ໃນຕອນບ່າຍວັນທີ 27 ສິງຫາ 2024, ທີ່ກະຊວງປ້ອງກັນຄວາມສະຫງົບລາວ ໄດ້ຈັດກອງປະຊຸມພົບປະສອງຝ່າຍ ລະຫວ່າງ ຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບແຫ່ງ ສປປ ລາວ ແລະ ຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບແຫ່ງ ສສ ຫວຽດນາມ. ຝ່າຍລາວນຳໂດຍ ທ່ານ ພົອ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບລາວ, ຝ່າຍຫວຽດນາມ ນຳໂດຍ ພົທ ເລືອງ ຕາມ ກວາງ ກຳມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບຫວຽດນາມ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.
ໃນວາລະກອງປະຊຸມ ຄະນະຜູ້ແທນທັງສອງຝ່າຍໄດ້ແຈ້ງສະພາບການ ແລະ ການເຄື່ອນໄຫວພົວພັນຮ່ວມມືລະຫ່ວາງສອງກະຊວງໃນໄລຍະຜ່ານມາ. ໂອກາດດຽວກັນນີ້ ທ່ານ ພົອ ວິໄລ ຫຼ້າຄຳຟອງ ໄດ້ກ່າວວ່າ: ໄລຍະຜ່ານມາ ການຮ່ວມມື ລະຫວ່າງ ສອງກະຊວງປ້ອງກັນຄວາມສະ ຫງົບລາວ-ຫວຽດນາມ ແມ່ນໄດ້ບັນລຸໝາກຜົນຢ່າງໜ້າພາກພູມໃຈ, ກົນໄກການຈັດຕັ້ງປະ ຕິບັດອະນຸສັນຍາໄດ້ມີຄວາມກົມກຽວກັນ ມີການປະສານສົມທົບກັນແໜ້ນແຟ້ນ ແລະ ມີປະສິດທິຜົນດີ ເປັນຕົ້ນ: ການຮ່ວມມືກໍ່ສ້າງກໍາລັງປ້ອງກັນຄວາມສະຫງົບ, ການແລກປ່ຽນບົດຮຽນ, ແລກ ປ່ຽນຄະນະຜູ້ແທນ ແລະ ການຊ່ວຍເຫຼືອອຸປະ ກອນເຕັກ ນິກວິຊາສະເພາະ ຈາກກະຊວງປ້ອງກັນຄວາມສະຫງົບຫວຽດນາມ, ເຊິ່ງໄດ້ເຮັດໃຫ້ກໍາລັງປ້ອງກັນຄວາມສະຫງົບລາວ ນັບມື້ເຂັ້ມແຂງ; ພ້ອມນັ້ນ, ກະຊວງປ້ອງກັນສະຫງົບຫວຽດນາມ ຍັງໃຫ້ການຊ່ວຍເຫຼືອ ໃນໂຄງການກໍ່ສ້າງລະບົບຄຸ້ມ ຄອງພົນລະເມືອງ ແລະ ບັດປະຈຳຕົວ ແລະ ໂຄງການກໍ່ສ້າງສູນປິ່ນປົວບຳບັດ ແລະ ຟື້ນຟູສຸຂະພາບຜູ້ຕິດຢາເສບຕິດ. ການປະສານສົມທົບ, ພົວພັນຮ່ວມມື ລະຫວ່າງ ສອງກໍາລັງປ້ອງກັນຄວາມສະຫງົບໃນເດືອນຜ່ານມາ; ຕຳຫຼວດສະກັດກັ້ນ ແລະ ຕ້ານການຄ້າມະນຸດສອງຝ່າຍລາວ- ຫວຽດນາມ ໄດ້ປະສານສົມທົບກັບເຈົ້າໜ້າທີ່ ກອງບັນຊາການ ປກສ ເຂດເສດຖະກິດພິເສດສາມຫຼ່ຽມຄໍາ ແຂວງບໍ່ແກ້ວ ເພື່ອມ້າງກຸ່ມແກ້ງຄໍເຊັນເຕີ ສາມາດຈັບກຸມ ກຸ່ມແກ້ງຄໍເຊັນເຕີ ໄດ້ 154 ຄົນ, ຍິງ 25 ຄົນ ພ້ອມເຄື່ອງຂອງກາງທີ່ໃຊ້ເຂົ້າໃນການກະທໍາຜິດຈໍານວນໜຶ່ງ; ຫຼັງຈາກນັ້ນໄດ້ນໍາສົ່ງຜູ້ຖືກຫາ ຈໍານວນດັ່ງກ່າວ ພ້ອມເຄື່ອງຂອງກາງທີ່ໃຊ້ເຂົ້າໃນການກະທໍາຜິດໃຫ້ ສສ ຫວຽດນາມ ເພື່ອສືບຕໍ່ດໍາເນີນຄະດີຕາມກົດໝາຍ ສສ ຫວຽດນາມ.
ສໍາລັບທິດທາງແຜນການຮ່ວມມືໃນຕໍ່ໜ້າ ທັງສອງກະຊວງປ້ອງກັນຄວາມສະຫງົບລາວ-ຫວຽດນາມຍັງຈະສືບຕໍ່ພົວພັນຮ່ວມມືກັນຕາມຂົງເຂດວຽກງານທີ່ພົວພັນຮ່ວມມືກັນຜ່ານມາ; ໂດຍສະເພາະ ແມ່ນການປະສານສົມທົບ, ສະ ໜັບສະໜູນຊ່ວຍເຫຼືອເຊິ່ງກັນ ແລະ ກັນໃນການຮັບປະ ກັນຄວາມສະຫງົບ, ຄວາມເປັນລະບຽບຮຽບຮ້ອຍ; ບັນດາເຫດການດ້ານການເມືອງ, ດ້ານການຕ່າງປະເທດ ທີ່ສໍາຄັນ ໃນປີ 2024 ຢູ່ແຕ່ລະປະເທດ ແລະ ສືບຕໍ່ຈັດຕັ້ງປະຕິບັດແຜນການຮ່ວມມືປະຈໍາປີ 2024 ໃຫ້ສໍາເລັດຜົນເຊັ່ນ: ການຮ່ວມມືໃນຂົງເຂດປ້ອງກັນຄວາມສະຫງົບທາງດ້ານການເມືອງ; ການຮ່ວມມືໃນການປົກປັກຮັກສາຄວາມເປັນລະບຽບຮຽບຮ້ອຍຂອງສັງຄົມ ແລະ ຮັບປະກັນຄວາມປອດໄພໃຫ້ແກ່ພົນລະເມືອງຂອງສອງຝ່າຍ; ການຮ່ວມມືໃນການກວດກາ ແລະ ຄວບຄຸມຢາເສບຕິດ; ການຮ່ວມມືປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍລະ ຫວ່າງ ບັນດາແຂວງທີ່ມີຊາຍແດນຕິດຈອດ ແລະ ບັນ ດາແຂວງ, ນະຄອນແຮກສ່ຽວ; ການຮ່ວມມືດ້ານວຽກງານກໍ່ສ້າງກຳ ລັງ; ການຮ່ວມມືດ້ານພະລາທິການ -ເຕັກນິກ; ການຮ່ວມມືໃນຂົງເຂດຄົ້ນຄວ້າວິທະຍາສາດ, ປະຫວັດ ສາດ; ການແລກ ປ່ຽນຄະນະຜູ້ແທນ, ຢ້ຽມຢາມ, ພັກຜ່ອນ ແລະ ປິ່ນປົວ.
