ພົຈວ ສົມຄິດ ດວງພະຈັນ ຫົວໜ້າກອງບັນຊາການ ປກສ ແຂວງວຽງຈັນ ໄດ້ໃຫ້ສໍາພາດຕໍ່ສື່ມວນຊົນ ປກສ ໃນວັນທີ 13 ມັງກອນ 2025, ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໄລຍະປີ 2021-2023 ແລະ ໄລຍະປີ 2024-2025 ໃຫ້ຮູ້ວ່າ: ໂດຍຈັດຕັ້ງປະຕິບັດຄໍາສັ່ງຂອງກົມການເມືອງສູນກາງພັກ, ມະ ຕິຂອງສະພາແຫ່ງຊາດ, ຄໍາສັ່ງຂອງນາຍົກລັດຖະມົນຕີ ແລະ ຄໍາສັ່ງຂອງເຈົ້າແຂວງວຽງຈັນ ວ່າດ້ວຍການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ກອງບັນຊາການປ້ອງກັນຄວາມສະຫງົບແຂວງວຽງຈັນ ໄດ້ສຸມໃສ່ຈັດຕັ້ງປະຕິບັດ 6 ໜ້າວຽກຈຸດສຸມເປັນຕົ້ນແມ່ນ ສ້າງຄວາມຮັບຮູ້ໃນທົ່ວສັງຄົມດ້ວຍການສຶກສາອົບຮົມ, ໂຄສະນາເຜີຍແຜ່ລະບຽບກົດໝາຍ ແລະ ຜົນຮ້າຍຂອງຢາເສບຕິດ; ປັບປຸງນິຕິກຳລຸ່ມກົດໝາຍກ່ຽວຂ້ອງກັບການແກ້ໄຂບັນຫາຢາເສບຕິດ; ປັບປຸງກົງຈັກການຈັດ ຕັ້ງ ແລະ ຍົກລະດັບຂີດຄວາມສາມາດໃນການເຄື່ອນໄຫວໜ້າທີ່ ການເມືອງຂອງອົງການສືບສວນ-ສອບສວນ ແລະ ພາກສ່ວນທີ່ກ່ຽວຂ້ອງກັບການແກ້ ໄຂບັນຫາຢາເສບຕິດ; ຍົກສູງປະສິດມີພາບການຄຸ້ມຄອງ, ຊີ້ນໍາ-ບັນຊາການຈັດ ຕັ້ງປະຕິບັດວຽກງານຮອບດ້ານ; ປັບປຸງຂີດຄວາມສາມາດໃນການເຄື່ອນໄຫວເຮັດໜ້າທີ່ການເມືອງແຕ່ລະຂັ້ນ ເພື່ອນໍາພາ- ຊີ້ນໍາການແກ້ໄຂບັນຫາ ຢາເສບຕິດທີ່ເກີດຂຶ້ນຢູ່ໃນຂອບເຂດຄວາມຮັບຜິດຊອບຂອງຕົນ, ເພີ່ມທະວີວຽກ ງານຮ່ວມມືສາກົນ.
ການແກ້ໄຂບັນຫາຢາເສບຕິດ, ປກສ ແຂວງວຽງຈັນ ແມ່ນໄດ້ເຄື່ອນໄຫວໄປຕາມ 3 ຫຼັກການຄື: ເດັດຂາດ, ໂປ່ງໃສ, ເປັນມືອາຊີບຕາມຫຼັກການວິຊາສະເພາະ; ໃນນີ້ໄລຍະ 2021-2023 ໄດ້ສຳເລັດການຕິດປ້າຍໂຄສະນາ ມີ 12 ຈຸດ 24 ປ້າຍ, ພ້ອມລົງໂຄສະນາຜົນຮ້າຍຢາເສບຕິດ ຢູ່ບັນດາພະແນກການ, ຫ້ອງການ, ອົງການ, ສະຖາບັນການສຶກສາ, ໂຮງຮຽນ ແລະ ບ້ານ ມີຜູ້ເຂົ້າຮ່ວມ 36.474 ຄົນ, ກຳນົດເປົ້າໝາຍພົວພັນກັບຢາເສບຕິດ ແລະ ເກັບກຳຂໍ້ມູນເປົ້າ ໝາຍທີ່ພົວພັນກັບຢາເສບຕິດ ດ້ວຍການຮຽກເຊີນເຂົ້າມາສໍາພາດເອົາຂໍ້ມູນ, ຂຶ້ນສະຖິຕິບັນຊີເປົ້າໝາຍຄ້າ-ຂາຍຢາເສບຕິດ 1.934 ຄົນ. ໃນນີ້, ເປົ້າໝາຍຄ້າ-ຂາຍລາຍໃຫຍ່ 75 ຄົນ ຍິງ 6 ຄົນ, ສາມາດແກ້ໄຂໄດ້ 8 ຄົນ ຍິງ 2 