ກອງປະຊຸມສະພາວິທະຍາສາດປ້ອງກັນຄວາມສະຫງົບ ຂັ້ນກະຊວງ ຄັ້ງທີ 3 ໄດ້ຈັດຂຶ້ນໃນວັນທີ 2 ຕຸລາ 2024, ທີ່ກົມຄົ້ນຄວ້າວິທະຍາສາດ ແລະ ປະຫວັດສາດ ປກສ, ໂດຍການເປັນປະທານຂອງ ພົທ ກົງທອງ ພົງວິຈິດ ຮອງລັດຖະມົນຕີ ປະທານສະພາວິທະຍາສາດປ້ອງກັນຄວາມສະຫງົບ, ມີ ພັອ ປອ ຄຳແຝງ ວັນດີໄຊ ຫົວໜ້າກົມຄົ້ນຄວ້າວິທະຍາສາດ ແລະ ປະຫວັດ ສາດ ປກສ, ທັງເປັນຮອງປະທານ ຜູ້ປະຈຳການສະພາວິທະຍາສາດ ປກສ, ມີບັນດາປະທານ-ຮອງປະທານ ແລະ ນັກວິທະ ຍາສາດອ້ອມຂ້າງກະຊວງປ້ອງກັນຄວາມສະ ຫງົບ ເຂົ້າຮ່ວມ.
ພົທ ກົງທອງ ພົງວິຈິດ ໄດ້ກ່າວວ່າ: ຈຸດປະສົງໃນການຈັດກອງປະຊຸມໃນຄັ້ງໃນນີ້, ກໍເພື່ອເປັນການສະຫຼຸບຕີລາຄາຄືນຜົນການຈັດຕັ້ງປະຕິບັດວຽກງານສະພາວິທະຍາສາດປ້ອງກັນຄວາມສະຫງົບ ໃນໄລຍະ 3 ປີຜ່ານມາ ທີ່ສະພາວິທະຍາສາດປ້ອງກັນຄວາມສະຫງົບຮັບ ຮອງເອົາໃນກອງປະຊຸມ ຄັ້ງທີ II ແລະ ວາງທິດທາງແຜນການວຽກງານຈຸດສຸມໃນຕໍ່ໜ້າ ເຮັດໃຫ້ການເຄື່ອນໄຫວຂອງວຽກງານສະພາວິທະຍາສາດມີການຫັນປ່ຽນໃໝ່ ແລະ ເປັນລະບົບ, ມີການຈັດຕັ້ງທີ່ໜັກແໜ້ນເຂັ້ມແຂງ ສາມາດເຮັດສຳເລັດໜ້າທີ່ໃນການເປັນເສນາ ທິການໃຫ້ແກ່ກະຊວງປ້ອງກັນຄວາມສະຫງົບ ສາມາດຈັດຕັ້ງປະຕິບັດ ແລະ ຜັນຂະຫຍາຍເຂົ້າສູ່ຊີວິດຕົວຈິງ ຢ່າງມີປະສິດທິຜົນສູງ.
ຈາກນັ້ນ, ໃນກອງປະຊຸມຍັງໄດ້ ຜ່ານຂໍ້ຕົກລົງປະກາດການຈັດຕັ້ງຂອງສະພາວິທະຍາສາດປ້ອງກັນຄວາມສະຫງົບ ຜ່ານບົດສະຫຼຸບການເຄື່ອນໄຫວວຽກງານສະພາວິທະຍາສາດປ້ອງ ກັນຄວາມສະຫງົບ ໄລຍະ 3 ປີ(2022-2024) ແລະ ທິດທາງແຜນ ການປີ 2025-2028 ແລະ ຜູ້ເຂ ົ້າຮ່ວມໄດ້ພ້ອມກັນປຶກສາຫາລື, ປະກອບຄໍາຄິດຄໍາເຫັນໃສ່ບົດສະຫຼຸບ, ທິດທາງແຜນການ, ວຽກງານຈຸດສຸມໃນຕໍ່ໜ້າ ເພື່ອເຮັດໃຫ້ການເຄື່ອນໄຫວວຽກງານຂອງສະພາວິ ທະຍາສາດປ້ອງກັນຄວາມສະຫງົບ ມີການຫັນປ່ຽນໃໝ່, ໂລ່ງລ່ຽນ, ເປັນລະບົບ ແລະ ມີປະສິດທິພາບສູງ, ມີການຈັດຕັ້ງທີ່ໜັກແໜ້ນ ເຂັ້ມແຂງກວ່າເກົ່າ.
