ວິທະຍາຄານການເມືອງປ້ອງກັນຄວາມສະຫງົບ (ວກປສ) ຈັດພິທີປາຖະກະຖາວັນປະກາດເອກະລາດ 12 ຕຸລາ ຄົບຮອບ 79 ປີ ແລະ ປະກາດການຈັດຕັ້ງຂັ້ນພະແນກ ແລະ ພາກວິຊາທີ່ຂຶ້ນກັບວິທະຍາຄານການເມືອງ ໃນວັນທີ 5 ພະຈິກ 2024, ໂດຍການເປັນປະທານຂອງ ພັອ ຊາຍຄອງ ເພັດຊະວົງ ຫົວໜ້າອໍານວຍການ ວກປສ, ມີຮອງຫົວໜ້າອໍານວຍການ, ພະແນກ, ຫ້ອງ, ຄູ-ອາຈານ ແລະ ນັກສຶກສາເຂົ້າຮ່ວມ.
ພັທ ສຸລິເດດ ສັງຄະທິບ ຫົວໜ້າຫ້ອງການເມືອງ ໄດ້ຜ່ານຂໍ້ຕົກລົງວ່າດ້ວຍການອະນຸມັດແຕ່ງຕັ້ງນາຍຕໍາຫຼວດ. ໃນນີ້, ໄດ້ແຕ່ງຕັ້ງ ພັທ ໄຊຍະເລດ ປະຖໍາມະວົງ ເປັນຮອງຫົວໜ້າຫ້ອງການ ແລະ ພັທ ປັນຍາ ພິລາວັນ ເປັນຮອງຫົວໜ້າຫ້ອງພະລາທິການ; ແຕ່ງຕັ້ງບັນດານາຍຕໍາຫຼວດຂຶ້ນເປັນຫົວໜ້າພະແນກ, ຮອງພະແນກ, ຫົວໜ້າພາກວິຊາ ແລະ ຮອງຫົວໜ້າພາກວິຊາ; ເຊິ່ງປະກອບມີ 24 ພະແນກ ແລະ 12 ພາກວິຊາ ທີ່ຂຶ້ນກັບວິທະຍາຄານຄານເມືອງປ້ອງກັນຄວາມສະຫງົບ.
ໂອກາດນີ້, ພັອ ສີເພົ້າ ບຸນບາລິດ ຮອງຫົວໜ້າອໍານວຍການ ວກປສ ໄດ້ຍົກໃຫ້ເຫັນເຖິງຂະບວນການເຄື່ອນໄຫວວັນປະກາດເອກກະລາດໃນວັນທີ 12 ຕຸລາ 1945 ແລະ ການປະກາດເອກະລາດ ໄດ້ເຮັດໃຫ້ຊາວໂລກໄດ້ຮັບຮູ້ກ່ຽວກັບຄວາມເປັນຊາດລາວຂອງພວກເຮົາ ກໍຄືຮັບຮູ້ອະທິປະໄຕ ແລະ ເຂດນ້ຳແດນດິນຂອງປະເທດລາວ.
ພ້ອມດຽວກັນນັ້ນ, ຍັງໄດ້ຮັບຮູ້ລັດຖະບານຊົ່ວຄາວຂອງລາວ ແລະ ຮັບຮູ້ວ່າຊາດລາວ, ຄົນລາວ ກໍເປັນຄົນທີ່ມີກຽດ, ມີສັກສີຄືກັບຄົນຊາດອື່ນໆ ແລະ ມີອິດສະຫຼະພາບເປັນເຈົ້າສະຕາກຳຂອງຕົນເອງ ແລະ ມີການພັດທະນາຕົນເອງ ເພື່ອຄວາມຢູ່ດີກິນດີ ແລະ ມີການພັດ ທະນາຈະເລີນກ້າວໜ້າ.
ຍ້ອນແນວນັ້ນ, ພວກເຮົາຈຶ່ງກຳນົດເອົາວັນທີ 12 ຕຸລາ 1945 ເປັນວັນປະຫວັດສາດທີ່ມີຄວາມສໍາຄັນຂອງຊາດ, ເປັນວັນແຫ່ງຄວາມເອກອ້າງທະນົງໃຈຕໍ່ຄວາມອາດຫານຊານໄຊໃນການຕໍ່ສູ້ບົນຈິດໃຈຍອມຕາຍດີກວ່າຍອມເປັນຂ້ອຍຂ້າ, ຕາຍເພື່ອຄວາມເປັນເອກະລາດ ດີກວ່າຢູ່ພາຍໃຕ້ການປົກຄອງຂອງຕ່າງຊາດ.
ຈາກນັ້ນ, ວັນທີ 12 ຕຸລາ 1945 ຈຶ່ງກາຍເປັນມູນເຊຶ້ອແຫ່ງການຕໍ່ສູ້ມີໄຊຂອງຄົນລາວຜູ້ຮັກ ຊາດ, ເຊິ່ງໄຊຊະນະດັ່ງກ່າວລ້ວນແຕ່ຢູ່ພາຍໃຕ້ການນຳພາ-ຊີ້ນຳຂອງພັກປະຊາຊົນ ປະຕິວັດ ລາວ.ໃນການຈັດຕັ້ງປາຖະກະຖາຄັ້ງນີ້ກໍເພື່ອເຮັດໃຫ້ພະນັກງານ, ສະມາຊິກພັກ, ນາຍ ແລະ ພົນທະຫານ ທົ່ວກົມກອງມີຄວາມຮັບຮູ້ເຊື່ອມຊຶມ ແລະ ເຂົ້າໃຈຢ່າງເລິກເຊິ່ງຕໍ່ກັບວັນສຳ ຄັນດັ່ງກ່າວ ມີຄວາມຈົງຮັກພັກດີຕໍ່ພັກ, ຕໍ່ລັດ, ຕໍ່ປະເທດຊາດ, ເສີມຂະຫຍາຍທາດແທ້ມູນເຊື້ອປະຕິວັດ ແລະ ຕັ້ງໜ້າເຝິກຝົນຫຼໍ່ຫຼອມຕົນເອງ ໃຫ້ມີຄຸນທາດການເມືອງທີ່ໜັກແໜ້ນ, ມີຄຸນສົມບັດສິນທຳປະຕິວັດ ແລະ ກາຍເປັນພະນັກງານຜູ້ສືບທອດທີ່ດີຂອງພັກ ແລະ ພ້ອມກັນສືບຕໍ່ປົກປັກຮັກສາ ແລະ ສ້າງສາປະເທດຊາດໃຫ້ຈະເລີນຮຸ່ງເຮືອງຂຶ້ນໄປເລື້ອຍໆ.
ໃນພິທີ, ຍັງໄດ້ຜ່ານຂໍ້ຕົກລົງວ່າດ້ວຍການມອບໃບກຽດຕິຄຸນ ແລະ ໃບຊົມເຊີຍໃຫ້ພະນັກງານທີ່ອຸປະຖໍາ ແລະ ປຸກລະດົມຊົນຂວາຍບັນດາບໍລິສັດຕ່າງໆມາອຸປະຖໍາໃຫ້ວິທະຍາຄານອີກດ້ວຍ.
