ກອງປະຊຸມເປີດກວ້າງ ຄະນະພັກ ຫ້ອງວ່າການ ກະຊວງ ປກສ ໄດ້ຈັດຂຶ້ນໃນວັນທີ 19 ພະຈິກ 2024, ເປັນປະທານໂດຍ ສະຫາຍ ພົຕ ສຸລິນະ ແກ້ວປະເສີດ ຄະນະປະຈໍາພັກກະຊວງ ເລຂາຄະນະພັກ ຫົວໜ້າຫ້ອງວ່າການ ກະຊວງ ປກສ ມີຮອງເລຂາຄະນະ, ຄະນະປະຈໍາພັກ, ຄະນະພັກ ແລະ ພະນັກງານຫຼັກແຫຼ່ງຈາກກົມກອງທີ່ຂຶ້ນກັບ ຫ້ອງວ່າການ ກະຊວງ ປກສ ເຂົ້າຮ່ວມ.
ສະຫາຍ ພົຕ ສຸລິນະ ແກ້ວປະເສີດ ກ່າວວ່າ:ກອງປະຊຸມເປີດກວ້າງຂອງ ຄະນະພັກ ຫ້ອງວ່າການກະຊວງ ໃນຄັ້ງນີ້ ມີຄວາມໝາຍ, ຄວາມສໍາຄັນຍິ່ງ ທີ່ຕິດພັນກັບ ການຕີລາຄືນໃນການຈັດຕັ້ງປະຕິບັດບັນດາມະຕິກອງປະຊຸມຂອງພັກ ໃນແຕ່ລະຂັ້ນ, ຂໍ້ກຳນົດ, ກົດລະບຽບຕ່າງໆ ທີ່ວາງອອກໃນແຕ່ລະໄລຍະ ເວົ້າລວມ, ເວົ້າສະເພາະ ໃນໄລຍະ 5 ປີຜ່ານມາ ເປັນຕົ້ນແມ່ນ ການນໍາພາ-ຊີ້ນໍາ ໃນແຕ່ ລະຂົງເຂດວຽກງານວິຊາສະເພາະ ຂອງແຕ່ລະກົມ-ຫ້ອງ ອ້ອມຂ້າງ ຫ້ອງວ່າການ ເຊັ່ນ: ການປະຕິບັດແຜນການດໍາເນີນກອງປະຊຸມໃຫຍ່ຜູ້ແທນ ອົງຄະນະພັກຫ້ອງວ່າການ ເພື່ອເປັນການກະກຽມຄວາມພ້ອມດ້ານຕ່າງໆ ໃຫ້ແກ່ການດໍາເນີນກອງປະຊຸມໃຫຍ່ ຄັ້ງທີ VII ຂອງອົງຄະນະພັກຫ້ອງວ່າການກະຊວງ ປກສ ໃຫ້ທັນກັບແຜນການຂອງຄະນະພັກກະຊວງ ປກສ ກຳນົດໄວ້. ສະນັ້ນ, ມີຄວາມຈໍາເປັນທີ່ຈະຕ້ອງໄດ້ຄົ້ນຄວ້າ, ປະກອບຄໍາຄິດຄໍາເຫັນ ກໍຄື ການເຜີຍແຜ່, ເຊື່ອມຊຶມບັນດາມະຕິ ແລະ ເອກະສານຕ່າງໆ ທີ່ຕິດພັນກັບການດໍາເນີນກອງປະຊຸມໃຫຍ່ຜູ້ແທນດັ່ງກ່າວ ໃຫ້ບັນດາອະນຸກຳມະການດ້ານຕ່າງໆ ເພື່ອເປັນການແບ່ງຄວາມຮັບຜິດຊອບດ້ານວຽກງານຕ່າງໆ ໃຫ້ຄະນະພັກ-ຄະນະກົມ-ຫ້ອງ ກໍຄື ບັນດາອະນຸກຳມະການດ້ານຕ່າງໆ ຮັບໃຊ້ກອງປະຊຸມ ເພື່ອສຸມໃສ່ການດໍາເນີນກອງປະຊຸມໃຫຍ່ ຄັ້ງທີ VII ຂອງອົງຄະນະພັກ ຫ້ອງວ່າການ ກະຊວງ ປກສ ໃຫ້ຖືກຕ້ອງ, ສອດຄ່ອງ ແລະ ສໍາເລັດຜົນຕາມຈຸດປະສົງທີ່ກຳນົດໄວ້.
ພ້ອມນີ້, ບັນຜູ້ເຂົ້າຮ່ວມກອງປະຊຸມ ຍັງໄດ້ປະກອບຄໍາເຫັນຕໍ່ຮ່າງບົດລາຍງານການເມືອງ ແລະ ຮ່າງບົດສຳຫຼວດການນໍາພາລວມຂອງ ຄະນະພັກ ຫ້ອງວ່າການ ກະຊວງ ປກສ ຊຸດເກົ່າ ເພື່ອເຮັດໃຫ້ກອງປະຊຸມຄັ້ງນີ້ ໄດ້ຮັບການປະຕິບັດຖືກຕ້ອງຕາມຈຸດປະສົງຄາດໝາຍ ແລະ ເນື້ອໃນທີ່ກຳນົດໄວ້.
