ໃນວັນທີ 29 ກັນຍາ 2023 ນີ້, ຢູ່ທີ່ບ້ານໂນນສະອາດ ເມືອງໄຊທານີ ນະຄອນ ຫຼວງວຽງຈັນ, ໄດ້ມີພິທີມອບ-ຮັບວິທະຍາຄານການເມືອງ ປກສ ແຫ່ງ ສປປ ລາວ ຢ່າງເປັນທາງການ, ຝ່າຍລາວນຳໂດຍ ສະຫາຍ ພົນເອກ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີ ກະຊວງປ້ອງກັນຄວາມສະຫງົບ ສປປ ລາວ, ຝ່າຍຫວຽດນາມນຳໂດຍ ສະຫາຍ ພົນເອກ ສຈ ປອ ໂຕ ເລິມ ກຳມະການກົມການເມືອງສູນກາງພັກກອມມູນິດ ຫວຽດນາມ ລັດຖະມົນຕີກະຊວງປ້ອງ ກັນຄວາມສະຫງົບ ສສ ຫວຽດນາມ, ມີ ທ່ານ ຫວງຽນ ບາ ຮຸ່ງ ເອກອັກຄະລັດຖະທູດ ຜູ້ມີອໍານາດເຕັມ ແຫ່ງ ສສ ຫວຽດນາມ ປະຈຳ ສປປ ລາວ, ມີການນຳພັກລັດ, ລັດຖະມົນຕີ, ຮອງລັດຖະມົນຕີ ບັນດາກະຊວງ, ກົມກອງທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມ.
ໂຄງການກໍ່ສ້າງວິທະຍາຄານການເມືອງປ້ອງກັນຄວາມສະຫງົບ ໄດ້ຖືກສ້າງຂຶ້ນໃນທ່າມກາງທີ່ບັນຍາກາດທີ່ທົ່ວພັກ, ທົ່ວລັດ, ທົ່ວປວງຊົນລາວ ແລະ ຫວຽດນາມ ສະເຫຼີມ ສະຫຼອງສອງວັນປະຫວັດ ສາດລາວ-ຫວຽດນາມ, ຫວຽດນາມ-ລາວ ຄື: ວັນສ້າງຕັ້ງສາຍພົວພັນການທູດຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 45 ປີ. ໂຄງການດັ່ງກ່າວນີ້ໄດ້ວາງສີລາລຶກ ໃນວັນທີ 25 ສິງຫາ 2022 ແລະ ໄດ້ລົງມືກໍ່ສ້າງແຕ່ຕົ້ນເດືອນມັງກອນ 2023; ຮອດວັນທີ 30 ມິຖຸນາ 2023 ເຊິ່ງໃຊ້ເວລາ ພຽງແຕ່ 7 ເດືອນ ເເມ່ນສຳເລັດຕາມແຜນການ ແລະ ເຕັກນິກຂອງການກໍ່ສ້າງ, ລວມມູນຄ່າທັງໝົດ 250 ຕື້ດົງ.
ໂດຍໂຄງການນີ້, ໄດ້ເປັນຂີດໝາຍໃໝ່ ທັງມີຄວາມໝາຍສໍາຄັນຄັ້ງປະຫວັດສາດ ແລະ ເປັນຂອງຂວັນອັນລຳຄ່າ ແມ່ນຊັບສົມບັດອັນປະເສີດທີ່ ພັກ-ລັດ, ກະຊວງປ້ອງກັນຄວາມສະຫງົບ ແລະ ປະຊາຊົນຫວຽດນາມ ມອບໃຫ້ກະຊວງປ້ອງກັນຄວາມສະຫງົບລາວ ເພື່ອນໍາໃຊ້ເຂົ້າໃນການບໍາລຸງກໍ່ສ້າງພະນັກ ງານນໍາພາ-ບັນຊາ ໃນກໍາລັງປ້ອງກັນຄວາມສະຫງົບລາວ ໃຫ້ພຽບພ້ອມໄປດ້ວຍຄຸນສົມບັດ, ສິນທຳປະຕິວັດ, ຄວາມຮູ້ຄວາມສາມາດ ເພື່ອຮັບໃຊ້ປະເທດຊາດ ແລະ ປະຊາຊົນ ດ້ວຍຄວາມບໍລິສຸດໃຈ.
ໃນໂອກາດທີ່ມີຄວາມໝາຍສຳຄັນນີ້, ສະຫາຍ ພົນເອກ ສຈ ປອ ໂຕ ເລິມ ກຳມະການກົມການເມືອງສູນກາງພັກກອມມູນິດ ຫວຽດນາມ ລັດຖະມົນຕີກະຊວງປ້ອງກັນຄວາມສະຫງົບ ສສ ຫວຽດນາມ ໄດ້ຂຶ້ນກ່າວມອບໂຄງການວິທະຍາຄານການເມືອງປ້ອງກັນຄວາມສະຫງົບຢ່າງເປັນທາງການ. ຈາກນັ້ນ, ສະຫາຍ ພົນເອກ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີ ກະຊວງປ້ອງກັນຄວາມສະຫງົບ ສປປ ລາວ ໄດ້ຂຶ້ນກ່າວຮັບ ພ້ອມທັງສະເເດງຄວາມຂອບ ໃຈຢ່າງສູງມາຍັງພັກ-ລັດ, ກະຊວງປ້ອງກັນຄວາມສະຫງົບຫວຽດນາມ ທີ່ເວລາໃດກໍ່ໃຫ້ການອູ້ມຊູຊ່ວຍເຫຼືອກະຊວງປ້ອງກັນຄວາມສະຫງົບດ້ວຍຄວາມບໍລິສຸດໃຈ ເຊິ່ງວິທະຍາຄານການເມືອງປ້ອງກັນຄວາມສະຫງົບ ແມ່ນເປັນສັນຍາລັກແຫ່ງສາຍພົວພັນພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດ, ສອງກະຊວງປ້ອງກັນຄວາມສະຫງົບລາວ-ຫວຽດນາມ ທີ່ນັບມື້ເພີ່ມພູນຄູນສ້າງ ແລະ ບໍ່ມີວັນຈືດຈາງ.
ຈາກນັ້ນ, ສະຫາຍ ພົນເອກ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີ ກະຊວງປ້ອງກັນຄວາມສະຫງົບ ສປປ ລາວ, ຝ່າຍ ຫວຽດນາມນຳໂດຍ ສະຫາຍ ພົນເອກ ສຈ ປອ ໂຕ ເລິມ ກຳມະການກົມການເມືອງສູນກາງພັກກອມມູນິດ ຫວຽດນາມ ລັດຖະມົນຕີກະຊວງປ້ອງກັນຄວາມສະຫງົບ ສສ ຫວຽດນາມ, ພ້ອມດ້ວຍຄະນະນຳສອງກະຊວງກໍໄດ້ພ້ອມກັນຕັດແຖບຜ້າເປີດການນຳໃຊ້ວິທະຍາ ຄານການເມືອງ ປກສ ຢ່າງເປັນທາງການ, ພ້ອມທັງປູກຕົ້ນໄມ້ ແລະ ປ່ອຍປາລົງໜອງຂອງວິທະຍາຄານ.
