ກອງປະຊຸມທາບທາມບຸກຄະລາກອນ (ຮອບທີ II) ທີ່ຈະອອກສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກຫ້ອງວ່າການກະຊວງ ປກສ ຄັ້ງທີ VII ໄດ້ຈັດຂຶ້ນໃນວັນທີ 11 ທັນ ວາ 2024 ເປັນປະທານໂດຍ ສະຫາຍ ພົຕ ສຸລິນະ ແກ້ວປະເສີດ ຄະນະປະຈຳພັກກະຊວງ ເລຂາຄະນະພັກ ຫົວໜ້າຫ້ອງວ່າການກະຊວງ ປກສ, ມີຄະນະປະຈຳພັກ, ຄະນະ ພັກຫ້ອງວ່າການ, ຄະນະພັກ-ຄະນະບັນຊາກົມ-ຫ້ອງ, ຄະນະຮັບຜິດຊອບກອງປະຊຸມໃຫຍ່ 3 ຂັ້ນ ພ້ອມດ້ວຍສະມາຊິກພັກ ເຂົ້າຮ່ວມ.
ສະຫາຍ ພົຕ ສຸລິນະ ແກ້ວປະເສີດ ກ່າວເປີດກອງປະຊຸມໃຫ້ຮູ້ວ່າ: ກອງປະຊຸມທາບທາມບຸກຄະລາກອນ (ຮອບທີ II) ຂອງຄະນະພັກຫ້ອງວ່າການກະຊວງ ປກສ ຊຶ່ງເນື້ອແທ້ແມ່ນເພື່ອເປັນການປະຕິບັດຕາມກົດລະບຽບຂອງພັກປະຊາຊົນ ປະຕິວັດລາວ ທີ່ໄດ້ກໍານົດໄວ້ຕາມວາລະສະໄໝກອງປະຊຸມໃຫຍ່ຂອງພັກເຮົາ ຕິດພັນກັບການຈັດຕັ້ງປະຕິບັດຄໍາສັ່ງແນະ, ຄໍາແນະນໍາຂອງຄະນະພັກຂັ້ນເທິງ ເພື່ອໃຫ້ຖືກຕ້ອງຕາມລະບຽບຂອງພັກ ແນໃສ່ປັບປຸງພັກ, ປັບປຸງການຈັ່ງຕັ້ງແຕ່ລະຂັ້ນໃຫ້ມີຄວາມປອດໃສ ເຂັ້ມແຂງ ໜັກແໜ້ນ ແລະ ສືບທອດປ່ຽນແທນຢ່າງເປັນລະບົບຕໍ່ເນື່ອງ ຮັບປະກັນຄຸນນະພາບ ໂດຍສະເພາະ ແມ່ນຖືກຕາມຂັ້ນຕອນຂອງການກະກຽມຄວາມພ້ອມໃຫ້ແກ່ການດໍາເນີນກອງປະຊຸມໃຫຍ່ ຄັ້ງທີ VII ຂອງອົງຄະນະພັກຫ້ອງວ່າການກະຊວງ ປກສ ໃຫ້ຜົນສໍາເລັດຕາມຄາດໝາຍທີ່ໄດ້ກຳນົດໄວ້.
ກອງປະຊຸມ, ໄດ້ຜ່ານຮ່າງບົດລາຍງານການເມືອງຂອງຄະນະພັກຫ້ອງວ່າການກະຊວງ ປກສ ສະໄໝທີ VI, ບົດສຳຫຼວດການນຳພາລວມຂອງຄະນະພັກຫ້ອງວ່າການກະຊວງ ປກສ ສະ ໄໝທີ VI ແລ້ວພ້ອມກັນປະກອບຄຳຄິດຄຳເຫັນໃສ່ຮ່າງບົດລາຍງານການເມືອງ ແລະ ບົດສໍາຫຼວດການນຳພາລວມໂດຍສັງເຂບ.
ຫຼັງຈາກນັ້ນ, ໃນກອງປະຊຸມ ກໍໄດ້ຜ່ານມາດຕະຖານ ແລະ ເງື່ອນໄຂຜູ້ທີ່ຈະລົງສະໝັກຮັບເລືອກຕັ້ງເປັນຄະນະພັກຫ້ອງວ່າການ ຊຸດໃໝ່ ແລະ ດຳເນີນການປ່ອນບັດທາບທາມບຸກຄະລາກອນ (ຮອບທີ II) ສຳເລັດຕາມແຜນການ.
