ໃນວັນທີ 21 ຕຸລາ 2024, ທີ່ນະຄອນຫຼວງວຽງຈັນ, ກົມສື່ມວນຊົນ ກົມໃຫຍ່ການເມືອງ ກະຊວງປ້ອງກັນຄວາມສະຫງົບ ສປປ ລາວ ໄດ້ພົບປະ-ເຮັດວຽກ ກັບ ຄະນະຮູບເງົາ ກົມສື່ມວນຊົນ ກະຊວງປ້ອງກັນຄວາມສະຫງົບ ສສ ຫວຽດນາມ, ຝ່າຍລາວນຳໂດຍ ພັນເອກ ພອນພິລຸນ ປັນຍາສີລິ ຮອງຫົວໜ້າກົມສື່ມວນຊົນ ປ້ອງກັນຄວາມສະຫງົບລາວ, ຝ່າຍຫວຽດນາມນຳໂດຍ ພັນຈັດຕະວາ ວູ ລຽມ ຮອງຜູ້ອຳນວຍການຮູບເງົາ ກົມສື່ມວນຊົນ ປ້ອງກັນຄວາມສະຫງົບຫວຽດນາມ, ໂດຍມີຄະນະທັງສອງຝ່າຍເຂົ້າຮ່ວມ.
ໃນພິທີ, ພັນເອກ ພອນພິລຸນ ປັນຍາສີລິ ໄດ້ກ່າວສະແດງຄວາມຍິນດີຕ້ອນຮັບຄະນະດັ່ງກ່າວ ແລະ ລາຍງານຫຍໍ້ກ່ຽວກັບການຈັດຕັ້ງປະຕິບັດວຽກງານຂອງກົມສື່ມວນຊົນປ້ອງກັນຄວາມສະຫງົບລາວ ໂດຍຍົກໃຫ້ຮູ້ໂດຍສັງເຂບເປັນຕົ້ນ: ພາລະບົດບາດຂອງກົມສື່ມວນຊົນປ້ອງກັນຄວາມສະຫງົບລາວ ໃຫ້ທາງຄະນະດັ່ງກ່າວໄດ້ຮັບຮູ້.
ໂອກາດດຽວກັນ, ພັນຈັດຕະວາ ວູ ລຽມ ກໍໄດ້ລາຍງານແຜນການເຄື່ອນໄຫວຂອງຄະນະທີ່ເດີນທາງມາເຮັດວຽກຢູ່ ສປປ ລາວ ຄັ້ງນີ້ ແມ່ນເລີ່ມແຕ່ວັນທີ 20-30 ຕຸລາ 2024 ເຊິ່ງການລົງມາພົບປະຢ້ຽມຢາມ ແລະ ເຮັດວຽກໃນຄັ້ງນີ້ ເພື່ອມາຖ່າຍທຳຮູບເງົາ ໜ້າກາກ ແລະ ຂໍຄວາມຊ່ວຍເຫຼືອມາຍັງກົມສື່ມວນຊົນປ້ອງກັນຄວາມສະຫງົບລາວ ອຳນວຍຄວາມສະດວກທາງດ້ານສະພາບ ເປັນຕົ້ນ: ສະຖານທີ່ທາງປະຫວັດສາດທີ່ຍັງຫຼົງເຫຼືອຮັກສາໄວ້ໃນໄລຍະເວລາ ແຕ່ປີ 1957-1977; ອຸປະກອນສະແດງເປັນຕົ້ນ: ພາຫະນະ, ອຸປະກອນເຄື່ອງໃຊ້ຂອງລາວທີ່ນຳໃຊ້ແຕ່ປີ 1957-1977; ເສື້ອຜ້າ ແລະ ເຄື່ອງປະດັບ ແຕ່ປີ 1957-1977; ນັກສະແດງປະກອບຢູ່ທ້ອງຖິ່ນບ່ອນຈັດຕັ້ງຖ່າຍທຳ (ຖ້າມີ) ແລະ ອຳນວຍຄວາມສະດວກປະສານສົມທົບກັບບັນດາແຂວງເປັນຕົ້ນ: ນະຄອນຫຼວງວຽງຈັນ, ຫຼວງພະບາງ ແລະ ແຂວງສະຫວັນນະເຂດ ເພື່ອໃຫ້ການຮ່ວມມີໃນການລົງຖ່າຍທຳຮູບເງົາດັ່ງກ່າວ ກໍຄືຮູບເງົາ ໜ້າກາກ ໃຫ້ໄດ້ຕາມຈຸດປະສົງ ແລະ ເປົາໝາຍທີ່ວາງໄວ້.
ຈາກນັ້ນ, ຄະນະທັງສອງຝ່າຍກໍໄດ້ພົບປະແລກປ່ຽນຄຳຄິດຄວາມເຫັນເຊິ່ງກັນແລະກັນ ພ້ອມທັງເປັນເອກະພາບກັນສ້າງແຜນການຈັດຕັ້ງປະຕິບັດວຽກງານຖ່າຍທຳຮູບເງົາ ໜ້າກາກ ເພື່ອເຮັດໃຫ້ການຈັດຕັ້ງປະຕິບັດວຽກງານຂອງຄະນະຮູບເງົາ ກົມສື່ມວນຊົນ ປ້ອງກັນຄວາມສະຫງົບຫວຽດນາມ ມີປະສິດທິຜົນ, ແທດເໝາະ ແລະ ສອດຄ່ອງກັບຄວາມເປັນຈິງ.
