ກອງປະຊຸມວຽກງານປ້ອງກັນຄວາມສະຫງົບການເມືອງພາຍໃນ ທົ່ວປະເທດ ຄັ້ງທີ III ໄດ້ຈັດຂຶ້ນໃນວັນທີ 13 ພະຈິກ 2024 ທີ່ກະ ຊວງປ້ອງກັນຄວາມສະຫງົບ, ໂດຍການເຂົ້າຮ່ວມ ແລະ ເປັນປະທານຂອງ ພົທ ກົງທອງ ພົງວິຈິດ ກຳມະການສູນກາງພັກ ຮອງລັດຖະມົນຕີກະຊວງປ້ອງກັນຄວາມສະຫງົບ, ມີບັນດາລັດຖະມົນຕີ, ຮອງລັດຖະມົນຕີ, ຄະນະພັກ-ຄະນະນໍາ, ຄະນະປ້ອງກັນພາຍໃນສຳນັກງານ-ອົງການອ້ອມຂ້າງສູນກາງ ແລະ ທ້ອງຖິ່ນ ເຂົ້າຮ່ວມ.
+ ກອງປະຊຸມ ໄດ້ຮັບຟັງການສະຫຼຸບຕີລາຄາການຈັດຕັ້ງເຄື່ອນໄຫວເຮັດໜ້າທີ່ວຽກງານປ້ອງກັນຄວາມສະຫງົບການເມືອງພາຍໃນ, ປ້ອງກັນການນຳ, ປ້ອງກັນພັກ-ພະນັກງານ ແລະ ພ້ອມກຳນົດທິດທາງແຜນການໃນຕໍ່ໜ້າ, ຜ່ານຮ່າງຂໍ້ຕົກລົງຂອງ ລັດຖະມົນຕີ ກະຊວງປ້ອງກັນຄວາມສະຫງົບ ວ່າດ້ວຍລະບຽບການປ້ອງກັນປົກປັກຮັກສາຄວາມລັບຂອງຊາດ ແລະ ໄດ້ຮັບຟັງການລາຍງານຂອງກົມວິຊາສະເພາະກ່ຽວກັບສະພາບການ, ການເຄື່ອນໄຫວເຮັດໜ້າທີ່ວຽກງານ ໃນໄລຍະຜ່ານມາ ແລະ ວາງທິດທາງແຜນການໃນຕໍ່ໜ້າ ແລະ ການປະກອບຄໍາຄິດ-ຄໍາເຫັນຂອງບັນດາສະຫາຍຄະນະພັກ-ຄະນະນໍາ ແລະ ຄະນະປ້ອງກັນພາຍໃນ ທີ່ມາຈາກບັນດາກະ ຊວງ-ອົງການທຽບເທົ່າກະຊວງ, ນະຄອນຫຼວງວຽງຈັນ ແລະ ບັນດາແຂວງ ໃນທົ່ວປະເທດ. ໃນໄລຍະຜ່ານມາ, ສາມາດຮັກສາໄດ້ຄວາມສະຫງົບ-ປອດໄພ, ຄວາມເປັນລະບຽບຮຽບຮ້ອຍໂດຍພື້ນຖານ ນັບແຕ່ສູນກາງລົງຮອດທ້ອງຖິ່ນ, ເຊິ່ງເຮັດໃຫ້ກອງປະຊຸມດໍາເນີນໄປດ້ວຍບັນຍາກາດຟົດຟື້ນ ແລະ ໄດ້ຮັບໝາກຜົນຕາມຈຸດປະສົງ ແລະ ລະດັບຄາດໝາຍທີ່ວາງໄວ້.