ຄົນ, ເປົ້າໝາຍລາຍກາງ 292 ຄົນ ຍິງ 47 ຄົນ, ສາມາດແກ້ໄຂໄດ້ 41 ຄົນ ຍິງ 2 ຄົນ ແລະ ເປົ້າໝາຍລາຍນ້ອຍ 1.115 ຄົນ ຍິງ 135 ຄົນ, ແກ້ໄຂໄດ້ 190 ຄົນ ຍິງ 21 ຄົນ, ຂຶ້ນບັນຊີເປົ້າໝາຍເສບຢາເສບຕິດໄດ້ 14.071 ຄົນ ຍິງ 461 ຄົນ, ໄດ້ສ້າງບົດບັນທຶກສຶກສາ ອົບຮົມ 13.500 ຄົນ ຍິງ 396 ຄົນ, ພາຍຫຼັງສຶກສາອົບຮົມແລ້ວຜູ້ປົກຄອງໄດ້ມອບ ໃຫ້ເຈົ້າໜ້າທີ່ ພວກເຮົານໍາມາດັດສ້າງ 1.698 ຄົນ ຍິງ 28 ຄົນ, ໃນນັ້ນນໍາໄປຝາກເຂົ້າສູນ 236 ຄົນ ແລະ ໄດ້ກວດນໍ້າປັດສະວະຄືນເພື່ອຊອກຫາສານເສບຕິດບັນດາເປົ້າໝາຍທີ່ໄດ້ສຶກສາອົບຮົມ ແລ້ວມີ 3.247 ຄົນ, ຍິງ 102 ຄົນ ໃນນີ້ພົບສານເສບຕິດ 2.682 ຄົນ ຍິງ 57 ຄົນ, ບໍ່ພົບ 565 ຄົນ, ຍິງ 45 ຄົນ.
ພົຈວ ສົມຄິດ ດວງພະຈັນ ໃຫ້ຮູ້ຕື່ມວ່າ: ສັງລວມແລ້ວໄລ ຍະການຈັດຈັ່ງປະຕິບັດວາລະແຫ່ງຊາດວ່າດ້ວຍການແກ້ ໄຂບັນຫາຢາເສບຕິດ 2021-2024, ເຈົ້າໜ້າທີ່ສາມາດໃຊ້ມາດຕະການວິຊາສະເພາະມ້າງຄະດີຢາເສບຕິດໄດ້ 1.318 ລາຍ, ກັກຕົວຜູ້ຖືກຫາໄດ້ 1.966 ຄົນ, ຍິງ 187 ຄົນ, ຢຶດຂອງກາງປະເພດຢາບ້າ 8.480.752 ເມັດ, ໄອສ໌ 30,7 ກິ ໂລກຼາມ, ເຮໂຣອິນ 1.206 ກຼາມ, ລົດໃຫຍ່ 31 ຄັນ, ລົດ ຈັກ 306 ຄັນ, ໂທລະສັບ, ປືນສັ້ນ, ປືນຍາວ, ປືນສັ້ນດັດ ແປງ, ເງິນ ແລະ ອຸປະກອນຮັບໃຊ້ອື່ນໆອີກຈໍາ ນວນໜຶ່ງ. ສ່ວນຮູບການແກ້ໄຂ ໄດ້ສົ່ງສໍານວນໃຫ້ອົງການໄອຍະປະຊາຊົນແຂວງ 585 ລາຍ, ມີຜູ້ຖືກ ຫາ 687 ຄົນ, ຍິງ 86 ຄົນ, ສຶກສາອົບຮົມປ່ອຍຕົວຜູ້ທີ່ຂໍ້ມູນຫຼັກຖານບໍ່ໜັກແໜ້ນທາງດ້ານກົດໝາຍ 53 ຄົນ ແລະ ຍັງຢູ່ໃນຂັ້ນຕອນດໍາເນີນຂອງເຈົ້າໜ້າທີ່ 733 ລາຍ, ມີຜູ້ຖືກຫາ 1.218 ຄົນ ແລະ ອື່ນໆ.
ໂອກາດດັ່ງກ່າວ, ພົຈວ ສົມຄິດ ດວງພະຈັນ ໄດ້ຮຽກຮ້ອງມາຍັງທົ່ວສັງຄົມໂດຍສະເພາະພໍ່ແມ່ປະຊາຊົນຊາວແຂວງວຽງຈັນ ຈົ່ງພ້ອມກັນປະກອບສ່ວນເຮັດວຽກງານຕ້ານຢາເສບຕິດໃຫ້ແຂງແຮງ ໂດຍເລີ່ມຈາກການສຶກສາອົບຮົມລູກຫຼານທີ່ຢູ່ ໃນຄວາມຮັບຜິດຊອບຂອງທ່ານໃຫ້ຮູ້ໄດ້ຜົນຮ້າຍ ແລະ ໄພອັນຕະລາຍຂອງຢາເສບຕິດ, ກໍລະນີພົບເຫັນບຸກຄົນ ຫຼື ກຸ່ມຄົນທີ່ພົວພັນເຖິງຢາເສບຕິດ ໃຫ້ຮີບຮ້ອນແຈ້ງຕໍ່ເຈົ້າໜ້າທີ່ພາກສ່ວນທີ່ກ່ຽວຂ້ອງໂດຍໄວ ເພື່ອແກ້ໄຂໃຫ້ທັນເວລາ.
