ວັນທີ 31 ຕຸລາ 2024, ທີ່ຜ່ານມານີ້້, ຫ້ອງວ່າການກະຊວງ ປກສ ຮ່ວມກັບ ສະຖາບັນເລືອດແຫ່ງຊາດ ໄດ້ຈັດກິດຈະກຳບໍລິຈາກເລືອດເພື່ອຊ່ວນສັງຄົມ, ໂດຍມີ ພົຈວ ອານຸເດດ ຄູນຄໍາ ຮອງຫົວໜ້າຫ້ອງວ່າການ ກະຊວງ ປກສ, ທ່ານ ນ ຄໍາບູ່ ແສງສຸວັນ ຮອງພະ ແນກກວດວິເຄາະເລືອດ ສະຖາບັນເລືອດແຫ່ງຊາດ, ມີບັນດາຄະນະພັກກົມເສນາຮັກ, ຄະນະພັກ-ຄະນະບັນຊາ, ພ້ອມດ້ວຍນາຍ ແລະ ພົນຕໍາຫຼວດພາຍໃນຫ້ອງວ່າການເຂົ້າຮ່ວມ.
ພົຈວ ອານຸເດດ ຄູນຄໍາ ກ່າວວ່າ: ຈຸດປະສົງໃນການບໍລິຈາກເລືອດໃນຄັ້ງນີ້, ເພື່ອເປັນການສ້າງຂະບວນການ ເນື່ອງໃນໂອກາດສະເຫຼີມສະຫຼອງວັນສໍາຄັນຕ່າງໆຂອງພັກ, ຂອງຊາດເວົ້າລວມເວົ້າສະເພາະເພື່ອຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ VII ຂອງອົງຄະນະພັກຫ້ອງວ່າການກະຊວງ ແລະ ວັນສ້າງກໍາລັງປ້ອງກັນຄວາມສະຫງົບ ຄົບຮອບ 64 ປີ ທີ່ຈະມາເຖິງນີ້, ນອກນັ້ນ, ຍັງເປັນການບໍລິຈາກເລືອດເພື່ອຊ່ວຍເພື່ອນມະນຸດດ້ວຍກັນທີ່ກໍາລັງນອນປິ່ນປົວຢູ່ຕາມໂຮງໝໍແຫ່ງຕ່າງໆ ໃນທົ່ວປະເທດ ພາຍໃຕ້ຄໍາຂວັນທີ່ວ່າ: ໃຫ້ເລືອດໃຫ້ຊີວິດ.
ໃນໂອກາດດັ່ງກ່າວ: ທ່ານ ນ ຄໍາບູ່ ແສງສຸວັນ ຍັງໄດ້ຍົກໃຫ້ເຫັນຄວາມສຳຄັນ ໃນການບໍລິຈາກເລືອດ ເຊິ່ງການຈັດກິດຈະກຳການບໍລິຈາກເລືອດຄັ້ງນີ້ ກໍແມ່ນວຽກງານມະນຸດສະທຳໜຶ່ງທີ່ສັງຄົມໃຫ້ຄວາມສໍາຄັນ ເພາະວ່າຄວາມຕ້ອງການເລືອດ ເພື່ອໃຊ້ເຂົ້າໃນການປິ່ນປົວຄົນເຈັບໃນແຕ່ລະມື້ແມ່ນນັບມື້ສູງຂຶ້ນ ໂດຍສະເພາະແມ່ນເອື້ອຍ-ນ້ອງແມ່ຍິງ ແລະ ເດັກນ້ອຍ, ເຊິ່ງມີອັດຕາສ່ວນການໃສ່ເລືອດຫຼາຍກວ່າໝູ່ຍ້ອນຫຼາຍສາເຫດ ເຊັ່ນ: ການເກີດລູກຜິດປົກກະຕິເສຍເລືອດຫຼາຍ, ພະຍາດຂາດເລືອດຊໍາເຮື້ອ ແລະ ການຜ່າຕັດອື່ນໆ.
ສະນັ້ນ, ຂໍຮຽກຮ້ອງມາຍັງບັນດານາຍ ແລະ ພົນຕໍາຫຼວດ ຜູ້ທີ່ເຄີຍບໍລິຈາກມາແລ້ວ ຈົ່ງເຊີດຊູບົດບາດໃນການສົ່ງເສີມການບໍລິຈາກເລືອດແບບປອດໄພ, ເປັນແບບຢ່າງທີ່ດີໃນການສືບຕໍ່ບໍລິຈາກເລືອດຢ່າງຕໍ່ເນື່ອງສະໝໍ່າສະເໝີ, ທັງເປັນຜູ້ປຸກລະດົມຂົນຂວາຍຄົນອື່ນໃຫ້ມາເຂົ້າຮ່ວມບໍລິຈາກເລືອດໃຫ້ຫຼາຍຂຶ້ນ.