ໂອກາດນີ້, ພົທ ກົງທອງ ພົງວິຈິດ ຮອງລັດຖະມົນຕີ ປະທານສະພາວິທະຍາສາດ ປກສ ກໍໄດ້ເນັ້ນໜັກໃຫ້ຄະນະພັກ-ຄະນະບັນຊາ ແລະ ບັນດານັກວິທະຍາສາດ ຈົ່ງໃຫ້ຄວາມສໍາຄັນຕໍ່ວຽກງານຄົ້ນຄວ້າວິທະຍາສາດ ປກສ ສູງຂຶ້ນກວ່າເກົ່າ, ພ້ອມກັນນໍາໄປຈັດຕັ້ງປະຕິບັດຢ່າງມີແຜນການອັນລະອຽດ, ມີຜູ້ຮັບຜິດຊອບ, ມີການຕິດຕາມກວດກາ ແລະ ສະຫຼຸບຖອດ ຖອນບົດ ຮຽນເປັນແຕ່ລະໄລຍະ; ເອົາໃຈໃສ່ ປະຕິບັດຕາມພາລະບົດບາດການຈັດຕັ້ງ ແລະ ການເຄື່ອນໄຫວຂອງສະພາວິທະຍາສາດປ້ອງກັນຄວາມສະຫງົບ ທີ່ກຳນົດໄວ້, ເອົາໃຈໃສ່ເຂົ້າຮ່ວມກອງປະຊຸມສະພາວິທະຍາສາດປ້ອງກັນຄວາມສະຫງົບ ຄົ້ນຄວ້າຮັບຮອງເອົາຫົວຂໍ້ວິທະຍາສາດ ແລະ ນິຕິກຳຕ່າງໆ ເຊັ່ນ: ກາໝາຍໂລໂກ້ເຫຼົ່າວິຊາສະເພາະຂອງບັນດາກົມກອງອ້ອມຂ້າງກະຊວງ ແລະ ທ້ອງຖິ່ນ, ຄົ້ນຄວ້າຂຽນບົດຍຸດທະສາດ ແລະ ວິທະຍາສາດປ້ອງກັນຄວາມສະຫງົບ ທີ່ກະຊວງໄດ້ຕົກລົງໃຫ້ຄົ້ນຄວ້າຂຽນ ເພື່ອຮັບໃຊ້ເຂົ້າໃນວຽກງານວິຊາສະເພາະຂອງກົມກອງ, ການກໍ່ສ້າງ ແລະ ພັດທະນາກໍາລັງປ້ອງກັນຄວາມສະຫງົບ ໃນສະເພາະໜ້າ ແລະ ຍາວນານ, ຄົ້ນຄວ້າບັນດານິຕິກຳຕ່າງໆ ເພື່ອຮັບໃຊ້ໃຫ້ແກ່ການເຄື່ອນ ໄຫວສະພາວິທະຍາ ສາດ ປ້ອງກັນຄວາມສະຫງົບ, ສະເໜີໃຫ້ຄະນະພັກ-ຄະນະນໍາກະຊວງ, ບັນດາກົມກອງອ້ອມຂ້າງກະຊວງ ແລະ ທ້ອງຖິ່ນ ເພື່ອອໍານວຍຄວາມສະດວກໃຫ້ແກ່ການເຄື່ອນໄຫວຂອງສະພາວິທະຍາສາດປ້ອງກັນຄວາມສະຫງົບ ໃຫ້ໄດ້ຮັບໝາກຜົນສູງ, ປະ ສານສົມທົບແຕ່ລະພາກສ່ວນທີ່ກ່ຽວຂ້ອງ ເພື່ອເຕົ້າໂຮມກຳລັງແຮງສັງລວມ ເຮັດຫຼ້ອນໜ້າທີ່ຂອງຕົນ ແລະ ການຊີ້ນໍາຂອງຂັ້ນເທິງ ແລະ ແຜນການໂຄງການ, ເຊິ່ງເປັນມະຕິກອງປະຊຸມນີ້ຈະໄດ້ຮັບການຈັດຕັ້ງປະຕິບັດດ້ວຍຄວາມຮັບຜິດຊອບສູງ; ເພື່ອນໍາເອົາຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍທາງສັງຄົມ ຮັບປະກັນເຮັດສຳເລັດໜ້າທີ່ການ ເມືອງທີ່ພັກ-ລັດມອບໝາຍ.
