ກົມສື່ມວນຊົນ ກົມໃຫຍ່ການເມືອງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກົມສື່ມວນຊົນ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ໄດ້ພົບປະແລກປ່ຽນບົດຮຽນຮ່ວມກັນ ປະຈໍາປີ 2024, ໃນວັນທີ 19 ພະຈິກ 2024 ທີ່ກະຊວງປ້ອງ ກັນຄວາມສະຫງົບລາວ, ຝ່າຍລາວນໍາໂດຍ ພັອ ເພີນຄໍາ ແສງດາລາ ຫົວໜ້າກົມສື່ມວນຊົນ ປ້ອງກັນຄວາມສະຫງົບລາວ, ຝ່າຍຫວຽດນາມນໍາໂດຍ ພັອ ຫງວຽນ ແອັງ ຕ້ວນ ຮອງຫົວໜ້າກົມສື່ມວນຊົນ ອໍານວຍການສະຖານີໂທລະພາບປ້ອງກັນຄວາມສະຫງົບປະຊາຊົນ ຫວຽດນາມ ພ້ອມດ້ວຍຄະນະທັງສອງຝ່າຍ ເຂົ້າຮ່ວມ.
ກອງປະຊຸມພົບປະຄັ້ງນີ້ ຄະນະຜູ້ແທນທັງສອງກົມສື່ມວນຊົນ ປ້ອງກັນຄວາມສະຫງົບ ລາວ-ຫວຽດນາມ ໄດ້ຜັດປ່ຽນກັນລາຍງານຫຍໍ້ກ່ຽວກັບສະພາບການເຄື່ອນໄຫວວຽກງານວິຊາສະເພາະ ໃນໄລຍະຜ່ານມາ ໃຫ້ກັນ ແລະ ກັນຊາບ, ເຊິ່ງການພົບປະຄັ້ງນີ້ ຖືເປັນຄັ້ງທຳອິດ ແລະ ເປັນຄັ້ງປະຫວັດສາດ ທີ່ຈະໄດ້ພ້ອມກັນປຶກສາຫາລືການຮ່ວມມື ລະຫວ່າງ ກົມສື່ມວນຊົນ ປ້ອງກັນຄວາມສະຫງົບລາວ ແລະ ກົມສື່ມວນຊົນ ປ້ອງກັນຄວາມສະຫງົບຫວຽດນາມ ໂດຍສະເພາະແມ່ນວຽກງານໂທລະພາບປ້ອງກັນຄວາມສະຫງົບ ລາວ-ຫວຽດນາມ ໃຫ້ມີບາດກ້າວໃໝ່, ມີຄວາມທັນສະໄໝ, ແລກປ່ຽນຂໍ້ມູນຂ່າວສານເຊິ່ງກັນ ແລະ ກັນ ຢ່າງຖືກຕ້ອງ, ວ່ອງໄວ, ຊັດເຈນ ເພື່ອເປັນກະບອກສຽງອັນແຫຼມຄົມ ໃຫ້ສອງພັກ-ສອງລັດ ກໍຄື ສອງກະຊວງປ້ອງກັນຄວາມສະຫງົບ ລາວ-ຫວຽດນາມ.
ສໍາລັບໂທລະພາບປ້ອງກັນຄວາມສະຫງົບລາວ ມີຄວາມຮຽກຮ້ອງຕ້ອງການທີ່ສຸດ ໃນການຮ່ວມມືແລກປ່ຽນບົດຮຽນ, ແລກປ່ຽນຂໍ້ມູນຂ່າວສານກັບ ສື່ມວນຊົນປ້ອງກັນຄວາມສະຫງົບ ຫວຽດນາມ ບໍ່ສະເພາະໂທລະພາບເທົ່ານັ້ນ ຍັງມີວິທະຍຸ, ໜັງສືພິມ, ວາລະ ສານ ແລະ ສື່ອອນລາຍ ທີ່ຄວນມີການຮ່ວມມືກັນຢ່າງເລິກເຊິ່ງ, ກວ້າງຂວາງ ເພື່ອເປັນການເຜີຍແຜ່ຂໍ້ມູນ, ເຫດການຕ່າງໆທີ່ເກີດຂຶ້ນຢູ່ຂອງທັງສອງປະເທດ ລາວ-ຫວຽດນາມ ຜ່ານສື່ມວນຊົນຂອງສອງກະຊວງ ໃຫ້ຖືກ ຕ້ອງ, ວ່ອງໄວ ແລະ ທັນເຫດການ.
ການພົບປະໃນຄັ້ງນີ້ ສື່ມວນຊົນປ້ອງກັນຄວາມສະຫງົບ ລາວ-ຫວຽດນາມ ຈະໄດ້ພ້ອມກັນສືບຕໍ່ສ້າງສາຍພົວໃກ້ຊິດສະໜິດແໜ້ນ, ສ້າງຄວາມສາມັກຄີ, ແລກປ່ຽນບົດຮຽນ, ຊ່ວຍເຫຼືອເຊິ່ງກັນ ແລະ ກັນ ທາງດ້ານວຽກງານສື່ມວນຊົນ ເພື່ອໃຫ້ສື່ມວນຊົນຂອງສອງກະຊວງ ນັບມື້ນັບເຕີບໃຫຍ່ເຂັ້ມແຂງຂຶ້ນໄປເລື້ອຍໆ; ເປັນກະບອກສຽງທີ່ແຫຼມຄົມໃຫ້ສອງພັກ-ສອງລັດ, ສອງກະຊວງປ້ອງກັນຄວາມສະຫງົບ ລາວ-ຫວຽດນາມ ໃນການເຜີຍແຜ່ແນວທາງອັນຖືກຕ້ອງຂອງສອງພັກ-ລັດ, ສາຍພົວພັນຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ.
ໂອກາດນີ້, ພັອ ເພີນຄຳ ແສງດາລາ ໄດ້ສະແດງຄວາມຂອບໃຈ ຕໍ່ຄະນະຜູ້ແທນ ກົມສື່ມວນຊົນ ປ້ອງກັນຄວາມສະຫງົບ ຫວຽດນາມ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຮ່ວມກັບ ກົມສື່ມວນຊົນ ປ້ອງກັນຄວາມສະຫງົບລາວ ໃນຄັ້ງນີ້ ພ້ອມທັງອວຍພອນໄຊແດ່ສາຍພົວພັນພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ ກໍຄື ສື່ມວນຊົນ ສອງກຳລັງປ້ອງກັນຄວາມສະຫງົບ ລາວ-ຫວຽດນາມ ຈົ່ງໝັ້ນຄົງທະນົງແກ່ນຕະຫຼອດກາລະນານ.
