ການພົບປະແລກປ່ຽນບົດວຽກງານປ້ອງກັນຄວາມສະຫງົບ ລະຫວ່າງ ກອງບັນຊາການປ້ອງຄວາມສະຫງົບ ແຂວງອຸດົມໄຊ ສປປ ລາວ ກັບກອງບັນຊາການປ້ອງກັນຄວາມສະຫງົບ ແຂວງດຽນບຽນ ແຫ່ງ ສສ ຫວຽດນາມ ໄດ້ຈັດຂຶ້ນໃນວັນທີ 1 ພະ ຈິກ 2024 ນີ້ ຢູ່ທີ່ຫ້ອງປະຊຸມຂອງກອງບັນຊາການ ປກສ ແຂວງອຸດົມໄຊ, ຝ່າຍລາວນຳໂດຍ ພັອ ດວງຈັນ ໄຊວຸດ ຮອງຫົວ ໜ້າກອງບັນຊາການ ປກສ ແຂວງອຸດົມໄຊ, ຝ່າຍຫວຽດນາມນຳໂດຍ ພັອ ຟ້າມເຈືອງຢ່າງ ຮອງຫົວໜ້າກອງບັນຊາການ ປກສ ແຂວງດຽນບຽນ ແຫ່ງ ສສ ຫວຽດນາມ ໂດຍມີຄະນະທັງສອງຝ່າຍເຂົ້າຮ່ວມ.
ກອງປະຊຸມຄະນະທັງສອງຝ່າຍໄດ້ສະແດງຄວາມຍິນດີຊົມເຊີຍ, ຕ້ອນຮັບ ແລະ ສະແດງຄວາມຢື້ຢາມຖານຂ່າວເຊິ່ງກັນ ແລະ ກັນຢ່າງອົບອຸ່ນ, ພ້ອມນັ້ນ, ທັງສອງຝ່າຍໄດ້ຮ່ວມກັນທົບທວນຄືນ, ຕີລາຄາໝາກຜົນການປະສານສົມທົບ, ການຮ່ວມມືກັນໃນວຽກງານປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມຢູ່ພື້ນທີ່ຂອງສອງແຂວງ ລາວ-ຫວຽດນາມ, ຫວຽດນາມ-ລາວໃນໄລຍະທີ່ຜ່ານມາ ໂດຍຍົກໃຫ້ເຫັນສະພາບຮອບດ້ານໂດຍລວມ ແລະ ອັນສະເພາະມີທັງຂໍ້ສະດວກ, ຂໍ້ຫຍຸ້ງຍາກ, ບັນຫາປະກົດການຫຍໍ້ທໍ້ຕ່າງໆໃຫ້ກັນ ແລະ ກັນຊາບ,ໃນນີ້ຢູ່ແຂວງອຸດົມໄຊ ແມ່ນພົບບັນຫາຢາເສບຕິດ, ຄ້າຂາຍເຖື່ອນ, ການເຂົ້າ-ອອກເມືອງຜິດກົດໝາຍ, ການປະກອບອາຊີບ, ເຄື່ອນໄຫວກະທຳຜິດທາງດ້ານອິນເຕີເນັດ ແລະ ເຕັກໂນໂລຊີ, ລັກຊັບ, ປຸ້ນຊັບ, ຄາດຕະກໍາ ແລະ ກໍ່ອາດຊະຍາກໍາອື່ນໆ ເຫັນວ່ານັບມື້ນັບຫຼາຍ ແລະ ເລ່ຫຼ່ຽມ, ຮູບແບບກົນອຸບາຍຂອງສັດຕູ, ກຸ່ມຄົນບໍ່ຫວັງດີ ນັບມື້ນັບສະຫຼັບຊັບຊ້ອນ.
ຜ່ານການຮັບຟັງການລາຍງານສະພາບຮ່ວມກັນຄັ້ງນີ້, ທັງສອງຝ່າຍຍັງໄດ້ຜັດປ່ຽນກັນປະກອບຄຳຄິດເຫັນແລກປ່ຽນບົດ ຮຽນ ເຊິ່ງກັນ ແລະ ກັນ ພ້ອມທັງວາງທິດທາງແຜນການເປັນຕົ້ນແມ່ນວິທີການ, ມາດຕະການ ແລະ ຄວາມຕ້ອງການດ້ານອື່ນໆຕາມແຜນການ, ສືບຕໍ່ເສີມຂະຫຍາຍມູນເຊື້ອສາຍພົວພັນມິດຕະພາບຮອບດ້ານ ລະຫວ່າງ ລາວ-ຫວຽດນາມ, ຫວຽດ ນາມ-ລາວ, ເພີ່ມທະວີປະສານສົມທົບເຊິ່ງກັນ ແລະ ກັນ, ສ້າງເງື່ອນໄຂອຳນວຍຄວາມສະດວກໃນການໄປປະຕິບັດໜ້າທີ່ວິຊາສະເພາະທີ່ກ່ຽວພັນເຖິງວຽກງານປ້ອງກັນຄວາມສະຫງົບແຫ່ງຊາດ, ຄວາມເປັນລະບຽບຮຽບຮ້ອຍຂອງສັງຄົມ, ເພີ່ມທະວີແລກປ່ຽນຂໍ້ມູນຂ່າວສານ, ສະພາບການ, ຮ່ວມກັນແກ້ໄຂບັນດາລາຍຄະດີ ແລະ ປະກົດການຫຍໍ້ທໍ້ຕ່າງໆທີ່ເກີດຂຶ້ນ, ເຂັ້ມງວດວຽກງານກວດຄົນເຂົ້າ-ອອກເມືອງ ແນໃສ່ປະກອບສ່ວນເຂົ້າໃນການຮັກສາຄວາມສະຫງົບ-ຄວາມເປັນລະບຽບຮຽບຮ້ອຍທາງສັງຄົມ.
ຈາກນັ້ນ, ຄະນະຜູ້ແທນທັງສອງຝ່າຍກໍໄດ້ລົງນາມເຊັນບົດບັນທຶກຊ່ວຍຈຳ ວ່າດ້ວຍການພົບປະແລກປ່ຽນສະພາບ ແລະ ມອບຂອງຂວັນທີ່ລະນຶກເຊິ່ງກັນ ແລະ ກັນດ້ວຍໄມຕີຈິດ, ມິດຕະພາບອັນອົບອຸ່ນ.
