ກອງປະຊຸມເຈົ້າໜ້າທີ່ອາວຸໂສອາຊຽນ ເພື່ອກະກຽມໃຫ້ແກ່ກອງປະຊຸມລັດຖະມົນຕີອາຊຽນວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 18 ໄດ້ຈັດໃນວັນທີ 27 ສິງຫາ 2024 ທີ່ນະຄອນຫຼວງວຽງຈັນ, ໂດຍການເປັນປະທານຂອງ ທ່ານ ພົຕ ສຸລິນະ ແກ້ວປະເສີດ ຫົວ ໜ້າຫ້ອງວ່າການ ກະຊວງປ້ອງກັນຄວາມສະຫງົບ ຫົວໜ້າເຈົ້າໜ້າທີ່ອາວຸໂສ ແຫ່ງ ສປປ ລາວ ຮັບ ຜິດຊອບວຽກງານຕ້ານອາຊະຍາກໍາຂ້າມຊາດ, ມີບັນດາຫົວໜ້າເຈົ້າໜ້າທີ່ອາວຸໂສອາຊຽນຮັບຜິດຊອບວຽກງານຕ້ານອາຊະຍາກໍາຂ້າມຊາດ, ຫົວໜ້າເຈົ້າໜ້າທີ່ອາວຸໂສ ປະ ເທດ ຕີມໍ ເລສເຕ, ຮອງເລຂາທິການໃຫຍ່ອາຊຽນ ຮັບຜິດຊອບເສົາຄໍ້າການເມືອງ-ຄວາມໝັ້ນຄົງ ພ້ອມດ້ວຍຄະນະຜູ້ແທນເຂົ້າຮ່ວມ.
ກອງປະຊຸມໃນຄັ້ງນີ້ ເປັນກົນໄກໃນການກະກຽມໃຫ້ແກ່ກອງປະຊຸມລັດຖະມົນຕີອາຊຽນວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 18 ທີ່ຈະໄຂຂຶ້ນຢ່າງເປັນທາງການໃນວັນທີ 28 ສິງຫາ ນີ້, ໂດຍບັນດາຫົວໜ້າເຈົ້າໜ້າທີ່ອາວຸໂສອາຊຽນ, ພ້ອມດ້ວຍຄະນະຜູ້ແທນທີ່ເຂົ້າຮ່ວມກອງປະຊຸມ ໄດ້ຮ່ວມກັນປຶກສາຫາລື ແລະ ຄົ້ນຄ້ວາ ທາງດ້ານເນື້ອໃນ ແລະ ແຜນງານດ້ານຕ່າງໆ ພ້ອມທັງກໍານົດບັນດາຫົວຂໍ້ທີ່ຈະນໍາໄປປຶກສາຫາລື, ແລກປ່ຽນ, ຄົ້ນຄ້ວາ ແລະ ຈະຮັບຮອງເອົາຢູ່ໃນກອງປະຊຸມລັດ ຖະມົນຕີອາຊຽນວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 18. ໃນນີ້, ເຈົ້າໜ້າທີ່ອາວຸໂສບັນດາປະເທດສະມາຊິກອາຊຽນ ໄດ້ຜັດປ່ຽນກັນແລກປ່ຽນທັດສະນະ, ບົດຮຽນໃນການແກ້ໄຂບັນຫາ, ປືກສາຫາລື, ພ້ອມກັນສັງ ເກດຕີລາຄາຄືນການຈັດຕັ້ງປະຕິບັດແຜນວຽກ, ແຜນງານ ແລະ ບັນດາໂຄງການຮ່ວມມື ທີ່ໄດ້ເປັນເອກະພາບກັນໃນປີຜ່ານມາ ແລະ ປຶກສາຫາລືການຮ່ວມມືໃນຕໍ່ໜ້າ.
