ໃນວັນທີ 5 ກັນຍາ 2024, ທ່ານ ພົທ ກົງທອງ ພົງວິຈິດ ກໍາມະການສູນກາງພັກ ຮອງລັດຖະມົນຕີກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມ ຢາມ ແລະ ຊຸກຍູ້ວຽກງານຢູ່ໂຮງຮຽນວັດທະນະທໍາປ້ອງກັນຄວາມສະຫງົບ, ໃຫ້ກຽດຕ້ອນຮັບຄະນະຂອງ ທ່ານ ພົຈວ ຄອນສະຫວັນ ສົມພາໄຊ ຮອງຫົວໜ້າກົມໃຫຍ່ການເມືອງປ້ອງກັນຄວາມສະຫງົບ ພ້ອມດ້ວຍຄະນະອໍານວຍການ ແລະ ຄູ-ອາຈານ.
ໃນໂອກາດ ທ່ານຮອງລັດຖະມົນຕີກະຊວງປ້ອງກັນຄວາມສະຫງົບ ໄດ້ລົງມາເຄື່ອນໄຫວຢ້ຽມຢາມ ແລະ ຊຸກຍູ້ວຽກງານໃນຄັ້ງນີ້ ໄດ້ຮັບຟັງການລາຍງານຫຍໍ້ຈາກ ທ່ານ ພັອ ທະວີພອນ ຮັກໜໍ່ລາດ ຫົວໜ້າອໍານວຍການໂຮງຮຽນວັດທະນະທໍາ ປ້ອງກັນຄວາມສະຫງົບ, ເຊິ່ງທ່ານໄດ້ໃຫ້ຮູ້ວ່າ: ໂຮງຮຽນວັດທະນະທໍາປ້ອງກັນຄວາມສະຫງົບ ປະກອບມີ 1 ຮາກ ຖານພັກ ແລະ 3 ໜ່ວຍພັກຂຶ້ນກັບ, ມີ 7 ພະແນກ ແລະ 3 ອົງການຈັດຕັ້ງມະຫາຊົນ; ປັດຈຸບັນ, ມີຄູ-ອາຈານທັງໝົດ 113 ສະຫາຍ, ມີ 2 ຊັ້ນຮຽນ ຄື: ມໍ6 ແລະ ມໍ7, ມີນັກ ຮຽນທັງໝົດ 620 ຄົນ. ສໍາລັບສົກຮຽນປີ 2024-2025, ມີນັກຮຽນ 351 ຄົນ, ມີຫໍພັກນັກຮຽນ 8 ຫຼັງ, ອາຄານຮຽນ 3 ຫຼັງ, ຫ້ອງທົດລອງ 1 ຫ້ອງ, ຫ້ອງຮຽນຄອມພິວເຕີ 2 ຫ້ອງ, ຫ້ອງສະໝຸດ 1 ຫຼັງ; ໃນປີ 2024 ໂຮງຮຽນໄດ້ຮັບການຊ່ວຍເຫຼືອຈາກ ໂຄງການຂອງສົມເດັດພະເທບ 3 ໂຄງການ ຄື: ໂປຣເຈັກເຕີໃສ່ຫ້ອງຮຽນ 10 ຊຸດ (ຕິດຕັ້ງສໍາເລັດແລ້ວ), ຫ້ອງປະຊຸມ (ກໍາລັງດໍາເນີນການກໍ່ສ້າງສໍາເລັດແລ້ວ 80 ສ່ວນຮ້ອຍ) ແລະ ຫໍພັກຄູ (ກໍາລັງດໍາເນີນການກໍ່ສ້າງ ສໍາເລັດແລ້ວ 80 ສ່ວນຮ້ອຍ).
ສໍາລັບໃນປີ 2025, ທາງໂຮງຮຽນໄດ້ນໍາສະເໜີໂຄງການປັບປຸງສະໂມສອນ, ປັບປຸງໂຮງງານນໍ້າດື່ມ, ສ້າງຕຶກອໍານວຍການໂຮງຮຽນ 2 ຊັ້ນ ແລະ ຮັບເອົາທຶນ 10 ທຶນ ຕາມໂຄງການສະ ເໜີ ເພື່ອໄປສຶກສາຮໍ່າຮຽນຕໍ່ ຢູ່ຣາຊະອານາຈັກໄທ ມີ 2 ສາຂາຄື: ໄອທີ ແລະ ແພດສາດ. ນອກຈາກນັ້ນ, ທາງໂຮງຮຽນຍັງໄດ້ຂໍງົບປະມານນໍາກະຊວງປ້ອງກັນຄວາມສະຫງົບ ເພື່ອສ້າງປະຕູໂຂງໂຮງຮຽນ, ຕິດຕາມການຄິດໄລ່ຂອງກົມໃຫຍ່ພະລາທິການ ແລະ ສືບຕໍ່ພົວພັນນໍາຂັ້ນເທິງ ເພື່ອຮັບການຊ່ວຍເຫຼືອສ້າງໂຮງຮຽນຫຼັງໃໝ່ຈາກ ສປ ຈີນ ຕາມທິດຊີ້ນໍາຂອງກະຊວງ ປກສ.
