ພິທີໄດ້ຈັດຂຶ້ນໃນວັນທີ 20 ຕຸລາ 2024, ຢູ່ບ້ານພະໂພ, ເມືອງສີສັດຕະນາກ, ນະຄອນຫຼວງວຽງຈັນ (ກົມໃຫຍ່ພະລາທິການ ກະຊວງປ້ອງກັນຄວາມສະຫງົບ), ໃຫ້ກຽດເຂົ້າ ຮ່ວມມີ ພົນເອກ ວິໄລ ຫຼ້າຄໍາຟອງ ຮອງນາຍົກລັດຖະ ມົນ ຕີ ລັດຖະມົນຕີກະຊວງປ້ອງກັນຄວາມສະຫງົບ, ທ່ານ ປອ ບົວຄົງ ນາມມະວົງ ລັດຖະມົນຕີຫົວໜ້າຫ້ອງວ່າການສຳ ນັກງານນາຍົກລັດຖະ ມົນຕີ, ທ່ານ ຕິ່ງ ຕິ່ງ ປະທານບໍລິສັດ ສຽນເສີງລົງທຶນ ອະສັງຫາລິມະຊັບ ຈຳກັດ ແລະ ທ່ານ ໄກ່ສັກສີ ບົວໃບອ່ອນ ປະທານບໍລິສັດ ລາວມະຫາຊັບ ພັດທະ ນາ ຈຳກັດຜູ້ດຽວ ພ້ອມດ້ວຍບັນດາທ່ານຮອງລັດຖະ ມົນຕີ, ຫົວໜ້າຫ້ອງວ່າການກະຊວງ, ກົມໃຫຍ່, ກົມກອງອ້ອມຂ້າງກະຊວງ, ນະຄອນຫຼວງວຽງຈັນ ຕະຫຼອດຮອດບໍລິສັດຮັບເໝົາກໍ່ສ້າງ ແລະ ແຂກຖືກເຊີນເຂົ້າ ຮ່ວມເປັນສັກຂີພະຍານ.
ພົນຈັດຕະວາ ໜູຈອນ ກ້ອນທອງດຳ ຫົວໜ້າກົມໃຫຍ່ພະລາທິການ ກະຊວງປ້ອງກັນຄວາມສະຫງົບ ຕາງໜ້າໃຫ້ກະຊວງປ້ອງກັນຄວາມສະຫງົບ ກ່າວໃນພິທີວ່າ: ໂຄງການໂຮງແຮມ 5 ດາວ (ລາວເຊັນເຕີ) ໄດ້ເຊັນສັນຍາ ຮ່ວມມື ລະຫວ່າງ ກະຊວງປ້ອງກັນຄວາມສະຫງົບ ຕາງໜ້າໂດຍ ກົມໃຫຍ່ພະລາທິການ ກັບ ບໍລິສັດ ລາວມະຫາຊັບ ພັດທະ ນາ ຈຳກັດຜູ້ດຽວ ໃນວັນ ທີ 26 ຕຸລາ 2023 ຈຸດປະສົງ ເພື່ອພັດທະນາທີ່ດິນເຂດຕຶກເກົ່າ ກົມໃຫຍ່ພະລາທິການ ປກສ ເປັນໂຮງແຮມ 5 ດາວ (ລາວເຊັນເຕີ), ພາຍຫຼັງໄດ້ເຊັນສັນຍາຮ່ວມກັບ ກະຊວງປ້ອງກັນຄວາມສະຫງົບ ແລ້ວ, ໃນເດືອນ ມີນາ 2024 ບໍລິສັດ ລາວມະຫາຊັບ ພັດທະນາ ຈຳກັດຜູ້ດຽວ ໄດ້ເຊັນສັນຍາສຳປະທານນໍາລັດຖະບານ ກໍຄືພະແນກ ແຜນການ ແລະ ການລົງທຶນ ນະຄອນ ຫຼວງວຽງຈັນ ແລະ ຂໍອະນຸຍາດຕ່າງໆໃນການສ້າງຕັ້ງໂຄງການນໍາຂະແໜງການ ກ່ຽວຂ້ອງ ຖືກຕ້ອງຕາມກົດໝາຍ ແລະ ລະ ບຽບການ.
ຈາກນັ້ນ, ຮອດເດືອນ ເມສາ 2024, ບໍລິສັດ ລາວມະຫາຊັບ ພັດທະນາ ຈຳກັດຜູ້ດຽວ ແລະ ບໍລິສັດ ສຽນເສີງ ລົງ ທຶນ ອະສັງຫາລິມະຊັບ ຈຳກັດ (ບໍລິສັດຂາຮຸ້ນ) ໄດ້ຮ່ວມທຶນກັນສ້າງຕັ້ງ ບໍລິສັດ ສຽນເສີງໜຶ່ງ ຈຳກັດ ຂຶ້ນໃໝ່ ເພື່ອເປັນບໍລິສັດ ບໍລິຫານສ່ວນກາງຂອງໂຄງການນີ້; ໂຄງການໂຮງແຮມ 5 (ລາວເຊັນເຕີ) ແມ່ນ ຜົນງານຂອງກຸ່ມບໍລິດສັດສຽນເສີງ, ໂຄງການລາວເຊັນເຕີ ມີຄວາມສູງ 155 ແມັດ ມີກິດຈະກໍາດັ່ງນີ້: ຄອນໂດ, ໂຮງແຮມ, ສະໂມສອນຊັ້ນດາດຟ້າ, ສະລອຍນໍ້າລອຍຟ້າ, ສິ່ງອໍາ ນວຍຄວາມສະດວກ, ເຊິ່ງເປັນການເປີດກວ້າງ ປະສົບການຊີວິດແບບໃໝ່.
ໃນວາລະດຽວກັນ, ບັນດາການນຳ ແລະ ແຂກທີ່ເຂົ້າຮ່ວມ ໄດ້ໃຫ້ກຽດຕັດລິບບິ້ນ ແລະ ຮ່ວມວາງສີລາລຶກໂຄງການໂຄງການ ໂຮງແຮມ 5 ດາວ (ແຮມລາວເຊັນເຕີ້) ຢ່າງເປັນທາງການ.
