ໃນວັນທີ 7 ພະຈິກ 2024, ກົມສື່ມວນຊົນ ກົມໃຫຍ່ການເມືອງ ກະຊວງ ປກສ ໄດ້ຈັດພິທີປາຖະກະຖາເລົ່າມູນເຊື້ອວັນປະກາດເອກະລາດ (12 ຕຸລາ 1945 – 12 ຕຸລາ 2024) ຄົບຮອບ 79 ປີ, ໂດຍການເຜີຍແຜ່ຂອງ ພັອ ພອນພິລຸນ ປັນຍາສິລິ ຮອງຫົວໜ້າກົມສື່ມວນຊົນ ປກສ, ມີຄະນະກອງ, ພ້ອມດ້ວຍພະນັກງານ-ນັກຮົບ ເຂົ້າຮ່ວມ.
ພັອ ພອນພິລຸນ ປັນຍາສິລິ ກ່າວວ່າ: ວັນທີ 12 ຕຸລາ 1945 ລັດຖະບານລາວອິດສະຫຼະ ເຊິ່ງເປັນສັນຍາລັກແຫ່ງກ້ອນກຳລັງສາມັກຄີທົ່ວປ່ວງຊົນລາວທັງຊາດ ໄດ້ອອກສະເໜີຕໍ່ໜ້າປະຊາຊົນຢູ່ນະຄອນຫຼວງວຽງຈັນ; ລັດຖະບານ ໄດ້ອອກຖະແຫຼງການປະກາດເອກະລາດຂອງລາວ ແລະ ໃນຖະແຫຼງການໄດ້ເວົ້າແຈ້ງກ່ຽວກັບການປ່ຽນແປງອຳນາດການປົກຄອງ, ລຶບລ້າງທຸກສັນຍາທີ່ໄດ້ເຊັນກັບພວກລ່າເມືອງຂຶ້ນແບບເກົ່າໃນເມື່ອກ່ອນ, ປະກາດໃຊ້ລັດຖະທຳມະນູນສະບັບຊົ່ວຄາວ, ປະກາດໃຊ້ທຸງຊາດສາມສີ ແລະ ປະກາດສ້າງຕັ້ງລັດຖະບານປະສົມຊົ່ວຄາວ; ສະນັ້ນ, ຈຶ່ງເປັນຂີດໝາຍອັນໜຶ່ງທີ່ສຳຄັນໃນປະຫວັດສາດແຫ່ງການຕໍ່ສູ້ ເພື່ອເອກະລາດແຫ່ງຊາດ, ອິດສະຫຼະພາບຂອງປະຊາຊົນລາວ, ໃນນີ້ເປັນເທື່ອທຳອິດທີ່ປະຊາຊົນລາວບັນດາເຜົ່າ ໄດ້ລຸກຂຶ້ນຕໍ່ສູ້ເພື່ອທັບມ້າງແອກປົກຄອງຂອງການເປັນຂ້ອຍຂ້າຂອງພວກລ່າເມືອງຂຶ້ນແບບເກົ່າ, ລຶບລ້າງລະບອບສັກ ດີນາທີ່ປົກຄອງລາວມາໄດ້ຫຼາຍທົດສະຕະວັດ, ເປັນການເປີດເສັ້ນທາງໃຫ້ແກ່ການປະຕິວັດລາວກ້າວເຂົ້າສູ່ໄລຍະໃໝ່; ຈາກໄຊຊະນະດັ່ງກ່າວ, ໄດ້ເຮັດໃຫ້ພັກ ແລະ ປະຊາຊົນລາວ ໄດ້ມີປະສົບການຫຼາຍຢ່າງ, ສ້າງໃຫ້ພັກມີກໍາລັງໃໝ່, ມີທ່ວງທ່າໃໝ່ ແລະ ເພີ່ມຄວາມເຊື່ອໝັ້ນຕໍ່ໄຊຊະນະໃນການຕໍ່ສູ້ຕ້ານພວກລ່າເມືອງຂຶ້ນແບບເກົ່າ ທີ່ກັບຄືນມາຮຸກຮານລາວອີກເທື່ອໃໝ່; ພາລະກິດປົດປ່ອຍຊາດຂອງປະຊາຊົນລາວ ໄດ້ດໍາເນີນໄປຢ່າງພິລາດອາດຫານ ທັງຕໍ່ສູ້ດ້ວຍອາວຸດ, ການເມືອງ, ກົດໝາຍ ແລະ ການຕ່າງປະເທດ ຈົນໄດ້ຮັບໄຊຊະນະແຕ່ລະກ້າວຢ່າງຕໍ່ເນື່ອງ; ສຸດທ້າຍໄດ້ຈັບເອົາກາລະໂອກາດທີ່ ຫວຽດນາມ ແລະ ກຳປູເຈຍ ປົດປ່ອຍຊາດຢ່າງສົມບູນ, ພັກປະຊາຊົນລາວໄດ້ນຳໃຊ້ຍຸດທະສາດ 3 ບາດຄ້ອນ “ບົວບໍ່ໃຫ້ຊໍ້າ ນໍ້າບໍ່ໃຫ້ຂຸ່ນ” ຍາດເອົາໄຊຊະນະຢ່າງສົມບູນ, ລຶບລ້າງລະບອບເກົ່າ ແລະ ສ້າງລະບອບປະຊາທິປະໄຕ ປະຊາຊົນ ຂຶ້ນຢ່າງສະຫງ່າຜ່າເຜີຍໃນວັນ ທີ 2 ທັນວາ 1975.
ໂອກາດນີ້, ທ່ານປະທານພິທີ ຍັງໄດ້ເຜີຍແຜ່ແຈ້ງການຂອງຫ້ອງການເມືອງ ເລກທີ 588/ຫກມ ກ່ຽວກັບດໍາເນີນການຕີລາຄາປະເພດສະມາຊິກພັກ ແລະ ຄັດເລືອກໜ່ວຍພັກປອດໃສເຂັ້ມແຂງໜັກແໜ້ນ ປີ 2024 ແລະ ຄໍາແນະນໍາຂອງກົມໃຫຍ່ການເມືອງປ້ອງກັນຄວາມສະຫງົບ ເລກທີ 3791/ກມປສ ກ່ຽວກັບການຈັດຕັ້ງປະຕິບັດຄໍາສັ່ງແນະນໍາຂອງຄະນະບໍລິຫານງານພັກກະຊວງປ້ອງກັນຄວາມສະຫງົບວ່າດ້ວຍການເພີ່ມທະວີກໍ່ສ້າງໜ່ວຍພັກປອດໃສ ເຂັ້ມແຂງໜັກແໜ້ນ ໃນກໍາລັງປ້ອງກັນຄວາມສະຫງົບ.
