ກົມໃຫຍ່ຕຳຫຼວດ ກະຊວງ ປກສ ໄດ້ຈັດພິທີປະກາດການຍົກຍ້າຍ, ສັບຊ້ອນ,ເລື່ອນຊັ້ນ ນາຍ ແລະ ພົນຕຳຫຼວດ ກົມໃຫຍ່ຕຳຫຼວດ ໃນວັນທີ 16 ສິງຫາ 2024 ເປັນປະທານໂດຍ ພົຕ ຄຳກິ່ງ ຜຸຍຫຼ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕຳ ຫຼວດ ກະຊວງ ປກສ, ມີຄະນະພັກ-ຄະນະບັນຊາກົມ, ຫ້ອງ, ສູນ, ພະແນກ, ນາຍ ແລະ ພົນຕຳຫຼວດ ເຂົ້າຮ່ວມ.
ພັອ ບຸນຫຼວງ ວິໄລສຸກ ຫົວໜ້າຫ້ອງການເມືອງ ໄດ້ຜ່ານຂໍ້ຕົກລົງ ຂອງລັດຖະມົນຕີກະຊວງ ປກສ, ກົມໃຫຍ່ການເມືອງ ປກສ, ກົມໃຫຍ່ຕຳຫຼວດ, ວ່າດ້ວຍການເລື່ອນຊັ້ນໃຫ້ນາຍຕຳຫຼວດ ກົມໃຫຍ່ຕຳຫຼວດ ຈຳນວນ 189 ສະຫາຍ ຍິງ 49 ສະ ຫາຍ. ໃນນີ້, ເລື່ອນຊັ້ນ ພັນຕີ ຂຶ້ນເປັນຊັ້ນ ພັນໂທ 8 ສະຫາຍ, ຮ້ອຍເອກ ຂຶ້ນເປັນຊັ້ນ ພັນຕີ 19 ສະຫາຍ ຍິງ 1 ສະຫາຍ ຮ້ອຍໂທ ຂຶ້ນເປັນຊັ້ນ ຮ້ອຍເອກ 51 ສະຫາຍ ຍິງ 16 ສະຫາຍ ຮ້ອຍຕີ ຂຶ້ນເປັນຊັ້ນ ຮ້ອຍໂທ 16 ສະຫາຍ ຍິງ 4 ສະຫາຍ, ວາທີຮ້ອຍຕີ ຂຶ້ນເປັນຊັ້ນ ຮ້ອຍຕີ 8 ສະຫາຍ ຍິງ 5 ສະຫາຍ, ສິບເອກ ຂຶ້ນເປັນຊັ້ນ ວາທີຮ້ອຍຕີ 7 ສະຫາຍ ຍິງ 4 ສະຫາຍ, ສິບໂທ ຂຶ້ນເປັນຊັ້ນ ສິບເອກ 77 ສະຫາຍ ຍິງ 20 ສະຫາຍ ແລະ ສິບຕີ ຂຶ້ນເປັນຊັ້ນ ສິບໂທ 3 ສະຫາຍ.
ນອກຈາກນີ້, ໄດ້ຜ່ານຂໍ້ຕົກລົງ ຂອງລັດຖະມົນຕີກະຊວງ ປກສ ວ່າດ້ວຍການຍົກຍ້າຍນາຍຕຳຫຼວດ ທີ່ຂຶ້ນກັບກະຊວງປ້ອງ ກັນຄວາມສະຫງົບ, ໃນນີ້ ຍົກຍ້າຍ ພັທ ພຸດສະຫວາດ ສູນທະລາ ຈາກກະຊວງປ້ອງກັນຄວາມສະຫງົບ ໄປຮັບໜ້າທີ່ໃໝ່ຢູ່ ຫ້ອງການສຳນັກງານນາຍົກລັດຖະມົນຕີ ແລະ ຍົກຍ້າຍ ພັທ ເພັດສະໝອນ ສີລິວົງ ຈາກກົມໃຫຍ່ຕຳຫຼວດ ໄປປະຈຳການຢູ່ ກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ.
ພ້ອມນັ້ນ, ກໍໄດ້ຜ່ານຂໍ້ຕົກລົງ ຂອງກົມໃຫຍ່ຕຳຫຼວດ ວ່າດ້ວຍການສັບຊ້ອນ ນາຍຕຳຫຼວດ ໃຫ້ບັນດາກົມ,ຂຶ້ນກັບກົມໃຫຍ່ຕຳຫຼວດຄື: ກົມຕຳຫຼວດສືບສວນ-ສອບສວນ, ກົມຕຳຫຼວດສະກັດກັ້ນ ແລະ ຕ້ານຢາເສບຕິດ, ກົມຕໍາຫຼວດຈະລາຈອນ, ກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ, ກົມຕຳຫຼວດລົດໄຟ.
ພາບ-ຂ່າວ: ຄຳໂຖ
