ເພື່ອເປັນການຍ້ອງຍໍສັນລະເສີນຕໍ່ກັບຜົນງານ, ຄຸນງາມຄວາມດີໃຫ້ແກ່ນາຍ ແລະ ພົນຕຳຫຼວດ ກະຊວງປ້ອງກັນຄວາມສະຫງົບ ໃນການປະຕິບັດໜ້າທີ່ວຽກງານກໍ່ສ້າງຮາກຖານການເມືອງ ພັດທະນາ ຊົນນະບົດຮອບດ້ານແກ້ໄຂຄວາມທຸກຍາກ ແລະ ວຽກງານສາມສ້າງ ໄລຍະ 5 ປີ (2016–2021) ແລະ ໄດ້ເຮັດສໍາເລັດຕາມແຜນການ ຕິດພັນກັບການປະສ່ວນອັນສຳຄັນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອປົກປັກຮັກສາ ແລະ ພັດທະນາປະເທດຊາດ.
ວັນທີ 4 ກັນຍາ 2023 ຜ່ານມານີ້, ກົມໃຫ່ຍຕໍາຫຼວດ ກະຊວງປ້ອງກັນຄວາມສະຫງົບ ໄດ້ຈັດພິທີຍ້ອງຍໍຜົນງານ ແລະ ປະກາດເລື່ອນຊັ້ນໃຫ້ນາຍ ແລະ ພົນຕໍາຫຼວດ ໂດຍການໃຫ້ກຽດເຂົ້າຮ່ວມເປັນປະທານຂອງ ພົຕ ຄໍາກິ່ງ ຜູຍຫຼ້າມະນີວົງ ຄະນະປະຈໍາພັກກະຊວງ ຮອງລັດຖະມົນຕີ, ຫົວໜ້າກົມໃຫຍ່ຕໍາຫຼວດ, ມີຄະນະພັກ-ຄະນະບັນຊາ, ນາຍ ແລະ ພົນຕໍາຫຼວດ ທີ່ໄດ້ຮັບການຍ້ອງຍໍ ແລະ ເລື່ອນຊັ້ນເຂົ້າຮ່ວມ.
ການຍ້ອງຍໍ ຄັ້ງນີ້, ປະກອບມີການຍ້ອງຍໍ ນາຍ ແລະ ພົນຕໍາຫຼວດ ພາຍໃນກົມໃຫຍ່ຕໍາຫຼວດ ທີ່ມີຜົນງານໃນການປະຕິບັດໜ້າທີ່ວຽກງານກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານແກ້ໄຂຄວາມທຸກຍາກ ແລະ ວຽກງານສາມສ້າງ ໄລຍະ 5 ປີ ໄດ້ຮັບຫຼຽນໄຊພິລະອາດຫານຊັ້ນ ll 30 ສະຫາຍ; ຫຼຽນໄຊພິລະອາດຫານຊັ້ນ lll 90 ສະຫາຍ ແລະ ການຍ້ອງຍໍຜົນງານ ນາຍ ແລະ ພົນຕໍາຫຼວດທີ່ໄດ້ປະກອບສ່ວນປ້ອງກັນງານມະຫາກໍາກິລາແຫ່ງຊາດ ຄັ້ງທີ 9 ທີ່ແຂວງຊຽງຂວາງ; ໃນນີ້, ມີຫຼຽນໄຊພິລະອາດຫານຊັ້ນ lll ມີ 10 ສະຫາຍ ແລະ 1 ກົມກອງ; ໃບຍ້ອງຍໍຂັ້ນກະຊວງປ້ອງກັນຄວາມສະຫງົບ 115 ສະຫາຍ ແລະ ຂັ້ນກົມໃຫ່ຍການເມືອງປ້ອງກັນຄວາມສະຫງົບ 12 ສະຫາຍ ເປັນກຽດປະດັບຫຼຽນໂດຍ ພົຕ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ, ຫົວໜ້າກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ.
ພ້ອມດຽວກັນນີ້ ໄດ້ປະກາດເລື່ອນຊັ້ນໃຫ້ນາຍ ແລະ ພົນຕໍາຫຼວດ 7 ສະຫາຍ; ໃນນີ້, ເລື່ອນຊັ້ນ ຮຕ ຂຶ້ນ ຮທ 1 ສະຫາຍ; ຊັ້ນວາທີຂຶ້ນ ຮຕ 1 ສະຫາຍ ແລະ ເລື່ອນຊັ້ນສິບໂທ ຂຶ້ນສິບເອກ 5 ສະຫາຍ ເປັນກຽດປະດັບຊັ້ນໂດຍ ພົຈວ ວັນທອນ ສຸລິສັກ ຮອງຫົວໜ້າກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ.
