ໃນວັນທີ 5 ຕຸລາ 2024, ທ່ານ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ, ລັດຖະ ມົນຕີ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ເຄື່ອນໄຫວຕິດຕາມຊຸກຍູ້ການຟື້ນຟູຜົນກະທົບ ຈາກໄພພິບັດນໍ້າຖ້ວມ ພາຍຫຼັງທີ່ເກີດໄພພິບັດນໍ້າຖ້ວມຢູ່ ແຂວງບໍ່ແກ້ວ ຕອນຮັບໂດຍທ່ານ ປອ ທອງຈັນ ມະນີໄຊ ເຈົ້າແຂວງໆບໍ່ແກ້ວ ພ້ອມຄະນະ ແລະ ພາກສ່ວນກ່ຽວຂ້ອງຂອງແຂວງ ເຂົ້າຮ່ວມ.
ການເຄື່ອນໄຫວຕິດຕາມຊຸກຍູ້ການຟື້ນຟູຜົນກະທົບຈາກໄພພິບັດນໍ້າຖ້ວມຄັ້ງນີ້ ເພື່ອເປັນການຕິດຕາມຊຸກຍູ້ການຟື້ນຟູ ແລະ ແກ້ໄຂຜົນກະທົບຈາກໄພພິບັດນໍ້າຖ້ວມ ພາຍຫຼັງທີ່ເກີດໄພພິບັດນໍ້າຖ້ວມຢູ່ແຂວງບໍ່ແກ້ວ ໂດຍສະເພາະການຊ່ວຍເຫຼືອປະຊາຊົນໃນດ້ານເຄື່ອງອຸປະ ໂພກ-ບໍລິໂພກ, ການຕິດຕາມເບິ່ງແຍງດູແລສຸຂະພາບ ແລະ ສຸຂະອານາໄມຂອງປະຊາຊົນ ກໍ່ຄືຜູ້ປະສົບໄພ; ການປັບປຸງ-ສ້ອມແປງໂຄງລ່າງພື້ນຖານ ເປັນຕົ້ນແມ່ນ ລະບົບເສັ້ນທາງ, ຂົວ, ລະບົບຊົນລະປະທານ, ລະບົບນໍ້າປະປາ, ສຳນັກງານຫ້ອງການ ແລະ ອື່ນໆ ທີ່ເປ່ເພເສຍຫາຍ ໃຫ້ສາມາດກັບມານໍາໃຊ້ໄດ້ເປັນປົກກະຕິໂດຍໄວ.
ໃນໂອກາດນີ້, ທ່ານ ຮອງນາຍົກລັດຖະມົນຕີ ຍັງໄດ້ລົງເຄື່ອນໄຫວໄປຢ້ຽມຢາມ, ພົບປະໂອ້ລົມ ແລະ ມອບເຄື່ອງຊ່ວຍເຫຼືອໃຫ້ແກ່ປະຊາຊົນທີ່ຖືກຜົນກະທົບ ຈາກໄພພິບັດ ຄັ້ງນີ້ ຢູ່ເທດສະບານເມືອງຜາອຸດົມ ແລະ ເມືອງປາກທາ ແຂວງບໍ່ແກ້ວ ພ້ອມທັງໄດ້ນຳເອົາຄວາມຢ້ຽມຢາມຖາມຂ່າວ, ຄວາມເປັນຫ່ວງເປັນໄຍ ແລະ ເຫັນອົກເຫັນໃຈຈາກສູນກາງພັກ, ລັດຖະ ບານ ແລະ ກະຊວງປ້ອງກັນຄວາມສະຫງົບ ມາຍັງປະຊາຊົນບັນດາເຜົ່າ ພາຍໃນແຂວງບໍ່ແກ້ວ ໂດຍສະເພາະ ຜູ້ປະສົບໄພນໍ້າຖ້ວມ.
ໂອກາດນີ້, ທ່ານ ພົອ ວິໄລ ຫຼ້າຄໍາຟອງ ໄດ້ມອບເຄື່ອງບັນເທົາທຸກ ໃຫ້ພາກສ່ວນທີ່ໄດ້ຮັບຜົນກະທົບຈາກໄພພິບັດ. ໃນນີ້, ມອບເງິນສົດໃຫ້ອົງການປົກຄອງແຂວງບໍ່ແກ້ວຈໍານວນ 1.000.000.000 ກີບ (ໜຶ່ງຕື້ກີບ), ກອງບັນຊາການປ້ອງກັນຊາດ-ປ້ອງກັນຄວາມສະຫງົບ ພາກສ່ວນລະ 100.000.000 ກີບ(ໜຶ່ງຮ້ອຍລ້ານກີບ), ເມືອງຜາອຸດົມ 200.000.000 ກີບ (ສອງຮ້ອຍລ້ານກີບ), ພ້ອມດ້ວຍເຂົ້າສານ ສອງໂຕ່ນ, ຜ້າຫົ່ມ 50 ຜືນ, ເຄື່ອງນຸ່ງຫົ່ມ 26 ເປົາ ແລະ ເຄື່ອງບໍລິໂພກຈຳນວນ 4 ແກັດ; ມອບໃຫ້ເມືອງປາກທາ ເງິນສົດຈໍານວນ 100 ລ້ານກີບ, ເຂົ້າສານ 2 ໂຕ່ນ, ຜ້າຫົ່ມ 50 ຜືນ, ເຄື່ອງນຸ່ງຫົ່ມ 13 ເປົາ ແລະ ເຄື່ອງບໍລິໂພກຈໍານວນໜຶ່ງ.
