ກອງປະຊຸມປຶກສາຫາລືເຈົ້າໜ້າທີ່ອາວຸໂສອາຊຽນ +3 ເພື່ອກະກຽມໃຫ້ແກ່ກອງປະຊຸມປຶກ ສາຫາລືລັດຖະມົນຕີອາຊຽນ +3 ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 14 ໄດ້ຈັດຂຶ້ນໃນວັນທີ 27 ສິງຫາ 2024 ທີ່ ນະຄອນຫຼວງວຽງຈັນ, ພາຍໃຕ້ການເປັນປະທານຂອງ ທ່ານ ພົຕ ສຸລິນະ ແກ້ວປະເສີດ ຫົວໜ້າຫ້ອງວ່າການ ກະຊວງປ້ອງກັນຄວາມສະຫງົບ ຫົວ ໜ້າເຈົ້າ ໜ້າທີ່ອາວຸໂສອາຊຽນ ສປປ ລາວ, ມີຫົວໜ້າເຈົ້າໜ້າທີ່ອາວຸໂສປະເທດສະມາຊິກອາຊຽນ ແລະ ຕີມໍ ເລສເຕ ຮັບຜິດຊອບວຽກງານຕ້ານອາຊະຍາກໍາຂ້າມຊາດ, ຮອງເລຂາທິ ການໃຫຍ່ອາຊຽນ ຮັບຜິດຊອບເສົາຄໍ້າການເມືອງ-ຄວາມໝັ້ນຄົງ, ຫົວ ໜ້າເຈົ້າໜ້າທີ່ອາວຸໂສບັນດາປະເທດອາຊຽນ + 3 ຄື: ສາທາລະນະລັດ ປະຊາຊົນຈີນ, ຢີ່ປຸ່ນ ແລະ ສາທາລະນະ ລັດເກົາຫຼີ ພ້ອມດ້ວຍຄະນະຜູ້ແທນເຂົ້າຮ່ວມ.
ທ່ານ ພົຕ ສຸລິນະ ແກ້ວປະເສີດ ໄດ້ກ່າວວ່າ: ກອງປະຊຸມໃນຄັ້ງນີ້ແມ່ນການກະກຽມທາງດ້ານເນື້ອໃນທີ່ສໍາຄັນໃຫ້ແກ່ກອງປະຊຸມລັດຖະມົນຕີອາຊຽນ +3 ວ່າດ້ວຍການຕ້ານອາຊະ ຍາກຳຂ້າມຊາດ ຄັ້ງທີ 14 ; ໃນນີ້, ຄະນະຜູ້ແທນໄດ້ປຶກສາຫາລືໃນຫຼາຍບັນຫາທີ່ສໍາຄັນ ເປັນຕົ້ນ ແຜນການເຄື່ອນໄຫວ, ວາລະ ແລະ ຖະແຫຼງການຮ່ວມ. ພ້ອມນັ້ນ, ຍັງໄດ້ປຶກສາຫາລືການຈັດຕັ້ງປະຕິບັດແຜນວຽກງານຮ່ວມມືລະຫວ່າງອາຊຽນ +3 ກ່ຽວກັບອົງປະກອບທີ່ພົວພັນເຖິງການຕ້ານອາຊະຍາກໍາຂ້າມຊາດ, ການຈັດຕັ້ງປະຕິບັດແຜນວຽກກອງປະຊຸມເຈົ້າໜ້າທີ່ອາວຸໂສອາຊຽນ +3 ວ່າດ້ວຍການຕ້ານອາຊະຍາກາຂ້າມຊາດໃນໄລຍະຜ່ານມາ ລວມທັງບັນຫາອື່ນໆທີ່ກ່ຽວຂ້ອງ.
ບັນດາປະເທດອາຊຽນ +3 : ສາທາລະນະລັດ ປະຊາຊົນຈີນ, ຢີ່ປຸ່ນ ແລະ ສາທາລະນະລັດເກົາຫຼີ ໄດ້ມີສາຍພົວພັນຮ່ວມມືອັນດີເປັນເວລາຍາວນານ, ມີການຮ່ວມມືໃນຫຼາຍຂົງເຂດ ບໍ່ວ່າຈະເປັນທາງດ້ານເສດຖະກິດ, ວັດທະນະທໍາ-ສັງຄົມ ແລະ ຄວາມໝັ້ນຄົງ ລວມທັງການຮ່ວມມືໃນການຕ້ານອາຊະຍາກໍາຂ້າມຊາດ ປະກອບສ່ວນຮັບປະກັນຄວາມສະຫງົບປອດໄພ ໃນພາກພື້ນ ແລະ ສາກົນ.
ສໍາລັບເນື້ອໃນກອງປະຊຸມໃນຄັ້ງນີ້, ຈະໄດ້ນໍາໄປຄົ້ນຄ້ວາ ແລະ ຮັບຮອງຢູ່ໃນກອງປະຊຸມປຶກສາຫາລືລັດຖະມົນຕີອາຊຽນ +3 ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 14, ເຊິ່ງຈະກາຍເປັນພື້ນຖານອັນສໍາຄັນ ໃນການສືບຕໍ່ເສີມຂະຫຍາຍການຮ່ວມມື ລະຫວ່າງອາຊຽນ +3 ເພື່ອຕ້ານອາຊະຍາກາຂ້າມຊາດໃນຕໍ່ໜ້າ ໃຫ້ມີປະສິດທິຜົນສູງຂຶ້ນ.
