ກອງປະຊຸມໃຫຍ່ ຄັ້ງທີ 8 ຂອງຄະນະພັກຮາກຖານ ກົມໂຄສະນາອົບຮົມ ກົມໃຫຍ່ການເມືອງ ກະຊວງ ປກສ ໄດ້ຈັດຂຶ້ນໃນວັນທີ 22 ຕຸລາ ນີ້, ພາຍໃຕ້ການເປັນປະທານຂອງ ສະຫາຍ ພັອ ສອນພະຈັນ ທໍາມະວົງ ຄະນະພັກກົມໃຫຍ່ ເລຂາຄະນະ ພັກຮາກຖານ ຫົວໜ້າກົມໂຄສະນາອົບຮົມ ກົມໃຫຍ່ການເມືອງ ປກສ, ເປັນກຽດເຂົ້າຮ່ວມໂດຍ ສະຫາຍ ພົຈວ ຄອນສະ ຫວັນ ສົມພາໄຊ ຄະນະພັກກະຊວງ ຮອງເລຂາຄະນະພັກກົມໃຫຍ່ການເມືອງ ປກສ ມີບັນດາສະຫາຍສະມາຊິກພັກສົມບູນ-ສຳຮອງພາຍໃນກົມດັ່ງກ່າວ ເຂົ້າຮ່ວມ.
ສະຫາຍ ພັອ ສອນພະຈັນ ທໍາມະວົງ ໄດ້ຜ່ານຮ່າງບົດລາຍງານການເມືອງ ເພື່ອສະຫຼຸບຕີລາຄາການນໍາ-ຊີ້ນໍາວຽກງານ ຂອງຄະນະພັກ ໃນໄລຍະ ຜ່ານມາ: ໄດ້ນໍາພາສຶກສາອົບຮົມການເມືອງ-ແນວຄິດໃຫ້ແກ່ສະມາຊິກພັກ ນາຍ ແລະ ພົນຕຳຫຼວດ ເປັນວຽກງານທີ່ນໍາໜ້າຂອງທຸກວຽກງານ ໂດຍຖືເອົາທິດທາງແຜນການຂອງຄະນະພັກກະຊວງ, ກົມໃຫຍ່, ມະຕິ, ຄໍາສັ່ງ ຂອງຄະນະພັກຂັ້ນເທິງ ແລະ ແຜນການວຽກງານວິຊາສະເພາະຂອງກົມໂຄສະນາອົບຮົມມາເປັນເນື້ອໃນສຶກສາອົບຮົມ, ໂດຍສະເພາະແມ່ນໄດ້ເຂົ້າຮ່ວມຄົ້ນຄ້ວາເຊື່ອມຊຶມບັນດາເອກະສານມະຕິຕ່າງໆ ຂອງກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ແລະ ຄັ້ງທີ VI ຂອງອົງຄະນະພັກກົມໃຫຍ່ການເມືອງປ້ອງກັນຄວາມສະຫງົບ, ເອກະສານມູນເຊື້ອຂອງພັກ, ຂອງຊາດ, ຂອງກໍາລັງປ້ອງກັນຄວາມສະຫງົບ ຢ່າງເປັນປົກກະຕິຕໍ່ເນື່ອງ; ເອົາໃຈໃສ່ປັບປຸງກໍ່ສ້າງພັກ ທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງບົນພື້ນຖານ ແລະ ປະຕິບັດຕາມ 5 ຫຼັການ ແລະ 3 ທິດນໍາຂອງພັກ ຢ່າງຖືກຕ້ອງ ແລະ ສອດຄ່ອງກັບສະພາບເງື່ອນໄຂຕົວຈິງໃນແຕ່ລະໄລຍະ ນັບແຕ່ກອງປະຊຸມໃຫຍ່ ຄັ້ງທີ VII ມາຮອດປັດຈຸບັນ ສາມາດຍາດໄດ້ມູນເຊື້ອນາມມະຍົດ: “ໜ່ວຍພັກປອດໃສ, ເຂັ້ມແຂງ, ໜັກແໜ້ນ” 3 ປີ; ພ້ອມນີ້ ພາຍໃນພັກ, ກໍຍັງໄດ້ມີການປັບປຸງ ແລະ ປະຕິບັດລະບອບຮ່ວມຊີວິດພັກຢ່າງເປັນປົກກະຕິ, ເອົາໃຈໃສ່ຕິດຕາມ-ກວດກາ ຂຶ້ນແຜນພະນັກງານສືບທອດໃນແຕ່ລະປີຕາມແຜນການ, ຕິດຕາມ-ກວດກາ ປ້ອງກັນສະມາຊິກພັກ, ນາຍ ແລະ ພົນຕຳ ຫຼວດ, ເອົາໃຈໃສ່ຄົ້ນຄ້ວາຄັດເລືອກນາຍ ແລະ ພົນຕໍາຫຼວດ ໃຫ້ໄປບຳລຸງ-ກໍ່ສ້າງ ທາງດ້ານທິດສະດີ, ວິຊາສະເພາະ, ທັງພາຍໃນ ແລະ ຕ່າງປະເທດ ໄດ້ທັງໝົດມີຈໍານວນ 24 ສະຫາຍ; ຄົ້ນຄ້ວາສະເໜີປັບປຸງບຸກຄະລາກອນ ກົງຈັກແຕ່ລະຂັ້ນ ຈໍານວນ 19 ສະຫາຍ.
ພ້ອມດຽວກັນນີ້ ໃນກອງປະຊຸມ ກໍໄດ້ມີການປ່ອນບັດເລືອກເອົາຄະນະພັກຮາກຖານ ກົມໂຄສະນາອົບຮົມ ປກສ ຊຸດໃໝ່ ໂດຍມີຜູ້ລົງສະໜັກທັງໝົດ 9 ສະຫາຍ ເລືອກເອົາ 7 ສະຫາຍ, ຜ່ານການປ່ອນບັດສາມາດເລືອກໄດ້ ສະຫາຍ ພັອ ສອນພະຈັນ ທໍາມະວົງ ເປັນເລຂາ, ສະຫາຍ ພັທ ກັນນະສຸກ ດວງພະຈັນ ເປັນຮອງເລຂາ, ສະຫາຍ ພັທ ແກ້ວອຸດອນ ວິໄລທອງ ເປັນປະທານກວດກາ ແລະ ອີກ 4 ສະຫາຍ ເປັນຄະນະ.
