້ລາຍງານໃຫ້ການນໍາທັງ 2 ກະຊວງເພື່ອຮັບຊາບ ແລະ ມີທິດຊີ້ນໍາໃນການຈັດຕັ້ງປະຕິບັດ. ພ້ອມນີ້, ທັງສອງຝ່າຍກໍ່ໄດ້ເຫັນດີເປັນເອກະພາບຕໍ່ການສະເໜີແລກປ່ຽນຖອດຖອນບົດຮຽນກັນໃນຄັ້ງນີ້ ແລະ ຈະສືບຕໍ່ໃຫ້ການຊ່ວຍເຫຼືອຕາມການແລກບົດຮຽນໃນຄັ້ງໃຫ້ແຕກດອກອອກຜົນ.
ໃນໂອກາດທີ່ໄດ້ມາຢ້ຽມຢາມເຮັດຢູ່ວິທະຍາຄານການເມືອງປ້ອງກັນຄວາມສະຫງົບໃນຄັ້ງນີ້ ຄະນະຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບຫວຽດນາມໄດ້ວາງກະຕ່າດອກ ໄມ້ຕໍ່ໜ້າຮູບປັ້ນຫຼໍ່ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ເພື່ອສະແດງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນເຖິງຄຸນງາມຄວາມດີ, ນໍ້າ ໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈຳນົນ ຂອງບັນພະບູລຸດລາວຕື່ມອີກ.
