ໃນວັນທີ 2 ຕຸລາ 2024, ກອງບັນຊາການປ້ອງກັນທີ່ຕັ້ງ ກະຊວງ ປກສ ຈັດກອງປະຊຸມຜ່ານແຜນປ້ອງກັນ ກອງປະຊຸມສຸດຍອດອາຊຽນ ຄັ້ງທີ 44 ແລະ 45, ເປັນປະທານຂອງ ພັອ ກິຕັນ ໄພໂລດ ຮອງຫົວຫນ້າກອງບັນຊາການປ້ອງກັນທີ່ຕັ້ງ, ມີພະນັກງານ 4 ຫ້ອງ, 3 ກອງພັນ,ກອງເອກະລາດ ແລະສູນຝຶກວິຊາສະເພາະປ້ອງກັນທີ່ຕັ້ງ ເຂົ້າຮ່ວມ.
ພັທ ດວງສະຫມອນ ອຸລະມະນີວົງ ຫົວຫນ້າຫ້ອງເສນາທິການ ໄດ້ຜ່ານແຜນປ້ອງກັນກອງປະຊຸມສຸດຍອດອາຊຽນຄັ້ງທີ44,45 ທີ່ ສປປ ລາວ ເປັນເຈົ້າພາບ ທີ່ຈະຈັດຂື້ນໃນລະຫວ່າງວັນທີ 6 – 12 ຕຸລາ 2024 ນີ້: ໂດຍປະຕິບັດຕາມແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກໃຫ້ປະກົດຜົນເປັນຈິງ, ການຈັດກອງປະຊຸມຄັ້ງນີ້ກໍເພື່ອເປັນການກະກຽມຄວາມພ້ອມໃຫ້ຮອບດ້ານ ໃນກຳລັງປ້ອງກັນທີ່ຕັ້ງເພື່ອແນໃສ່ຮັບປະກັນໃນການກະກຽມ ແລະ ດຳເນີນການປ້ອງກັນໃນຂອບເຂດທີ່ຕົນເອງຮັບຜິດຊອບໃຫ້ມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ, ມີຄວາມປອດໄພສູງສຸດ ເພື່ອຢັ້ງຢືນເຖິງຄວາມສະຫງົບໃນດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ.
ພັອ ກິຕັນ ໄພໂລດ ຮ້ອງຫົວຫນ້າກອງບັນຊາການ ໄດ້ເນັ້ນຫນັກພະນັກງານນັກຮົບທົ່ວກຳລັງປ້ອງກັນທີ່ຕັ້ງທຸກສະຫາຍໃຫ້ເອົາໃຈໃສ່ໃນການປ້ອງກັນເວນຍາມຕະຫລອດ 24 ຊົ່ວໂມງຢ່າງເຂັ້ມງວດ ເພື່ອເຮັດໃຫ້ຈຸດທີ່ຕັ້ງຂອບເຂດຄວາມຮັບຜິດຊອບມີຄວາມສະຫງົບປອດໄພ100%.
