ກອງບັນຊາການ ປກສ ແຂວງວຽງຈັນ ຈັດກອງປະຊຸມສະຫຼຸບວຽກງານປ້ອງກັນຄວາມສະຫງົບ ປະຈຳປີ 2024 ແລະ ວາງທິດທາງວຽກງານຈຸດສຸມ ປີ 2025 ໃນວັນທີ 14 ມັງກອນ 2025, ພາຍໃຕ້ການເປັນປະທານຂອງ ພົຈວ ສົມຄິດ ດວງພະຈັນ ຫົວໜ້າກອງບັນຊາການ ປກສ ແຂວງວຽງຈັນ, ໃຫ້ກຽດເຂົ້າຮ່ວມຂອງ ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ, ມີຄະນະພັກ-ຄະນະບັນຊາ, ພະນັກງານຫຼັກແຫຼ່ງຫ້ອງ, ກອງ, ພະແນກ, ປກສ ເມືອງ 11 ເມືອງ ເຂົ້າຮ່ວມ.
ພັທ ດວງໃຈ ມະນີວັນ ຫົວໜ້າຫ້ອງການ ປກສ ແຂວງວຽງຈັນ ໄດ້ລາຍງານການເຄື່ອນ ໄຫວວຽກງານປ້ອງກັນຄວາມສະຫງົບພາຍ ໃນແຂວງ ໃຫ້ຮູ້ວ່າ: ຕະຫຼອດໄລຍະ 1 ປີຜ່ານມາ, ສາມາດຍາດດ້ານດີ-ຜົນງານ ແລະ ມີຜົນສຳເລັດຫຼາຍດ້ານ ເປັນຕົ້ນໄດ້ຈັດຕັ້ງຜັນຂະ ຫຍາຍຄຳສັ່ງ ວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂບັນຫາຢາເສບຕິດ, ຄຳສັ່ງວ່າດ້ວຍການສະກັດກັ້ນ ແລະ ແກ້ໄຂປາກົດການຫຍໍ້ທໍ້ໃນສັງຄົມ ລວມທັງບັນດາໜ້າວຽກຈຸດສຸມປິ່ນອ້ອມໜ້າທີ່ການເມືອງຂອງກຳລັງ, ຜ່ານການຜັນຂະຫຍາຍ ສາມາດເລີກຮື້ ແລະ ແກ້ໄຂບັນດາເປົ້າໝາຍອາຊະຍາກຳທີ່ສ້າງຄວາມບໍ່ສະຫງົບຢູ່ໃນສັງຄົມ ສະແດງອອກມີຄະດີອາຍາເກີດຂຶ້ນທັງໝົດ 533 ເລື່ອງ, ກັກຕົວຜູ້ຖືກຫາ 646 ຄົນ ຍິງ 89 ຄົນ (ຄົນຕ່າງປະເທດ 25 ຄົນ) ບໍ່ນັບຄະດີຢາເສບຕິດ, ອຸປະຕິເຫດ ແລະ ອັກຄີໄພ; ພົ້ນເດັ່ນແມ່ນຄະດີລັກຊັບພົນລະເມືອງ ປະເພດລົດຈັກ ເກີດຂຶ້ນໃນແຕ່ລະວັນ, ແກ້ໄຂສຳເລັດ 233 ເລື່ອງ, ກຳລັງດຳເນີນ 103 ເລື່ອງ, ກຳລັງຕິດຕາມ 197 ເລື່ອງ ທຽບໃສ່ປີ 2023 ເຫັນວ່າຫຼຸດລົງ 58 ເລື່ອງ; ນອກຈາກນັ້ນ, ຍັງໄດ້ມ້າງກຸ່ມສໍ້ໂກງຊັບທາງອອນລາຍ ຫຼື ແກ້ງຄໍເຊັນເຕີ ໄດ້ 12 ກຸ່ມ, ກັກຕົວຜູ້ຖືກຫາ 241 ຄົນ ຍິງ 41 ຄົນ ໃນນີ້ມີຄົນຕ່າງປະເທດ 214 ຄົນ ຍິງ 41 ຄົນ.