ໂອກາດນີ້, ທ່ານ ພົທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ກໍໄດ້ໃຫ້ທິດຊີ້ນໍາຕໍ່ຄະນະອໍານວຍການ ແລະ ຄູ-ອາຈານ ໂຮງຮຽນວັດທະນະທໍາ ປ້ອງກັນຄວາມສະຫງົບ ເພື່ອຮັບປະກັນໃຫ້ການສຶກສາ ໄດ້ດໍາເນີນໄປຕາມທິດອັນຖືກຕ້ອງທີ່ ພັກ-ລັດ ໄດ້ກໍານົດອອກ (ນັກຮຽນດີ, ນັກຮຽນເກັ່ງ ແລະ ຄູສອນດີ, ຄູສອນເກັ່ງ) ຄື: 3 ລັກສະ ນະ ແລະ 5 ຫຼັກມູນ. ໃນນີ້, ທ່ານໄດ້ເນັ້ນໜັກໃຫ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານຄູ-ອາຈານ ແລະ ນັກຮຽນ ຮັບຮູ້ເຊື່ອມຊຶມຢ່າງເລິກເຊີ່ງ ຕໍ່ແນວທາງນະ ໂຍບາຍຂອງພັກ, ລະບຽບ-ກົດໝາຍຂອງລັດ, ທາດແທ້, ມູນເຊື້ອຂອງຊາດ, ຂອງກໍາລັງ ແລະ ໜ້າທີ່ຄວາມຮັບຜິດຊອບຂອງຕົນ ແນໃສ່ເຮັດໃຫ້ພາຍໃນມີຄວາມສະຫງົບໜັກແໜ້ນ; ສືບຕໍ່ນໍາພາ-ຊີ້ນໍາ ພະນັກງານຄູ-ອາຈານ ປະຕິບັດໜ້າທີ່ຂອງຕົນ ໃນການ ບໍາລຸງ-ກໍ່ສ້າງ ນາຍຕໍາຫຼວດ ໃຫ້ຮັບປະກັນໄດ້ຄຸນນະພາບ ຕາມມາດຖານກະຊວງສຶກທິການ ແລະ ກິລາ ກໍຄື ກະຊວງປ້ອງກັນຄວາມສະຫງົບ ວາງອອກ; ເອົາໃຈໃສ່ຄຸ້ມຄອງ, ປ້ອງກັນພັກ, ປ້ອງກັນພະນັກງານໃຫ້ແໜ້ນແຟ້ນ; ເອົາໃຈໃສ່ຄຸ້ມຄອງການສອບເສັງໃຫ້ມີຄຸນນະພາບ ແລະ ຮັບປະກັນທຸກດ້ານໃນການໄຂສົກຮຽນໃໝ່. ຈາກນັ້ນ, ທ່ານຮອງລັດຖະມົນຕີກະ ຊວງປ້່ອງກັນຄວາມສະຫງົບ ກໍໄດ້ມອບເຄື່ອງຊຸກຍູ້ໃຫ້ໂຮງຮຽນວັດທະນະທໍາ ປ້ອງກັນຄວາມສະຫງົບ ລວມມູນຄ່າ 30 ລ້ານກີບ ເພື່ອປະກອບສ່ວນເຂົ້າໃນວຽກງານວິຊາການເພາະການຮຽນ-ການສອນ ໃຫ້ມີຄວາມສະດວກຍິ່ງຂຶ້ນ.
ຈາກນັ້ນ, ທ່ານ ພົທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ກໍໄດ້ລົງກວດກາຄວາມຄືບໜ້າໂຄງການກໍ່ສ້າງສູນບໍາບັດຜູ້ຕິດຢາເສບຕິດ ຢູ່ຫຼັກ 62 ແຂວງວຽງຈັນ ຕື່ມອີກ.
