ກອງປະຊຸມເຈົ້າໜ້າທີ່ອາວຸໂສອາຊຽນ + ຍີ່ປຸ່ນ ເພື່ອກະກຽມໃຫ້ແກ່ກອງປະຊຸມລັດຖະ ມົນຕີອາຊຽນ + ຍິປຸ່ນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 9 ໄດ້ຈັດຂຶ້ນໃນວັນທີ 27 ສິງຫາ 2024 ທີ່ນະຄອນຫຼວງວຽງຈັນ, ໂດຍການເປັນປະທານຮ່ວມຂອງຫົວໜ້າເຈົ້າໜ້າທີ່ອາວຸໂສ ສິງກະໂປ ແລະ ຍິ່ປຸ່ນ, ມີຫົວໜ້າເຈົ້າໜ້າທີ່ອາວຸໂສປະເທດສະມາຊິກອາຊຽນ ແລະ ຕີມໍເລສເຕ, ຮອງເລຂາທິການໃຫຍ່ອາຊຽນ ດ້ານການເມືອງ-ຄວາມໝັ້ນຄົງ ພ້ອມດ້ວຍຄະນະຜູ້ແທນທີ່ຮັບຜິດຊອບວຽກງານຕ້ານອາຊະຍາກໍາຂ້າມຊາດ ເຂົ້າຮ່ວມ.
ກອງປະຊຸມຄັ້ງນີ້, ຄະນະຜູ້ແທນທີ່ເຂົ້າຮ່ວມໄດ້ປຶກສາຫາລືຫຼາຍບັນຫາ ໂດຍສະເພາະ ແມ່ນບັນຫາກ່ຽວຂ້ອງກັບການຮ່ວມ ມືລະຫວ່າງ ອາຊຽນ-ຍິ່ປຸ່ນ ໃນການຕ້ານອາຊະຍາກໍາຂ້າມຊາດ ໃນນັ້ນ, ໄດ້ທົບທວນຄືນຄວາມຄືບໜ້າ ຂອງການຈັດຕັ້ງປະ ຕິບັດແຜນງານຂອງອາຊຽນ-ຍິ່ປຸ່ນ ກ່ຽວກັບການຮ່ວມມືເພື່ອຕ້ານອາຊະຍາກາຂ້າມຊາດ ໄລຍະຜ່ານມາ, ກອງປະຊຸມໄດ້ມີ ການພົບປະແລກປ່ຽນທັດສະນະ, ແບ່ງປັນບົດຮຽນກ່ຽວກັບການຈັດຕັ້ງປະຕິບັດວຽກງານ ແລະ ແລກປ່ຽນປະສົບການໃນການຕ້ານອາຊະຍາກໍາຂ້າມຊາດ, ປຶກສາຫາລືກ່ຽວກັບການຈັດຕັ້ງປະຕິບັດໂຄງການທີ່ສໍາເລັດແລ້ວ, ໂຄງການທີ່ກຳລັງດຳ ເນີນຢູ່ ແລະ ການສະເໜີໂຄງການໃໝ່.
ທັງໝົດນັ້ນ, ສະແດງໃຫ້ເຫັນເຖິງການຮ່ວມມືທີ່ແໜ້ນແຟ້ນ ໃນການຮ່ວມມືລະຫວ່າງອາຊຽນ ແລະ ຍິ່ປຸ່ນ ໃນການຕ້ານອາຊະຍາກຳຂ້າມຊາດຕະຫຼອດຫຼາຍປີຜ່ານມາ ໄດ້ມີການເຕີບໃຫ່ຍຂະຫຍາຍຕົວພໍສົມຄວນ, ສະເໝີຕົ້ນສະເໝີປາຍ ແລະ ມີຜົນສໍາເລັດຫຼາຍດ້ານ. ນອກນັ້ນ, ກອງປະຊຸມຄັ້ງນີ້ຍັງໄດ້ເປັນເອກະພາບກັນຕໍ່ກັບບັນດາເນື້ອໃນຕ່າງໆທີ່ຈະນໍາໄປພິຈາລະ ນາ ແລະ ຮັບຮອງເອົາໃນກອງປະຊຸມລັດຖະມົນຕີອາຊຽນ + ຍິ່ປຸ່ນ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 9 ຕື່ມອີກ.
