ກອງບັນຊາການ ປກສ ແຂວງຫຼວງນໍ້າທາ ໄດ້ຈັດພິທີປາຖະກະຖາ 2 ວັນປະຫວັດສາດ ແລະ ປະກາດເລື່ອນຊັ້ນໃຫ້ນາຍຕຳຫຼວດ ໃນວັນທີ 21 ສິງຫາ 2024, ເຂົ້າຮ່ວມໂດຍ ພົຈວ ອິນສົມ ທຳລະສີນ ຫົວໜ້າກອງບັນຊາການ ປກສ ແຂວງຫຼວງນ້ຳທາ, ມີ ຄະນະພັກ-ຄະນະກອງບັນຊາການ, ຫົວໜ້າ-ຄະນະຫ້ອງ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ນາຍຕຳຫຼວດ ອ້ອມຂ້າງ ກອງບັນຊາການ ເຂົ້າຮ່ວມ.
ໃນພິທີ, ພົຈວ ອິນສົມ ທຳລະສີນ ໄດ້ເຜີຍແຜ່ເອກະສານວັນຢຶດອໍານາດ ຄົບຮອບ 49 ປີ (23 ສິງຫາ 1975-23 ສິງຫາ 2024) ແລະ ວັນລັດຖະທຳນູນແຫ່ງຊາດ ຄົບຮອບ 33 ປີ (15 ສິງຫາ 1991-15 ສິງຫາ 2024), ທ່ານໄດ້ຍົກໃຫ້ເຫັນເຖິງ ຜົນງານການກຳເນີດເຕີບໃຫຍ່ຂະຫຍາຍຕົວ ແລະ ການຕໍ່ສູ້ກູ້ຊາດໃນເມື່ອກ່ອນ ພາຍໃຕ້ການນໍາພາຂອງ ພັກປະຊາຊົນ ປະຕິວັດລາວ ນໍາພາຕໍ່ສູ້ກູ້ຊາດເພື່ອຍາດເອົາເອກະລາດອະທິປະໄຕ ແລະ ຄວາມຜາສຸກຂອງປວງຊົນລາວທັງຊາດເຊິ່ງໃນເມື່ອກ່ອນ, ປະເທດລາວ ໄດ້ຕົກເປັນຫົວເມືອງຂຶ້ນຂອງຈັກກະພັດຜູ້ຮຸກຮານເປັນຫຼາຍຮ້ອຍປີ, ປະຊາຊົນລາວ ໄດ້ຕົກເປັນຂ້ອຍຂ້າຂອງພວກລ່າເມື່ອງຂຶ້ນແບບເກົ່າ ແລະ ໃໝ່, ຖືກກົດຂີ່ຂູດຮີດຢ່າງແສນສາຫັດ, ດ້ວຍນໍ້າໃຈຮັກຊາດຮັກບ້ານເກີດເມືອງນອນ ຈຶ່ງເກີດມີຂະບວນການຕໍ່ສູ້ຢ່າງລະອິດລະອ້ຽວ ແລະ ສາມາດຍາດໄດ້ໄຊຊະນະເປັນແຕ່ລະໄລຍະ ໂດຍພາຍໃຕ້ການນໍາພາຂອງບັນພະບູລຸດລາວຈົນມາຮອດວັນທີ 23 ສິງຫາ 1975, ປະຊາຊົນຊາວນະຄອນຫຼວງວຽງຈັນ ໄດ້ລຸກຂຶ້ນຢຶດອໍານາດ ເພື່ອໂຄ່ນລົ້ມອໍານາດການປົກຄອງເກົ່າຂອງພວກຈັກກະພັດຜູ້ຮຸກຮານ, ລົບລ້າງລະບອບສັກດີນາ ເຊິ່ງເປັນອຳນາດການປົກຄອງແບບເກົ່າ ເພື່ອຕັ້ງອຳນາດການປົກຄອງປະຕິວັດຂຶ້ນແທນ, ເຫດການທີ່ມີຄວາມໝາຍ, ຄວາມສໍາຄັນຕໍ່ພັກ-ລັດ ແລະ ປວງຊົນລາວແມ່ນວັນແຫ່ງໄຊຊະນະອັນຍິ່ງໃຫຍ່ຂອງກໍາລັງປະກອບອາວຸດ, ເປັນເຫດການອັນສຳຄັນຂອງຊາດ, ເປັນບົດຮຽນອັນລ້ຳຄ່າທີ່ສຸດໃຫ້ແກ່ຂະບວນການຕໍ່ສູ້ຂອງກອງທັບປະຊາຊົນລາວ ຍ້ອນມີການນຳພາ-ຊີ້ນຳອັນສະຫຼາດສ່ອງໃສຂອງພັກ, ມີນ້ຳໃຈຮັກຊາດ, ຮັກບ້ານເກີດເມືອງນອນຂອງບັນດາທ່ານຜູ້ນຳທີ່ມີຄວາມອົງອາດກ້າຫານ, ເດັດດ່ຽວໜຽວແໜ້ນ, ມີຄວາມສາມັກ ຄີເປັນຈິດໜຶ່ງໃຈດຽວ ຈຶ່ງສາມາດທັບມ້າງກົນອຸບາຍຂອງພວກຈັກກະພັດ ແລະ ລູກແຫຼ້ງຕີນມືຂອງພວກເຂົາທີ່ຫວັງດັບມ້າງກຳລັງປະຕິວັດ, ວັນລັດຖະທໍາມະນູນ ແມ່ນໝາກຜົນລວມຍອດແຫ່ງສະຕິປັນຍາ ແລະ ການປະກອບສ່ວນຢ່າງກວ້າງຂວາງຂອງປະຊາຊົນໃນທົ່ວປະເທດ ທີ່ສ່ອງແສງຢ່າງຈະແຈ້ງເຖິງເຈດຈໍານົງອັນສູງສົ່ງຍາວນານ ແລະຄວາມຕັດສິນໃຈອັນແຮງກ້າຂອງວົງຄະນະຍາດແຫ່ງຊາດ ທີ່ໄດ້ພ້ອມກັນສູ້ຊົນເພື່ອບັນລຸຈຸດໝາຍສ້າງສາພັດທະນາປະເທດຊາດໃຫ້ມີ ສັນຕິພາບ ເອກະ ລາດ ປະຊາທິປະໄຕ ເອກະພາບ ແລະ ວັດທະນະຖາວອນ.
ແນໃສ່ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ແລະ ສ້າງສິ່ງອໍານວຍຊຸກຍູ້ໃຫ້ເສດຖະກິດຂະຫຍາຍຕົວໄປຕາມເສັ້ນທາງສັງຄົມນິຍົມທີ່ພັກເຮົາໄດ້ກຳນົດໄວ້. ທັງນີ້, ກໍເພື່ອເປັນການໂຄສະນາສຶກສາອົບຮົມໃຫ້ນາຍຕຳຫຼວດ ເຂົ້າໃຈເຖິງຄວາມເປັນມາຂອງວັນດັ່ງກ່າວ.
ຈາກນັ້ນ, ພັທ ພູນເພັດ ເຫຼົາອິນ ຫົວໜ້າຫ້ອງການເມືອງ ປກສ ແຂວງຫຼວງນ້ຳທາ ກໍໄດ້ຜ່ານຂໍ້ຕົກລົງຂອງ ລັດຖະມົນຕີ ກະຊວງປ້ອງກັນຄວາມສະຫງົບ ວ່າດ້ວຍການເລື່ອນຊັ້ນໃຫ້ນາຍຕໍາຫຼວດ ກອງບັນຊາການ ປກສ ແຂວງຫຼວງນໍ້າທາ ຈໍານວນ 90 ສະຫາຍ: ເລື່ອນຊັ້ນພັນຕີ ຂຶ້ນ ພັນໂທ 13 ສະຫາຍ, ຮ້ອຍເອກ ຂຶ້ນ ພັນຕີ 29 ສະຫາຍ, ຮ້ອຍໂທ ຂຶ້ນ ຮ້ອຍເອກ 48 ສະຫາຍ, ພ້ອມທັງປະກາດຍົກຍ້າຍບ່ອນປະຈຳການຂອງນາຍ ແລະ ພົນຕຳຫຼວດ ອີກຈຳນວນໜຶ່ງ.
