ກົມໃຫຍ່ການເມືອງ ກະຊວງ ປກສ ໄດ້ຈັດພິທີເປີດຝຶກອົບຮົມວຽກງານເສນາບັນຊາ ແລະ ວຽກງານເສນາພະລາ ໃຫ້ນາຍ ແລະ ພົນຕໍາຫຼວດ ໂດຍສະເພາະ ຜູ້ທີ່ເຮັດວຽກງານເສນາທິການ ທົ່ວກົມໃຫຍ່ການເມືອງ ປກສ ໃນວັນທີ 19 ພະຈິກ 2024, ໂດຍມີ ພົຕ ປອ ສຸວັນນີ ສີສຸພາບມີໄຊ ຫົວໜ້າກົມໃຫຍ່ການເມືອງ ປກສ, ມີຄະນະພັກ-ຄະນະບັນຊາກົມກອງອ້ອມຂ້າງກົມໃຫຍ່ການເມືອງ, ຄະນະຮັບຜິດຊອບ ເຂົ້າຮ່ວມ.
ພັອ ປອ ວຽງໄຊ ທໍາມະສິດ ຫົວໜ້າຫ້ອງການກົມໃຫຍ່ການເມືອງ ປກສ ກ່າວວ່າ: ການຝຶກອົບຮົມຄັ້ງນີ້ ເພື່ອເປັນການປະຕິບັດລະ ບຽບຫຼັກການວິຊາສະເພາະ, ເປັນການປັບປຸງ ແລະ ຍົກສູງຄຸນນະພາບວຽກງານເສນາບັນຊາ ແລະ ເສນາພະລາ ໃຫ້ແກ່ຄະນະພັກ-ຄະນະບັນຊາ ກົມກອງອ້ອມຂ້າງ ເວົ້າສະເພາະ ແມ່ນການເປັນເສນາທິການໃຫ້ຄະນະພັກ-ຄະນະນໍາກົມໃຫຍ່ການເມືອງ ປກສ. ເຊິ່ງໃນນີ້, ນັກສຳມະນາກອນ ຈະໄດ້ພ້ອມກັນຄົ້ນຄວ້າ, ເຊື່ອມຊຶມເນື້ອໃນເອກະສານ ແລະ ສົນທະນາແລກປ່ຽນຄຳເຫັນນໍາກັນ ເພື່ອສ້າງຄວາມເປັນເອກະພາບທາງດ້ານເນື້ອໃນ, ຮູບແບບ, ວິທີການຕ່າງໆ ໃຫ້ຖືກຕ້ອງຕາມຫຼັກການວິຊາສະເພາະ, ເປັນການສ້າງເງື່ອນໄຂຮັບປະກັນເຮັດໃຫ້ການຈັດຕັ້ງປະຕິບັດວຽກງານນັບມື້ດີຂຶ້ນເປັນກ້າວໆ ແລະ ມີຜົນສໍາເລັດຕາມຄາດໝາຍ.
ຊຸດຝຶກອົບຮົມຄັ້ງນີ້, ຈະໄດ້ດຳເນີນເປັນເວລາ 4 ວັນ, ມີນັກສໍາມະນາກອນທັງໝົດ ຈໍານວນ 71 ສະຫາຍ ຍິງ 17 ສະຫາຍ, ເຊິ່ງຈະໄດ້ຮຽນຮູ້ວຽກງານຄຸ້ມຄອງເອກະສານຜ່ານປະຕູດຽວ, ວຽກງານເສນາທິການຂອງກໍາລັງ ປກສ, ວຽກງານອຸປະໂພກ ແລະ ບໍລິໂພກ, ວຽກງານຄຸ້ມຄອງອາວຸດ ແລະ ລູກກະສຸນ, ວຽກງານຄຸ້ມຄອງພາຫະນະ, ວຽກງານແຜນການ ແລະ ການເງິນ, ວຽກງານຄຸ້ມຄອງຊັບ ສິນ-ທີ່ດິນ, ວຽກງານກໍ່ສ້າງ-ສ້ອມແປງເຄຫະສະຖານ, ວຽກງານພິທີການ ແລະ ພົວພັນຕ່າງປະເທດ ແລະ ວຽກງານການຜະລິດ ແລະ ລ້ຽງດູກໍາລັງ.