ກອງປະຊຸມໄດ້ກໍານົດບັນດາເນື້ອໃນ ແລະ ຫົວຂໍ້ທີ່ສໍາຄັນທີ່ຈະນໍາໃຊ້ເຂົ້າໃນກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 18 ເປັນຕົ້ນແມ່ນການປຶກສາຫາລືຊອກຫາວິທີປ້ອງກັນ-ສະກັດກັ້ນອາຊະຍາກໍາຂ້າມຊາດ ຢ່າງເປັນປົກກະຕິ ແລະ ຕໍ່ເນື່ອງ, ປຶກສາຫາລືແລກປ່ຽນທັດສະນະ ແລະ ປະເມີນສະພາບການ, ທ່າອ່ຽງຂອງບັນຫາອາຊະຍາກໍາຂ້າມຊາດໃນພາກພື້ນ ກໍຄືໃນໂລກຢ່າງກົງໄປ-ກົງມາ, ຖືກຕ້ອງຕາມຄວາມເປັນຈິງ ເພື່ອເປັນບ່ອນອີງໃຫ້ແກ່ການກໍານົດມາດຕະການທີ່ເໝາະສົມ ເພື່ອແກ້ໄຂບັນຫາດັ່ງກ່າວ; ແລກປ່ຽນບົດຮຽນເຊິ່ງກັນ ແລະ ກັນ ໃນການແກ້ໄຂບັນຫາອາຊະຍາກໍາຂ້າມຊາດ ຢູ່ແຕ່ລະປະເທດສະມາຊິກອາຊຽນ ໃນໄລຍະຜ່ານມາ; ຄົ້ນຄວ້າປັບປຸງບັນດາກົນໄກ ແລະ ເຄື່ອງມືຕ່າງໆ ທີ່ຢູ່ໃນຄວາມຮັບຜິດຊອບຂອງເຈົ້າໜ້າທີ່ອາວຸໂສອາຊຽນ ວ່າດ້ວຍອາຊະຍາກໍາຂ້າມຊາດ ໃຫ້ແທດເໝາະກັບສະພາບຕົວຈິງໃນປະຈຸບັນ; ຄົ້ນຄວ້າສ້າງຂໍ້ລິເລີ່ມໃໝ່ທີ່ຈໍາເປັນ ເພື່ອແກ້ໄຂບັນຫາອາຊະຍາກໍາຂ້າມຊາດທີ່ພົ້ນເດັ່ນໃນພາກພື້ນ ເປັນຕົ້ນ ບັນ ຫາເສບຕິດ, ຄ້າມະນຸດ, ການກໍ່ການຮ້າຍ, ອາຊະຍາກໍາທາງຄອມພິວເຕີ, ການຄ້າອາວຸດ ແລະ ອື່ນໆ; ເພີ່ມທະວີການຮ່ວມມືແລກປ່ຽນຂໍ້ມູນຂ່າວສານ ທີ່ພົວພັນເຖິງອາຊະຍາກໍາຂ້າມຊາດ ລະຫວ່າງບັນດາປະເທດສະມາຊິກອາຊຽນ ໃຫ້ວ່ອງໄວທັນກັບສະພາບການ; ເພີ່ມທະວີພັດທະນາຂີດຄວາມສາມາດ ຂອງເຈົ້າໜ້າທີ່ປະຕິບັດກົດໝາຍທີ່ກ່ຽວຂ້ອງ ຂອງປະເທດສະມາ ຊິກອາຊຽນ ເພື່ອຕ້ານອາຊະຍາກໍາຂ້າມຊາດ; ຍົກລະດັບການພົວພັນຮ່ວມມື, ຍາດແຍ່ງການຊ່ວຍເຫຼືອທາງດ້ານເຕັກນິກວິ ຊາການ ແລະ ທຶນຮອນ ເພື່ອຍົກລະດັບຂີດຄວາມສາມາດຂອງອາຊຽນ ໃນການຕ້ານອາຊະຍາກໍາຂ້າມຊາດ ຈາກບັນດາປະ ເທດຄູ່ຮ່ວມເຈລະ ຈາ ແລະ ອົງການຈັດຕັ້ງສາກົນທີ່ກ່ຽວຂ້ອງ ແນ່ໃສ່ສ້າງໃຫ້ພາກພື້ນ ແລະ ສາກົນ ມີຄວາມໝັ້ນຄົງ, ມີຄວາມສະຫງົບ ແລະ ເປັນລະບຽບຮຽບຮ້ອຍ.
