ກົມຄົ້ນຄວ້າວິທະຍາສາດ ແລະ ປະຫວັດສາດ ປ້ອງກັນຄວາມສະຫງົບ ຈັດພິທີ ປະກາດແຕ່ງຕັ້ງຮອງຫົວໜ້າກົມຄົ້ນຄວ້າວິທະຍາສາດ ແລະ ປະຫວັດສາດ ໃນວັນທີ 17 ກໍລະກົດ 2024, ໂດຍການເປັນກຽດເຂົ້າຮ່ວມຂອງ ພົຕ ປອ ສຸວັນນີ ສີສຸພາບມີໄຊ ຫົວໜ້າກົມໃຫຍ່ການເມືອງ ປກສ, ມີຄະນະນໍາ, ຄະນະບັນຊາ, ນາຍ ແລະ ພົນຕໍາຫຼວດ ພາຍໃນກົມຄົ້ນຄວ້າວິທະຍາ ສາດ ແລະ ປະຫວັດສາດ ເຂົ້າຮ່ວມ.
ພັອ ວັນໄຊ ຈັນທະສຸກ ຮອງຫົວໜ້າກົມພະນັກງານ ກົມໃຫຍ່ການເມືອງ ປກສ ໄດ້ຜ່ານຂໍ້ຕົກລົງຂອງລັດຖະມົນຕີ ກະຊວງປ້ອງກັນຄວາມສະຫງົບ ວ່າດ້ວຍການແຕ່ງຕັ້ງນາຍຕຳຫຼວດທີ່ຂື້ນກັບກົມຄົ້ນຄວ້າວິທະຍາສາດ ແລະ ປະຫວັດສາດ ໃນນີ້ໄດ້ຕົກລົງແຕ່ງຕັ້ງ ພັອ ປທ ອຸ່ນເຮືອນ ອຸດົມສິດ ເປັນຮອງຫົວໜ້າກົມຄົ້ນຄວ້າວິທະຍາສາດ ແລະ ປະຫວັດສາດ ສ່ວນຫົວໜ້າ ແລະ ຮອງທີ່ມີຢູ່ແລ້ວ ແມ່ນຮັກສາໄວ້ຄືເກົ່າ.
ໂອກາດນີ້ ພົຕ ປອ ສຸວັນນີ ສີສຸພາບມີໄຊ ໄດ້ກ່າວຕໍ່ພິທີວ່າ: ການແຕ່ງຕັ້ງໃນຄັ້ງນີ້ ແມ່ນຄວາມຮຽກຮ້ອງຕ້ອງການຂອງວຽກ ງານໃນໄລຍະໃໝ່, ຕິດພັນກັບການປັບປຸງກົງຈັກການຈັດຕັ້ງ ໃນວຽກງານປ້ອງກັນຄວາມສະຫງົບ ໃຫ້ຮັບປະກັນຮອບດ້ານ, ທັງມີຄວາມໜັກແໜ້ນ, ເຂັ້ມແຂງ ແລະ ມີແບບແຜນທັນສະໄໝ, ແມ່ນຜູ້ທີ່ມີຜົນງານມີຜົນສໍາເລັດໃນຫຼາຍດ້ານຕໍ່ໜ້າທີ່ວຽກງານທີ່ຂັ້ນເທິງມອບໝາຍໃຫ້ ສາມາດນໍາພາສຶກສາອົບຮົມການເມືອງ-ແນວຄິດ, ສ້າງຄວາມເປັນເອກະພາບ ແລະ ຄວາມສາມັກຄີພາຍໃນ ມີຄວາມຮັບຜິດຊອບສູງ, ຕິດພັນກັບການນໍາພາປັບປຸງວຽກງານຄົ້ນຄວ້າວິທະຍາສາດ, ຂອງກໍາລັງປ້ອງກັນຄວາມສະຫົງບ ເຂົ້າສູ່ຄຸນນະພາບໃໝ່ດີຂຶ້ນ, ສະນັ້ນ ເພື່ອສືບຕໍ່ຍົກສູງຄຸນນະພາບຂອງວຽກງານ ໃຫ້ມີບາດກ້າວຂະຫຍາຍຕົວ ແລະ ຕິດພັນກັບການຈັດຕັ້ງປະຕິບັດ 4 ຄາດໝາຍ, 4 ແຜນງານ ແລະ 41 ໂຄງການ ທີ່ກະຊວງວາງອອກໃຫ້ປະກົດຜົນເປັນຈິງ.
