ນາຍ ແລະ ພົນຕຳຫຼວດ ທີ່ສໍາເລັດການສຶກສາຈາກຕ່າງປະເທດ ໄດ້ສຳເລັດການຝຶກອົບຮົມວຽກງານການເມືອງ ໃນວັນທີ 20 ກັນຍາ 2024 ພາຍຫຼັງທີ່ໄດ້ດຳເນີນມາເປັນເວລາ 3 ວັນ ໂດຍການເປັນປະທານ ແລະ ປະດັບຊັ້ນຂອງ ພົຕ ປອ ສຸວັນນີ ສີສຸພາບມີໄຊ ຫົວໜ້າກົມໃຫຍ່ການເມືອງປ້ອງກັນຄວາມສະຫງົບ, ມີຄະນະພັກ, ຄະນະກົມໃຫຍ່, ຄະນະຮັບຜິດຊອບການຈັດຊຸດຝຶກອົບຮົມ, ພ້ອມດ້ວຍວິທະຍາກອນ ແລະ ນັກສຶກສາເຂົ້າຮ່ວມ.
ພັທ ໂພຄຳ ໄຊຍະປະເສີດ ຮອງຫົວໜ້າກົມກໍ່ສ້າງກຳລັງ ປກສ ກ່າວວ່າ: ນັກສຶກສາທີ່ສໍາເລັດການ ສຶກສາລະດັບປະລິນຍາຕີຈາກຕ່າງປະເທດມີທັງໝົດ 30 ສະຫາຍ ຍິງ 11 ສະຫາຍ ແລະ ຜ່ານການຝຶກອົບຮົມເຫັນໄດ້ວ່າ ແຕ່ລະສະຫາຍ ແມ່ນມີແນວຄິດໜັກແໜ້ນຕໍ່ອຸດົມການສັງຄົມນິຍົມ, ເອົາໃຈໃສ່ຄົ້ນຄວ້າຮໍ່າຮຽນຢ່າງຕັ້ງໜ້າໃນການເຊື່ອມຊຶມບັນດາມະຕິຄຳສັ່ງ, ລບຽບກົດໝາຍຄຸນສົມບັດສິນທຳປະຕິວັດ ແລະ ມູນເຊື້ອອັນດີງາມ ເວົ້າລວມ ເວົ້າສະເພາະກໍຄືລະບຽບຂອງກຳລັງປ້ອງກັນຄວາມສະຫງົບວາງອອກຢ່າງເຂັ້ມງວດ ພ້ອມນີ້, ຕະຫຼອດໄລຍະທີ່ສຶກສາຢູ່ຕ່າງປະເທດ ກໍໄດ້ສຸມໃສ່ຮໍ່າຮຽນຢ່າງຫ້າວຫັນເຂົ້າໃນການຄົ້ນຄວ້າຮໍ່າຮຽນ, ຖືເອົາການຮຽນເປັນໜ້າທີ່ສໍາຄັນຕົ້ນຕໍ, ເປັນເຈົ້າການຊອກຮູ້ຮໍ່າຮຽນດ້ານພາສາ ແລະ ວິຊາສະ ເພາະ ກໍຄືຄວາມຮູ້ທາງດ້ານຂະແໜງການຮຽນ, ເອົາໃຈໃສ່ຮັບຟັງເວລາຄູ-ອາຈານຂຶ້ນຫ້ອງສິດສອນ, ສາມາດສະຫຼຸບຄະ ແນນສະເລ່ຍໄດ້ຄະແນນ 8.00 ຂຶ້ນໄປ ມີ 11 ສະຫາຍ ຍິງ 3 ສະຫາຍ, ຈັດເປັນປະເພດເກັ່ງ ກວມ 3,3 %; ຄະແນນສະເລ່ຍໄດ້ຄະແນນ 7.00 ຂຶ້ນໄປ ມີ 15 ສະຫາຍ ຍິງ 6 ສະຫາຍ ຈັດເປັນປະເພດດີກວມ 4,5%; ໄດ້ຄະແນນ 7.00 ລົງມາ ມີ 4 ສະ ຫາຍ ຍິງ 2 ສະຫາຍ ຈັດເປັນປະເພດກາງ ກວມ 1,2%. ຈາກຜົນງານດັ່ງກ່າວເຮັດໃຫ້ນັກສຶກສາໄດ້ຮັບການຍ້ອງຍໍຂັ້ນຕ່າງໆຄື ຍ້ອງຍໍຂັ້ນສະຖານທູດ, ຂັ້ນໂຮງຮຽນຈໍານວນໜຶ່ງ.
ໂອກາດນີ້, ພັອ ວິຊຽນ ຫານວິໄລ ຮອງຫົວໜ້າກົມພະນັກງານ ຍັງໄດ້ຜ່ານຂໍ້ຕົກລົງຂອງກົມໃຫຍ່ການເມືອງ ປກສ ວ່າດ້ວຍການປະດັບຊັ້ນໃຫ້ນັກສຶກສາທີ່ສຳເລັດການສຶກຈາກຕ່າງປະເທດ ໃນນີ້, ປະດັບຊັ້ນ ຮ້ອຍໂທ ຈໍານວນ 29 ສະຫາຍ ຍິງ 11 ສະຫາຍ ແລະ ຮັກສາຊັ້ນ ຮອ 1 ສະຫາຍ ພ້ອມທັງ, ປະກາດສັບຊ້ອນບ່ອນປະຈຳການຢູ່ບັນດາກົມກອງອ້ອມຂ້າງກະຊວງ ແລະ ປກສ ແຂວງໃນຂອບເຂດທົ່ວປະເທດ.
