ໃນວັນທີ 30 ສິງຫາ 2024, ທີ່ກະຊວງປ້ອງກັນຄວາມສະຫງົບ ສປປ ລາວ ໄດ້ຈັດກອງປະຊຸມພົບປະສອງຝ່າຍ ລະຫວ່າງ ຄະນະຜູ້ແທນ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ຄະນະຜູ້ແທນ ກະຊວງປ້ອງກັນຄວາມສະຫງົບ ສປ ຈີນ, ໂດຍການເປັນປະທານຮ່ວມໂດຍ ທ່ານ ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ກະຊວງປ້ອງກັນຄວາມສະຫງົບ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ທ່ານ ລິວ ຈົ່ງອີ້ ຜູ້ຊ່ວຍລັດຖະມົນຕີ ກະຊວງປ້ອງກັນຄວາມສະ ຫງົບ ແຫ່ງ ສາທາລະນະລັດ ປະຊາຊົນຈີນ, ມີບັນດາຄະນະຜູ້ແທນ ຂອງກະຊວງປ້ອງກັນຄວາມສະຫງົບ ສປປ ລາວ ແລະ ສປ ຈີນ ເຂົ້າຮ່ວມ.
ກອງປະຊຸມ, ທ່ານ ພົນຕີ ຄໍາກິ່ງ ຜຸຍຫຼ້າມະນີວົງ ໄດ້ກ່າວສະແດງຄວາມຕ້ອນຮັບອັນອົບອຸ່ນ ແລະ ຕີລາຄາສູງຕໍ່ກັບຄະນະຜູ້ແທນ ກະຊວງປ້ອງກັນຄວາມສະຫງົບ ສປ ຈີນ ທີ່ໄດ້ເຂົ້າ ຮ່ວມກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 18 ທີ່ ສປປ ລາວ ຮັບກຽດເປັນເຈົ້າພາບ ລະຫວ່າງວັນທີ 27-29 ສິງຫາ 2024 ນີ້; ທັງນີ້, ໄດ້ສະແດງໃຫ້ເຫັນເຖິງການເສີມສ້າງສາຍພົວພັນມິດຕະພາບອັນເປັນມູນເຊື້ອ, ການເປັນຄູ່ຮ່ວມຍຸດທະສາດຮອບດ້ານ, ໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕະກຳ ລາວ-ຈີນ, ຈີນ-ລາວ, ລະຫວ່າງສອງພັກ, ສອງລັດ ແລະ ສອງປະຊາຊົນສອງຊາດ ລາວ-ຈີນໃຫ້ໝັ້ນຄົງທະນົງແກ່ນດີຍິ່ງໆຂຶ້ນ.
ກອງປະຊຸມ, ຄະນະຜູ້ແທນ ສອງຝ່າຍ ກໍໄດ້ສະເໜີແລກ ປ່ຽນຄວາມຄິດເຫັນດ້ານວຽກງານວິຊາສະເພາະທີ່ກ່ຽວ ຂ້ອງ ແລະ ສໍາຄັນ ຢ່າງກົງໄປກົງມາ ໂດຍສະເພາະ ກໍແມ່ນວຽກງານດ້ານການຮ່ວມມືຕ້ານ, ສະກັດກັ້ນ ແລະ ແກ້ໄຂບັນດາອາຊະຍາກຳຂ້າມຊາດຂອງກຳລັງປ້ອງກັນຄວາມສະຫງົບ ສອງປະເທດ ສປປ ລາວ-ສປ ຈີນ, ການປ້ອງກັນເສັ້ນທາງລົດໄຟລາວ-ຈີນ, ການພັດທະນາພື້ນຖານໂຄງລ່າງຂອງສອງກໍາລັງປ້ອງກັນຄວາມສະຫງົບ ລຽບຕາມຊາຍ ແດນ ລາວ-ຈີນ ແລະ ການສືບຕໍ່ຮ່ວມມືເສີມຂະຫຍາຍສາຍພົວພົວຮ່ວມມືທີ່ເປັນມູນເຊື້ອອັນດີງາມຂອງສອງປະເທດ ກໍຄື: ສອງກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ສປ ຈີນ ໃຫ້ໝັ້ນຄົງຕະຫຼອດໄປ.