+ ໂອກາດນີ້, ພົທ ກົງທອງ ພົງວິຈິດ ໄດ້ໂອ້ລົມຕໍ່ພິທີເຊິ່ງທ່ານໄດ້ມີຄຳເຫັນໃຫ້ຄະນະພັກ-ຄະນະນໍາ ຢູ່ແຕ່ລະຂົງເຂດ ນັບທັງສູນກາງລົງຮອດທ້ອງຖິ່ນ ຈະຕ້ອງໄດ້ຍົກສູງຄວາມຮັບຜິດຊອບຂອງຕົນໃນການນໍາພາ-ຊີ້ນໍາຕໍ່ວຽກງານປ້ອງກັນຄວາມສະຫງົບການເມືອງພາຍໃນ ເຫັນໄດ້ຄວາມໝາຍຄວາມສໍາຄັນຂອງວຽກງານປ້ອງກັນພັກ-ພະນັກງານ ໃນສະພາບການໃໝ່ ກໍຄື ປັດຈຸບັນ ຕ້ອງເພີ່ມທະວີເຮັດວຽກງານສຶກສາອົບຮົມການເມືອງ-ແນວຄິດໃຫ້ເປັນກົກ, ເອົາໃຈໃສ່ກຳແໜ້ນສະພາບພາຍໃນ, ກົນອຸບາຍການເຄື່ອນໄຫວຂອງສັດຕູ ແລະ ກຸ່ມຄົນບໍ່ດີ, ຍົກສູງສະຕິໃນການເຄົາລົບລະບຽບຂອງພັກ, ກົດໝາຍຂອງລັດທີ່ວາງອອກ ແລະ ກົມປ້ອງກັນພາຍ ໃນ ກະຊວງປ້ອງກັນຄວາມສະຫງົບ ຮ່ວມກັບ ຄະນະປ້ອງກັນພາຍໃນ ຂອງສຳນັກງານ-ອົງການ ຕ້ອງເຮັດໜ້າທີ່ເປັນເສນາທິການໃຫ້ແກ່ສູນກາງພັກ, ລັດຖະບານ ແລະ ຄະນະພັກ-ຄະນະນໍາຂັ້ນເທິງຂອງຕົນ ໃນວຽກງານປ້ອງກັນການເມືອງພາຍໃນ, ເພີ່ມທະວີເຮັດວຽກງານປ້ອງກັນພະນັກງານການນໍາ, ແຂກມາຢ້ຽມຢາມເຮັດວຽກ, ບັນດາເຫດການການເມືອງ ແລະ ວັນສໍາຄັນຕ່າງໆ ໃຫ້ມີຄວາມສະຫງົບ-ປອດໄພ, ປ້ອງກັນເວນຍາມຢູ່ບັນດາສໍານັກງານ-ອົງການ, ແນໃສ່ສະກັດກັ້ນ ແລະ ແກ້ໄຂບັນດາປະກົດການຫຍໍ້ທໍ້ທີ່ອາດຈະເກີດຂຶ້ນ ເປັນຕົ້ນສະພາບການຂີ້ລັກງັດແງະ, ອັກຄີໄພ ໃຫ້ມີຄວາມສະຫງົບ ແລະ ຄວາມເປັນລະບຽບຮຽບຮ້ອຍຢ່າງໜັກແໜ້ນ ເພື່ອເຮັດໃຫ້ວຽກງານປ້ອງກັນຄວາມສະຫງົບການເມືອງພາຍໃນ ໄດ້ຮັບການຈັດຕັ້ງເຄື່ອນໄຫວເປັນຮູບປະທຳນັ້ນ ແຕ່ລະສຳນັກງານ-ອົງການ ຕ້ອງໄດ້ສະຫຼຸບຕີລາຄາບັນດາສະພາບການ, ການເຄື່ອນໄຫວເຮັດໜ້າທີ່ ແລະ ວາງທິດທາງແຜນການຂອງຕົນ ສົ່ງໃຫ້ກົມວິຊາສະເພາະ ຫຼື ພະແນກວິຊາສະເພາະປ້ອງກັນພາຍໃນ ໃຫ້ເປັນແຕ່ລະເດືອນ, 3 ເດືອນ, 6 ເດືອນ ແລະ ປີ ໃຫ້ເປັນປົກ ກະຕິ.
