ກອງປະຊຸມປຶກສາຫາລື ຂອງຫົວໜ້າຄະນະຜູ້ແທນຕໍາຫຼວດອາຊຽນ ແລະ ຄູ່ເຈລະຈາ ໄດ້ຈັດຂຶ້ນ ພາຍໃຕ້ກອງປະຊຸມຫົວໜ້າຕໍາຫຼວດອາຊຽນ ຄັ້ງທີ 41, ໂດຍການເປັນປະທານຂອງ ທ່ານ ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ, ຫົວໜ້າກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ຫົວໜ້າກໍາລັງຕໍາຫຼວດລາວ, ມີຫົວໜ້າຕໍາຫຼວດປະເທດສະມາຊິກອາຊຽນ, ປະເທດຄູ່ເຈລະຈາ ແລະ ຜູ້ສັງເກດການ ເຂົ້າຮ່ວມ.
ກອງປະຊຸມຄັ້ງນີ້, ຜູ້ແທນທີ່ເຂົ້າຮ່ວມກອງປະຊຸມ ໄດ້ຮັບຟັງຄໍາຄິດເຫັນກ່ຽວກັບ ການຮ່ວມມືວຽກງານຕໍາຫຼວດ ຂອງປະເທດຄູ່ຮ່ວມເຈລະຈາ ແລະ ປະເທດສັງເກດການ ກັບບັນດາປະເທດອາຊຽນ ໃນຮູບແບບສອງຝ່າຍ ແລະ ຫຼາຍຝ່າຍ ໃນການສະກັດກັ້ນ ແລະ ຕ້ານອາຊະກໍາຂ້າມຊາດ ເພື່ອພ້ອມກັນປຶກສາຫາລືຢ່າງສ້າງສັນ, ກົງໄປ-ກົງມາ ປະກອບສ່ວນເຮັດໃຫ້ ກອງປະຊຸມດໍາເນີນໄປດ້ວຍຜົນສໍາເລັດຢ່າງຈົບງາມ.
ຜົນສໍາເລັດຂອງກອງປະຊຸມຄັ້ງນີ້ ຈະກາຍເປັນແຜນງານຮ່ວມມືດ້ານວຽກງານຕໍາຫຼວດ ໃນການສະກັດກັ້ນ ແລະ ຕ້ານອາຊະຍາກໍາຂ້າມຊາດ ຕະຫຼອດຮອດການສ້າງຄວາມເຂັ້ມແຂງທາງດ້ານກໍາລັງຕໍາຫຼວດ ລະຫວ່າງຕໍາຫຼວດອາຊຽນ, ປະເທດຄູ່ເຈລະຈາ ແລະ ປະເທດສັງເກດການ.
ພ້ອມດຽວກັນນັ້ນ, ບັນດາຄະນະຜູ້ແທນ ກໍໄດ້ຮັບຮອງເອົາວາລະກອງປະຊຸມຄັ້ງນີ້ ເພື່ອນໍາໄປສືບຕໍ່ຈັດຕັ້ງປະຕິບັດຮ່ວມມືສະກັດກັ້ນການຕ້ານອາຊະຍາກຳຂ້າມຊາດ, ໂດຍມອບໃຫ້ ກອງເລຂາຕຳຫຼວດອາຊຽນ ສືບຕໍ່ຕິດຕາມປະຕິບັດ.
