ວັນທີ 9 ຕຸລາລາ 2024 ນີ້, ພົນເອກ ວິໄລ ຫຼ້າຄຳຟອງ ກໍາມະການກົມການເມືອງສູນກາງພັກ ຮອງນາຍົກລັດຖະ ມົນຕີ ລັດ ຖະມົນຕີ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມຢາມພົບປະຂອງ ພົນໂທ ເຈິ່ນ ກວັກ ຕໍ ກຳມະການສູນກາງພັກ ຮອງລັດຖະມົນຕີ ກະຊວງປ້ອງກັນຄວາມສະຫງົບ ສສ ຫວຽດ ນາມ ພ້ອມຄະນະ ໃນໂອກາດທີ່ໄດ້ຕິດຕາມທ່ານນາຍົກລັດຖະມົນຕີ ແຫ່ງ ສສ ຫວຽດນາມ ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະ ຫວ່າງວັນທີ 8-11 ຕຸລາ 2024.
ໃນໂອກາດນີ້, ພົນໂທ ເຈິ່ນ ກວັກ ຕໍ ໄດ້ແຈ້ງຈຸດປະສົງໃນການມາເຄື່ອນໄຫວເຮັດວຽກຢູ່ ສປປ ລາວ ໃຫ້ ພົນເອກ ວິໄລ ຫຼ້າຄຳຟອງ ໄດ້ຮັບຊາບເປັນຕົ້ນແມ່ນໄດ້ຕິດຕາມທ່ານ ນາຍົກລັດຖະມົນຕີ ແຫ່ງ ສສ ຫວຽດນາມທີ່ໄດ້ເດີນທາງມາເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຂຸມທີ່ປີ່ນ ທີ່ ສປປ ລາວ ເປັນເຈົ້າພາບ ທີ່ຈັດຂຶ້ນໃນລະຫວ່າງ ວັນທີ 8-11 ຕຸລາ 2024; ພ້ອມນີ້ ກໍຈະລົງເຄື່ອນໄຫວຢ້ຽມຢາມເຮັດວຽກຢູ່ ວິທະຍາຄານການເມືອງ ກະຊວງປ້ອງກັນຄວາມສະຫງົບ, ໂຄງການກໍ່ສ້າງ ສູນປິ່ນປົວບຳບັດ ແລະ ຟື້ນຟູ ສຸຂະພາບຜູ້ຕິດຢາເສບຕິດ ຢູ່ຫຼັກ 62 ແຂວງວຽງຈັນ ສປປ ລາວ.
ໃນໂອກາດດັ່ງກ່າວ, ພົນເອກ ວິໄລ ຫຼ້າຄຳຟອງ ກໍໄດ້ສະ ແດງຄວາມຕ້ອນຮັບອັນອົບອຸ່ນ ແລະ ຕີລາຄາສູງຕໍ່ທ່ານຮອງລັດຖະ ມົນຕີກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມພ້ອມດ້ວຍຄະນະທີ່ໄດ້ມາເຄື່ອນໄຫວເຮັດວຽກຢູ່ ສປປ ລາວ ແລະ ໄດ້ເຂົ້າມາຢ້ຽມຢາມພົບປະໃນຄັ້ງນີ້; ພ້ອມນີ້, ຄະນະຜູ້ ແທນທັງສອງຝ່າຍກໍໄດ້ພົບປະປຶກສາຫາລືກັນຫຼາຍວຽກງານໃນຂົງເຂດການຊ່ວຍເຫຼືອທາງດ້ານການສ້າງບຸກຄະລາກອນພະນັກງານສືບທອດປ່ຽນແທນ, ດ້ານວຽກງານວິຊາສະເພາະ, ການພົບປະແລກປ່ຽນຂອງການນໍາຂັ້ນສູນສອງກະຊວງປ້ອງກັນຄວາມສະຫງົບລາວ -ຫວຽດນາມ ແລະ ວຽກງານສໍາຄັນອື່ນໆ; ທັງນີ້ກໍເພື່ອເປັນການສືບຕໍ່ເສີມຂະຫຍາຍສາຍພົວພັນມິດຕະພາບພິເສດຮອບດ້ານລະຫວ່າງສອງພັກ, ສອງລັດ, ປະຊາ ຊົນສອງຊາດ ລາວ-ຫວຽດນາມ, ເວົ້າສະເພາະ ແມ່ນສອງກະຊວງປ້ອງກັນຄວາມລາວ – ຫວຽດນາມໃຫ້ໝັ້ນຄົງທະນົງແກ່ນຕະຫຼອດໄປ.
