ຕອນເຊົ້າວັນທີ 28 ກັນຍາ 2023 ພົນຕີ ວັນທອງ ກອງມະນີ ຮອງລັດຖະມົນຕີ, ຫົວໜ້າກົມໃຫຍ່ການເມືອງ ປກສ ພ້ອມດ້ວຍຄະນະ ລົງກວດກາສະຖານທີ່ຈັດກອງປະຊຸມພົບປະສອງຝ່າຍ ລະຫວ່າງ ກະຊວງປ້ອງກັນຄວາມສະຫງົບ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງປ້ອງກັນຄວາມສະຫງົບ ສາທາລະນະລັດສັງຄົມນິຍົມຫວຽດນາມ ປະຈໍາປີ 2023 ທີ່ຈະຈັດຂຶ້ນຢູ່ສະໂມສອນກະຊວງປ້ອງກັນຄວາມສະຫງົບ.
ການລົງກວດກາໃນຄັ້ງນີ້ ເພື່ອເປັນການກະກຽມຄວາມພ້ອມຂອງສະຖານທີ່ໃຫ້ມີຄວາມຮັບປະກັນຢ່າງຮອບດ້ານ ເປັນຕົ້ນແມ່ນສະຖານທີ່ຮັບຕ້ອນ ການນໍາຂັ້ນສູງຂອງກະຊວງປ້ອງກັນຄວາມສະຫງົບ ສາທາລະນະລັດສັງຄົມນິຍົມ ຫວຽດນາມ, ຫ້ອງປະຊຸມ, ຫ້ອງຕ້ອນຮັບ ແລະ ສະຖານທີ່ອ້ອມຂ້າງສະໂມສອນ, ຜ່ານການກວດກາຕົວຈິງແມ່ນມີຄວາມພ້ອມຮ້ອຍສ່ວນຮ້ອຍ ໃນການຮອງຮັບໃຫ້ແກ່ການຈັດກອງພົບປະສອງຝ່າຍ ລະຫວ່າງ ກະຊວງປ້ອງກັນຄວາມສະຫງົບ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງປ້ອງກັນຄວາມສະຫງົບ ສາທາລະນະລັດສັງຄົມນິຍົມຫວຽດນາມ ປະຈໍາປີ 2023.
ນອກຈາກນັ້ນ, ໄດ້ລົງຕິດຕາມ, ກວດກາ ສະຖານທີ່ກະກຽມຄວາມພ້ອມໃຫ້ແກ່ການຈັດພິທີມອບ-ຮັບ ວິທະຍາຄານການເມືອງປ້ອງກັນຄວາມສະຫງົບ ລະຫວ່າງ ກະຊວງປ້ອງກັນຄວາມສະຫງົບ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງປ້ອງກັນຄວາມສະຫງົບ ສາທາລະນະລັດສັງຄົມນິຍົມຫວຽດນາມ ໃຫ້ມີຄວາມຮັບປະກັນຢ່າງຮອບດ້ານ.