ຄຽງຄູ່ກັນນີ້, ຍັງໄດ້ສຸມໃສ່ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ 2024-2025 ດ້ວຍຮູບການລົງໂຄສະນາເຜີຍແຜ່ນິຕິກໍາກ່ຽວກັບຜົນຮ້າຍຂອງຢາເສບຕິດຕາມໂຮງງານ, ສະຖາບັນການສຶກສາຕ່າງໆ 15 ຄັ້ງ, ຂຶ້ນຫ້ອງສອນຄວາມຮູ້ພື້ນຖານການສະກັດກັ້ນ ແລະ ຕ້ານຢາເສບຕິດຢູ່ວິທະຍາໄລເຕັກນິກແຂວງ 15 ຄັ້ງ, ປັດຈຸບັນທົ່ວແຂວງວຽງຈັນ ມີບ້ານປອດຢາເສບຕິດທີ່ຖືກຮັບຮອງແລ້ວ 286 ບ້ານ, ໂຮງຮຽນປອດຢາເສບຕິດ 75 ແຫ່ງ ໃນນີ້ມີວິທະຍາໄລ 1 ແຫ່ງ, ໄດ້ນໍາເອົາຢາເສບຕິດທີ່ສານຕັດສິນໃຊ້ໄດ້ຢ່າງເດັດຂາດແລ້ວມາທໍາລາຍ 1 ຄັ້ງ ມີ 11 ລາຍການ;ຄະດີຢາເສບຕິດເກີດຂຶ້ນ 230 ເລື່ອງ, ກັກຕົວຜູ້ຖືກຫາ 330 ຄົນ, ຍິງ 31 ຄົນ, ຍືດຂອງກາງປະເພດຢາບ້າ 2,047,797 ເມັດ, ມີສານເສບຕິດ ແລະ ຂອງກາງປະເພດອື່ນໆອີກຫຼາຍລາຍການໃນນີ້ມີອາວຸດເສິກ, ທາດລະເບີດອີກຈຳນວນໜຶ່ງ, ໃນນີ້ສາມາດແກ້ໄຂສຳເລັດ 46 ເລື່ອງ ທຽບໃສ່ປີ 2023 ເຫັນວ່າຫຼຸດລົງ 71 ເລື່ອງ.
ສຳລັບທິດທາງແຜນການໃນຕໍ່ໜ້າ, ກອງບັນຊາການ ປກສ ແຂວງວຽງຈັນ ຈະເພີ່ມທະວີປັບປຸງກໍ່ສ້າງພັກ-ກໍ່ສ້າງກຳລັງໃຫ້ປອດໃສ ເຂັ້ມແຂງ ໜັກແໜ້ນ; ປັບປຸງແບບແຜນການບັງຄັບບັນຊາທີ່ເດັດດ່ຽວ, ເດັດຂາດ, ເພີ່ມຂີດຄວາມສາມາດ, ມີຈັນຍາບັນ-ຈັນຍາທຳ ແລະ ກ້າວສູ່ຄວາມທັນສະໄໝ, ເຊີດຊູບົດບາດການນຳພາເດັດຂາດ-ໂດຍກົງ, ຮອບດ້ານຂອງພັກຕໍ່ວຽກງານປ້ອງກັນຄວາມສະຫງົບທຸກຂັ້ນ; ຕັ້ງໜ້າຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ ຢ່າງແຂງ ແຮງ, ຕິດພັນກັບການຈັດຕັ້ງປະຕິບັດທິດນໍາສາມສ້າງຂອງພັກ ໃນຂົງເຂດວຽກງານປ້ອງກັນຄວາມສະຫງົບ ໃຫ້ເປັນຮູບປະທໍາ, ມີປະສິດທິພາບ ແລະ ມີປະສິດທິຜົນສູງຂຶ້ນເປັນກ້າວໆ; ສືບຕໍ່ຫັນພະນັກງານລົງກໍ່ສ້າງຮາກຖານຕິດພັນກັບວຽກງານວິຊາສະເພາະຢ່າງແຂງແຮງ ເພື່ອເຮັດໃຫ້ວຽກງານປ້ອງກັນຊາດ-ປ້ອງກັນຄວາມສະຫງົບກາຍເປັນສະຕິ ແລະ ຄວາມຮັບຜິດຊອບຮ່ວມກັນຂອງທົ່ວສັງຄົມ, ເປັນເຈົ້າການກັນ ແລະ ສະກັດກັ້ນ ແກ້ໄຂໜໍ່ແໜງຄວາມບໍ່ສະຫງົບໃຫ້ໄດ້ໂດຍພື້ນຖານ, ຮັບປະກັນບໍ່ໃຫ້ເກີດເຫດການຄວາມບໍ່ສະຫງົບທາງດ້ານການເມືອງ, ຖ້າຫາກເກີດຂຶ້ນຢູ່ບ່ອນໃດ ຕ້ອງແກ້ໄຂໃຫ້ຂາດຕົວຢູ່ບ່ອນນັ້ນ, ບໍ່ປະປ່ອຍໃຫ້ແຜ່ລາມອອກເປັນວົງກວ້າງ, ແກ່ຍາວເວລາ ຫຼື ສົ່ງຜົນກະທົບເຖິງຄວາມໝັ້ນຄົງຂອງຊາດຢ່າງເດັດຂາດ.
