ວັນທີ 19 ພະຈິກ 2024, ທີ່ຫ້ອງຮັບແຂກກະຊວງປ້ອງກັນຄວາມສະຫງົບ, ພົນໂທ ກົງທອງ ພົງວິຈິດ ຮອງລັດຖະມົນຕີ ກະຊວງ ປ້ອງກັນຄວາມສະຫງົບ ພ້ອມຄະນະ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ມໍຣະກົດ ສີສະຫວັດ ເອກອັກຄະຣາຊະທູດ ແຫ່ງຣາຊະອານາຈັກໄທ ປະຈໍາ ສປປ ລາວ ພ້ອມຄະນະ ເພື່ອຫາລືກ່ຽວກັບທຶນການສຶກສາຂອງສົມເດັດພະເທບທີ່ຈະມອບໃຫ້ນັກຮຽນໂຮງຮຽນວັດທະນະທຳຫຼັກ 67 ກະຊວງປ້ອງກັນຄວາມສະຫງົບລາວ.
ທ່ານ ນາງ ມໍຣະກົດ ສີສະຫວັດ ໄດ້ສະແດງຄວາມຂອບໃຈເປັນຢ່າງສູງ ຕໍ່ການຕ້ອນຮັບອັນອົບອຸ່ນຂອງ ພົນໂທ ກົງທອງ ພົງວິຈິດ ແລະ ຕີລາຄາສູງຕໍ່ສາຍພົວພັນມິດຕະພາບ ຜົນການພົວພັນຮ່ວມມື ໄທ-ລາວ, ລາວ-ໄທ ໃນການສືບຕໍ່ເສີມຂະຫຍາຍ ແລະ ຮັດແໜ້ນການພົວ ພັນຮ່ວມມືໃຫ້ມີການຂະຫຍາຍຕົວຢ່າງຕໍ່ເນື່ອງ ໂດຍສະເພາະ ແມ່ນບັນດາໂຄງການທີ່ຣາຊະ ອານາຈັກໄທ ໃຫ້ການຊ່ວຍເຫຼືອຢູ່ ສປປ ລາວ ເປັນຕົ້ນແມ່ນ ວຽກງານການສຶກສາ, ເຊິ່ງໃນປີນີ້ ສົມເດັດພະເທບ ມອບທຶນໃຫ້ນັກຮຽນໂຮງຮຽນວັດທະນະທໍາຫຼັກ 67 ຈໍານວນ 10 ທຶນ ແລະ ບັນດາກິດຈະກໍາອື່ນໆທີ່ກ່ຽວຂ້ອງກັບວຽກງານການສຶກສາ.
ພົນໂທ ກົງທອງ ພົງວິຈິດ ໄດ້ຕາງໜ້າໃຫ້ຄະນະພັກ-ຄະນະບັນຊາ, ຄະນະອຳນວຍການ ແລະ ນ້ອງນັກຮຽນ ໂຮງຮຽນວັດທະນະທໍາຫຼັກ 67 ກ່າວສະແດງຄວາມຂອບໃຈມາຍັງທ່ານເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈໍາ ສປປ ລາວ ກໍຄື ສົມເດັດພະເທບ ທີ່ສະແດງຄວາມເປັນຫ່ວງເປັນໃຍຕໍ່ການຮຽນການສຶກສາ ຂອງນ້ອງນັກຮຽນ ພາຍໃນໂຮງຮຽນວັດທະນະທໍາຫຼັກ 67 ເຊິ່ງທຶນການສຶກສາຈໍານວນດັ່ງກ່າວ ຈະຊ່ວຍໃນການຍົກລະດັບຄວາມຮູ້ຄວາມສາມາດດ້ານຕ່າງໆຂອງນັກຮຽນ ເຊິ່ງຈະສາມາດນຳເອົາຄວາມຮູ້ດັ່ງກ່າວມາພັດທະນາຮຽນໂຮງຮຽນ ກໍຄືກົມກອງໃຫ້ດີຂຶ້ນເທື່ອລະກ້າວ.
