ພົຈວ ແກ່ນຈັນ ພົມມະຈັກ ຫົວໜ້າກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກ ຖານ ກະຊວງ ປກສ ທັງເປັນ ຄະນະຊີ້ນໍາກໍ່ສ້າງຮາກຖານການເມືອງ ນະຄອນຫຼວງວຽງຈັນ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ກຸ່ມສີວິໄລ ເມືອງໄຊທານີ ນະຄອນຫຼວງວຽງຈັນ ໃນວັນທີ 30 ກັນຍາ 2024, ມີ ປກສ ກຸ່ມບ້ານ, ອຳນາດການປົກຄອງ ທັງ 7 ບ້ານ ທີ່ຂຶ້ນກັບ ກຸ່ມສີວິໄລ ເຂົ້າຮ່ວມ.
ທ່ານ ບຸນມາ ຫຼວງລາດ ເລຂາພັກບ້ານ ນາຍບ້ານສີວິໄລ ກ່າວວ່າ: ໃນໄລຍະກະກຽມຄວາມພ້ອມໃຫ້ແກ່ ກອງປະຊຸມສຸດຍອດອາຊຽນ ຄັ້ງທີ 44-45 ທີ່ ສປປ ລາວ ເປັນເຈົ້າພາບ ທີ່ຈະຈັດຂຶ້ນໃນມໍ່ໆນີ້ ເຊິ່ງອໍານາດການປົກຄອງບ້ານສີວິໄລ ໄດ້ໂຄສະ ນາປຸກລະດົມໃຫ້ປະຊາຊົນທຸກຊັ້ນຄົນພາຍໃນບ້ານ ມີຄວາມຕື່ນຕົວເປັນເຈົ້າການປະສ່ວນເຂົ້າໃນວຽກງານປ້ອງກັນຄວາມສະຫງົບຢ່າງແຂງແຮງ, ທຸກພາກສ່ວນໄດ້ພ້ອມ ກັນເອົາໃຈໃສ່ເພີ່ມທະວີແບ່ງຄວາມຮັບຜິດຊອບ ເປັນຕົ້ນ ນໍາພາຈັດຕັ້ງລະບອບປະ ຈຳການຕະຫຼອດ 24 ຊົ່ວໂມງ, ນໍາພາກຳລັງ ປກຊ-ປກສ ເຄື່ອນໄຫວເຮັດໜ້າທີ່ ແລະ ສົມທົບກັບ ປກສ ກຸ່ມ, ກຳລັງຂອງທະຫານເມືອງ ອອກກວດກາລາດຕະເວນຕາມຂອບເຂດຂອງບ້ານ ພ້ອມແບ່ງເປັນ 3 ຈຸຮັບຜິດຊອບລະອຽດ ຄື: ຈຸດທີ 1: ປະຈໍາຢູ່ຫ້ອງການບ້ານ, ຈຸດທີ 2: ຢູ່ຫໍສະໝຸດແຫ່ງຊາດ, ສ່ວນຈຸດທີ 3: ເສັ້ນທາງອ້ອມຫ້ອງວ່າການສູນກາງພັກ ແມ່ນມອບໃຫ້ ທະຫານກອງພັນ 793 ຮັບຜິດຊອບ, ສ່ວນການເຄື່ອນໄຫວກວດກາ ແມ່ນເລັ່ງໃສ່ການກວດກາເກັບກໍາຄົນພັກເຊົາຕາມຫ້ອງແຖວເຮືອນເຊົ່າ, ການມາພັກເຊົາມີຈຸດປະສົງແນວໃດ, ພ້ອມແນະນໍາປະກອບເອກະ ສານຢ່າງຖືກຕ້ອງ, ຖ້າມີການສົງໄສ ແມ່ນຈະໄດ້ປະສານສົມທົບກັບພາກສ່ວນກ່ຽວ ຂ້ອງກວດກາຢ່າງລະອຽດ, ກໍລະນີພົບເຫັນຜູ້ລະເມີດ ຈະໄດ້ນໍາມາສຶກສາອົບຮົມ, ຖ້າຮ້າຍແຮງແມ່ນສົ່ງໃຫ້ ກອງບັນຊາການ ປກສ ເມືອງໄຊທານີ ດໍາເນີນຕາມຂັ້ນຕອນລະບຽບກົດໝາຍ. ທັງນີ້, ກໍເພື່ອແກ້ໄຂບັນຫາປະກົດການຫຍໍ້ທໍ້ ບັນຫາທີ່ຈະກໍ່ໃຫ້ເກີດຄວາມບໍ່ສະຫງົບໄດ້ຢ່າງທັນການ.
ພົຈວ ແກ່ນຈັນ ພົມມະຈັກ ໄດ້ຍ້ອງຍໍຊົມເຊີຍຕໍ່ການເອົາໃຈໃສ່ຕໍ່ອໍານາດກາປົກຄອງບ້ານ ທັງ 7 ບ້ານທົ່ວກຸ່ມສີວິໄລ ໃນການປະກອບສ່ວນເຮັດວຽກງານປ້ອງກັນຊາດປ້ອງກັນຄວາມສະຫງົບ. ພ້ອມນີ້, ທ່ານຍັງໄດ້ເນັ້ນໜັກອໍານາດການປົກຄອງບ້ານ ທັງ 7 ບ້ານ ສືບຕໍ່ເຮັດວຽກງານການເມືອງແນວຄິດໃຫ້ບັນດາອົງການຈັດຕັ້ງ ແລະ ພໍ່-ແມ່ປະຊາຊົນພາຍໃນບ້ານ ໃຫ້ມີຄວາມເຂົ້າໃຈ ແລະ ເປັນເຈົ້າການປະຕິບັດຂໍ້ກຳນົດກົດລະບຽບຂອງຂັ້ນເທິງວາງອອກ, ຮ່ວມກັນເປັນເຈົ້າພາບທີ່ດີໃນກອງປະຊຸມສຸດຍອດອາຊຽນ ຄັ້ງນີ້ ໃຫ້ມີຄວາມສະຫງົບປອດໄພ, ສືບຕໍ່ເຮັດວຽກງານໂຄສະນາປຸກລະດົມໃຫ້ປະຊາຊົນທຸກຊັ້ນຄົນພາຍໃນບ້ານ ໃຫ້ຮັບຮູ້ເຂົ້າໃຈ ແລະ ເຫັນໄດ້ຄວາມໝາຍຄວາມສໍາຄັນ ພ້ອມກັນປະກອບສ່ວນເຮັດວຽກງານປ້ອງກັນຄວາມສະຫງົບຢ່າງແຂງແຮງ, ສືບຕໍ່ລົງກວດກາ ແລະ ເຮັດບົດບັນທຶກສັນຍາປ້ອງກັນຄວາມສະຫງົບກັບບັນດາຄອບຄົວ, ຫ້າງຮ້ານ ແລະ ຫົວໜ່ວຍທຸລະກິດ ໃຫ້ສໍາເລັດ. ທັງນີ້, ເພື່ອຮັບປະກັນໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 44-45 ທີ່ຈະຈັດຂຶ້ນໃນມໍ່ໆນີ້ ມີຄວາມສະຫງົບປອດໄພ 100%.
