ໃນວັນທີ 10 ຕຸລາ 2024, ກົມໃຫຍ່ພະລາທິການ ປກສ ໄດ້ຈັດພິທີເປີດຊຸດຮຽນບຳລຸງວຽກງານເສນາພະລາ ປກສ ຊຸດທີ 2 ໃຫ້ນາຍຕໍາຫຼວດພະລາທິການ ປກສ ໃນຂອບ ເຂດທົ່ວປະເທດ ຢູ່ສະໂມສອນສູນຝຶກອົບຮົມວິຊາສະ ເພາະປະກອບອາວຸດ ແລະ ພະລາທິການ, ໂດຍການເປັນປະທານຂອງ ພົທ ກົງທອງ ພົງພິຈິດ ກຳມະການສູນກາງພັກ ຮອງລັດຖະມົນຕີ ກະຊວງ ປກສ, ທ່ານ ພົຕ ສຸວັນນີ ສີສຸພາບມີໄຊ ຫົວຫນ້າກົມໃຫຍ່ການເມືອງ ປກສ, ມີທ່ານຮອງຫົວຫນ້າກົມໃຫຍ່ພະລາທິການ ປກສ, ຮອງຫົວຫນ້າກົມໃຫຍ່ພະລາທິການກອງທັບ, ຫົວຫນ້າອຳນວຍການວິທະຍາຄານພະລາທິການກອງທັບ, ຄະນະຫ້ອງ, ກົມ, ກອງ ແລະ ທຽບເທົ່າ ທີ່ຂຶ້ນກັບກົມໃຫຍ່ພະລາທິການ ປກສ, ຄູ-ອາຈານ ພ້ອມດ້ວຍນັກສຶກສາເຂົ້າຮ່ວມ.
ພົຈວ ສີສຸວັນ ທອງປະເສີດ ໄດ້ລາຍງານຫຍໍ້ຂອງຄະນະຮັບຜິດຊອບເປີດຊຸດບໍາລຸງລະບົບ 5 ເດືອນ ໃຫ້ນາຍຕໍາຫຼວດພະລາທິການ ປກສ ວ່າ: ການເປີດຮຽນບໍາລຸງວຽກ ງານເສນາພະລາຊຸດນີ້ ເປົ້າໝາຍແມ່ນເປີດບຳລຸງໃຫ້ແກ່ນາຍຕໍາຫຼວດທີ່ເຮັດວຽກງານພະລາທິການ ຢູ່ບັນດາກົມກອງອ້ອມຂ້າງກະຊວງ, ປກສ ແຂວງ-ນະຄອນຫຼວງ ໃນທົ່ວປະເທດ ຈຳນວນ 60 ສະ ຫາຍ; ສຳລັບການສອນແມ່ນຄົ້ນຄວ້າໝວດພື້ນຖານວິຊາສະເພາະມີ 200 ຊົ່ວໂມງ ແລະ ວິຊາສະເພາະເສນາພະລາ 380 ຊົ່ວໂມງ ເຊິ່ງໄດ້ເລີ່ມຕົ້ນເຂົ້າຮຽນແຕ່ວັນທີ 01 ຕຸລາ 2024 ຜ່ານມາ ແລະ ຄາດກະການປິດຮຽນແມ່ນ ວັນທີ 28 ກຸມພາ 2025.
ພົທ ກົງທອງ ພົງພິຈິດ ໄດ້ຊີ້ນຳວ່າ: ສໍາລັບຄູອາ ຈານ ແລະ ຄະນະຮັບຜິດຊອບ ຕ້ອງໄດ້ຍົກສູງຄວາມຮັບຜິດຊອບການເມືອງຂອງຕົນ ເຂົ້າໃນການຄົ້ນ ຄວ້າ ແລະ ແຕ່ງບົດສອນ ຂຶ້ນຫ້ອງ, ຕ້ອງພະຍາຍາມຖ່າຍທອດຄວາມຮູ້, ຄວາມສາມາດ ທາງດ້ານທິດສະດີ, ຫຼັກການ ແລະ ບົດ ຮຽນຈາກພຶດຕິກໍາຕົວຈິງຢູ່ພາຍໃນ ແລະ ຕ່າງປະເທດ ໃຫ້ນັກສຶກສາຮັບຮູ້ຢ່າງເປັນລະບົບຄົບຊຸດ, ຕ້ອງເອົາໃຈໃສ່ໃກ້ສິດຕິດແທດ ນັກສຶກສາ ແລະ ນໍາພານັກສຶກສາປະຕິບັດຂໍ້ກໍານົດລະບຽບການຕ່າງໆ ຢ່າງເຂັ້ມງວດ; ໃນນັ້ນ, ນັກສຶກສາ ທີ່ໄດ້ມາບໍາລຸງໃນຄັ້ງນີ້ ຕ້ອງໄດ້ພ້ອມກັນເອົາໃຈໃສ່ຢ່າງຕັ້ງໜ້າໃນການຄົ້ນຄວ້າຮໍ່າຮຽນ, ກໍາແໜ້ນບັນດາບົດຮຽນຕ່າງໆ ເອົາໃຈໃສ່ຮັກສາຄວາມສາມັກຄີພາຍໃນ ແລະ ພາຍນອກ, ເອົາໃຈໃສ່ຮັກສາສຸຂະພາບຕົນໃຫ້ແຂງແຮງດີຢູ່ສະເໝີ ເພື່ອຮັບປະ ກັນໃຫ້ແກ່ການສຶກສາຮໍ່າຮຽນ ຈົບຫຼັກສູດຕາມແຜນການທີ່ວາງໄວ.
