ກົມໃຫຍ່ການເມືອງ ກະຊວງ ປກສ ໄດ້ສຳເລັດການຝຶກອົບຮົມວຽກງານເສນາບັນຊາ-ວຽກງານເສນາພະລາ ໃນວັນທີ 22 ພະຈິກ 2024 ພາຍຫຼັງໄດ້ດໍາເນີນມາແຕ່ວັນທີ 19 ພະຈິກ 2024 ເຂົ້າຮ່ວມເປັນປະທານ ແລະ ມອບໃບຢັ້ງຢືນ ໂດຍ ພົຕ ປອ ສຸວັນນີ ສີສຸພາບມີໄຊ ຫົວໜ້າກົມໃຫຍ່ການເມືອງ ປກສ, ມີຄະນະພັກ-ຄະນະບັນຊາກົມກອງອ້ອມຂ້າງກົມໃຫຍ່ການເມືອງ ພ້ອມດ້ວຍຄະນະຮັບຜິດຊອບ, ນັກວິທະຍາກອນ ແລະ ສໍາມະນາກອນ ເຂົ້າຮ່ວມ.
ພັອ ນີວອນ ບຸນວັນມາ ຮອງຫົວໜ້າຫ້ອງການກົມໃຫຍ່ການເມືອງ ປກສ ກ່າວວ່າ: ຜ່ານການຈັດຕັ້ງປະຕິບັດຊຸດຝຶກອົບຮົມໄລຍະສັ້ນວຽກງານເສນາບັນຊາ-ເສນາບັນພະລາ ທົ່ວກົມໃຫຍ່ການເມືອງ ປກສ ໃນໄລຍະວັນທີ 19-22 ພະຈິກ 2024, ມີນັກສໍາມະນາກອນເຂົ້າຮ່ວມທັງໝົດ 71 ຍິງ 17 ສະຫາຍ ເຊິ່ງແມ່ນພະນັກງານຫຼັກແຫຼ່ງຂັ້ນນໍາພາ-ບັນຊາ ທີ່ເຮັດໜ້າທີ່ຕົວຈິງໃນຂົງເຂດວຽກງານດັ່ງກ່າວ ຢູ່ບັນດາກົມ, ຫ້ອງ, ໂຮງຮຽນ, ວິທະຍາຄານອ້ອມຂ້າງກົມໃຫຍ່ການເມືອງ ປກສ, ມີວິທະຍາກອນ 18 ສະຫາຍ, ທີ່ມາຈາກຫ້ອງວ່າການກະຊວງ 6 ສະຫາຍ ແລະ ກົມໃຫຍ່ພະລາທິການ 12 ສະຫາຍ.
ເນື້ອໃນເອກະສານທີ່ນໍາມາຝຶກອົບຮົມ ລວມມີ 9 ບົດ ຄື: ວຽກງານຄຸ້ມຄອງເອກະສານ, ວຽກງານເສນາທິການຂອງກໍາລັງ ປກສ, ວຽກງານພົວພັນຕ່າງປະເທດ ແລະ ພິທີການ, ວຽກງານການເງິນ, ວຽກງານຄຸ້ມຄອງຊັບສິນ-ທີ່ດິນ, ວຽກງານຄຸ້ມຄອງກໍ່ສ້າງ-ສ້ອມແປງເຄຖະສາຖານ, ວຽກງານອຸປະໂພກ-ບໍລິໂພກ, ວຽກງານຄຸ້ມຄອງພາຫະນະ-ອຸປະກອນ, ວຽກງານຄຸ້ມຄອງອາວຸດ ແລະ ລູກກະສຸນ.
