ກອງປະຊຸມພົບປະສອງຝ່າຍ ລະຫວ່າງ ຄະນະຜູ້ແທນຂັ້ນສູງ ທີ່ຮັບຜິດຊອບວຽກງານຕ້ານອາຊະຍາກຳຂ້າມຊາດ ແຫ່ງ ສປປ ລາວ ແລະ ຄະນະຜູ້ແທນຂັ້ນສູງ ທີ່ຮັບຜິດ ຊອບວຽກງານຕ້ານອາຊະຍາກຳຂ້າມຊາດ ສາທາລະນະ ລັດ ຟິລິບປິນ ໄດ້ຈັດໃນຕອນບ່າຍວັນທີ 28 ສິງຫາ 2024, ຢູ່ທີ່ໂຮງແຮມລາດຊະວົງ ວັນດາ ວິສຕ້າ, ນະຄອນຫຼວງວຽງຈັນ ໂດຍການເຂົ້າຮ່ວມຂອງ ພົນເອກ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງ ກັນຄວາມສະຫງົບລາວ ແລະ ທ່ານ ອັອສກາ ວາເລັນສືລາ ຫົວໜ້າກົມປ້ອງກັນຄວາມສະຫງົບ ແລະ ຄວາມເປັນລະ ບຽບຮຽບຮ້ອຍໃນສັງຄົມ ກະຊວງພາຍໃນ ແລະ ການປົກ ຄອງທ້ອງຖິ່ນ ສາທາລະນະລັດ ຟິລິບປິນ; ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.
ກອງປະຊຸມພົບປະສອງຝ່າຍ ລະຫວ່າງ ຄະນະຜູ້ແທນຂັ້ນສູງ ທີ່ຮັບຜິດຊອບວຽກງານຕ້ານອາຊະຍາກຳຂ້າມຊາດ ແຫ່ງ ສປປ ລາວ ແລະ ຄະນະຜູ້ແທນຂັ້ນສູງ ທີ່ຮັບຜິດ ຊອບວຽກງານຕ້ານອາຊະຍາກຳຂ້າມຊາດ ສາທາລະນະ ລັດ ຟິລິບປິນ ໃນຄັ້ງນີ້ ແມ່ນໜຶ່ງໃນບັນດາກອງປະຊຸມປິ່ນອ້ອມ ຫຼື ກອງປະຊຸມທີ່ກ່ຽວຂ້ອງກັບກອງປະຊຸມລັດຖະ ມົນຕີອາຊ່ຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ທີ່ ສປປ ລາວ ເປັນເຈົ້າພາບ ເຊິ່ງໃນວາລະກອງປະ ຊຸມ ຄະນະຜູ້ແທນທັງສອງຝ່າຍໄດ້ແຈ້ງສະພາບການ ແລະ ການເຄື່ອນໄຫວພົວພັນຮ່ວມມື ລະຫ່ວາງ ສອງຝ່າຍໃນໄລຍະຜ່ານມາ. ພ້ອມທັງປຶກສາຫາລື, ຕົກລົງເຫັນດີ ແລະ ມີຄວາມເປັນເອກະພາບກັນ ຕໍ່ກັບທິດທາງແຜນການຮ່ວມ ມືກ່ຽວກັບວຽກງານຕ້ານອາຊະຍາກຳຂ້າມຊາດ ປະກອບສ່ວນຮັບປະກັນຄວາມສະຫງົບປອດໄພ, ສ້າງເງື່ອນໄຂອໍານວຍຄວາມສະດວກໃຫ້ແກ່ການພັດທະນາເສດຖະ ກິດ-ສັງຄົມ ຍົກລະດັບຊີວິດການເປັນຢູ່ຂອງປະຊາຊົນ ທັງສອງປະເທດ ລາວ ແລະ ຟິລິບປິນ ໃນຕໍ່ໜ້າ.
ໃນວັນດຽວກັນນີ້, ຄະນະຜູ້ແທນຂັ້ນສູງ ທີ່ຮັບຜິດຊອບວຽກງານຕ້ານອາຊະຍາກຳຂ້າມຊາດ ແຫ່ງ ສປປ ລາວ ແລະ ຄະນະຜູ້ແທນຂັ້ນສູງ ທີ່ຮັບຜິດຊອບວຽກງານຕ້ານອາຊະຍາກຳຂ້າມຊາດ ຈາກປະເທດຍີ່ປຸ່ນ ໃນຖານະປະ ເທດຄູ່ຮ່ວມເຈລະຈາ ອາຊຽນ ໄດ້ເຂົ້າຮ່ວມກອງປະຊຸມພົບປະ ແລະ ປຶກສາຫາລື ການພົວພັນຮ່ວມມືວຽກງານຕ້ານອາຊະຍາກຳຂ້າມຊາດ ລະຫວ່າງສອງປະເທດ ເຊັ່ນດຽວກັນ ໂດຍການເຂົ້າຮ່ວມຂອງ ພົນຕີ ສຸລິນະ ແກ້ວປະເສີດ ຫົວໜ້າຫ້ອງວ່າການ ກະຊວງ ປກສ ລາວ ແລະ ທ່ານ ມິນາມິ ຮິໂຣຢູກິ ທູດການຮ່ວມມືສາກົນ ຮັບຜິດຊອບວຽກງານຕ້ານການກໍ່ການຮ້າຍ ແລະ ອາຊະຍາກຳຂ້າມຊາດ ຍີ່ປຸ່ນ ພ້ອມດ້ວຍ ຄະນະຜູ້ແທນທັງສອງຝ່າຍເຂົ້າຮ່ວມ.
