ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ IX ຂອງສະພາແຫ່ງ ຊາດ ວັນທີ 3 ພະຈິກ 2023, ເປັນປະທານໂດຍ ທ່ານ ປອ ໄຊສົມພອນ ພົມວິຫານ ປະທານສະພາແຫ່ງຊາດ,ໃນກອງປະຊຸມສະມາຊິກສະພາແຫ່ງຊາດ ໄດ້ຮັບຟັງການ ລາຍງານກ່ຽວກັບຜົນສຳເລັດການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ ໄຂບັນຫາຢາເສບຕິດໃນໄລຍະ 3 ປີ ຜ່ານມາ (2021-2023 ); ເຊິ່ງລາຍງານໂດຍ ພົອ ວິໄລ ຫຼ້າຄຳຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີ ກະຊວງປ້ອງກັນຄວາມສະຫງົບ ເຊິ່ງໄດ້ ຊີໃຫ້ເຫັນຢ່າງຈະແຈ້ງວ່າ ໄລຍະ 3 ປີ ຜ່ານມາ, ເຈົ້າໜ້າທີ່ສາມາດແກ້ໄຂຄະດີຢາເສບຕິດໄດ້ 10 ພັນກວ່າເລື່ອງ.
ທ່ານລັດຖະມົນຕີກະຊວງປ້ອງກັນຄວາມສະຫງົບ ໃຫ້ຮູ້ວ່າ: ການຈັດຕັ້ງປະຕິບັດວາ ລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນໄລຍະ 3 ປີຜ່ານມາ; ເຊິ່ງມີທັງຜົນສໍາເລັດ, ບັນຫາທີ່ຄວນເອົາໃຈໃສ່, ທ່າອ່ຽງຂອງບັນຫາຢາເສບຕິດຢູ່ປະເທດເຮົາ ແລະ ທິດທາງແຜນການຈະແກ້ໄຂໃນຕໍ່ໜ້າຕິດພັນກັບການປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ປອດໄພຂອງສັງຄົມ ເຊັ່ນ: ການສ້າງຄວາມຮັບຮູ້ໃນທົ່ວສັງຄົມດ້ວຍການສຶກສາອົບຮົມ, ໂຄສະນາເຜີຍແຜ່ລະບຽບກົດໝາຍ ແລະ ຜົນຮ້າຍຂອງຢາເສບຕິດ; ການສ້າງ, ປັບປຸງກົດໝາຍ ແລະ ນິຕິກໍາໃຕ້ກົດໝາຍທີ່ກ່ຽວຂ້ອງກັບບັນຫາຢາເສບຕິດ; ການປັບປຸງກົງຈັກການຈັດຕັ້ງ ແລະ ຍົກລະດັບຄວາມສາມາດໃນການເຄື່ອນໄຫວເຮັດໜ້າທີ່ການເມືອງຂອງອົງ ການສືບສວນ-ສອບສວນ, ອົງການໄອຍະການປະຊາຊົນ, ສານປະຊາຊົນ, ອົງການປະຕິບັດຄຳຕັດສິນຂອງສານ ແລະ ພາກສ່ວນທີ່ກ່ຽວຂ້ອງຕໍ່ການແກ້ໄຂບັນຫາຢາເສບຕິດ.
ວຽກງານຍົກສູງປະສິດທິພາບດ້ານການຄຸ້ມຄອງ, ຊີ້ນໍາໃນການຈັດຕັ້ງປະຕິບັດຮອບດ້ານໃນວຽກງານແກ້ໄຂບັນຫາຢາເສບຕິດໄປຕາມຄຳຂວັນທີ່ວ່າ: ອັດ 3 ທາງ, ມ້າງ 3 ເປົ້າ, ເປັນເຈົ້າ 3 ຫຼັກ; ໂດຍສະເພາະຫຼັກການຄວາມເປັນມືອາຊີບ ເຫັນວ່າມີຜົນສໍາເລັດເປັນຢ່າງດີ; ເຊິ່ງສະແດງໃຫ້ເຫັນຕົວເລກຄະດີທີ່ແກ້ໄຂໄດ້ທັງໝົດ 10.843 ເລື່ອງ, ຈັບຜູ້ຖືກຫາ 15.966 ຄົນ ຍິງ 1.804 ຄົນ, ຄົນຕ່າງປະ ເທດ 324 ຄົນ ຍິງ 21 ຄົນ; ຢຶດຢາບ້າຊະນິດເມັດ ແລະ ເປັນຝຸ່ນ ນໍ້າໜັກລວມ 32.111,78 ກິໂລ, ຢຶດສານເຄມີຕົ້ນປະເພດຕ່າງໆ 260 ກວ່າໂຕນ;
ນອກນັ້ນ, ຍັງໄດ້ຢຶດ, ອາຍັດ ແລະ ຮິບຊັບສິນປະເພດພາຫະນະ, ເນື້ອທີ່ດິນ, ເຮືອນ ພັກ ໄດ້ຈໍານວນຫຼາຍພໍສົມຄວນ; ນໍາເອົາຜູ້ຖືກເຄາະຮ້າຍເສບຢາເສບຕິດເຂົ້າບໍາບັດປິ່ນປົວທັງໝົດ 10.900 ຄົນ ຍິງ 361 ຄົນ; ໃນນັ້ນ, ມີຜູ້ທີ່ປິ່ນປົວດີແລ້ວກັບຄືນບ້ານທັງໝົດ 5.734 ຄົນ ຍິງ 209 ຄົນ, ສືບຕໍ່ປິ່ນ ປົວ 2.994 ຄົນ ຍິງ 104 ຄົນ.
ພິເສດໃນລະຫວ່າງວັນທີ 10-11 ສິງຫາ 2023, ສປປລາວ ໄດ້ເປັນເຈົ້າພາບຈັດກອງປະຊຸມລັດຖະມົນຕີອາຊຽນ ວ່າດ້ວຍບັນຫາຢາເສບຕິດ ຄັ້ງທີ 8 ແລະ ໃນລະຫວ່າງວັນທີ 17-19 ຕຸລາ 2023 ທີ່ຜ່ານມາ, ພວກເຮົາໄດ້ເປັນເຈົ້າພາບຈັດກອງປະຊຸມຫົວໜ້າຕໍາຫຼວດອາຊຽນ ຄັ້ງທີ 41; ເຊິ່ງທັງ 2 ກອງປະຊຸມດັ່ງກ່າວ ກໍໄດ້ລົງເລິກໃນການຄົ້ນຄວ້າຍົກລະດັບການຮ່ວມມືກັນໃນການສະກັດກັ້ນແກ້ໄຂບັນຫາອາຊະຍາກໍາຢາເສບຕິດ.All reactions:
