ໜ່ວຍພັກຮາກຖານຫ້ອງການເມືອງ ຫ້ອງວ່າການ ກະຊວງປ້ອງກັນຄວາມສະຫງົບ ໄດ້ຈັດກອງປະຊຸມໃຫຍ່ ຄັ້ງທີ lV ຂຶ້ນໃນວັນທີ 16 ກໍລະກົດ 2024, ເຂົ້າຮ່ວມໂດຍ ສະຫາຍ ພົນຕີ ສຸລິນະ ແກ້ວປະເສີດ ຄະນະປະຈຳພັກກະຊວງ ເລຂາຄະນະພັກ ຫົວໜ້າຫ້ອງວ່າການ ກະຊວງປ້ອງກັນຄວາມສະຫງົບ, ສະຫາຍ ພັອ ສະໝານ ດວງປັນຍາ ເລຂາໜ່ວຍພັກຮາກຖານ ຫົວ ໜ້າຫ້ອງການເມືອງ, ມີຄະນະປະຈໍາພັກ, ຄະນະໜ່ວຍພັກຮາກຖານ, ພ້ອມດ້ວຍສະມາຊິກພັກສົມບູນ-ສໍາຮອງ ແລະ ແຂກຮັບເຊີນ ເຂົ້າຮ່ວມ.
ສະຫາຍ ພັອ ສະໝານ ດວງປັນຍາ ໄດ້ກ່າວເປີດກອງປະຊຸມຢ່າງເປັນທາງການ ແລະ ຜ່ານບົດລາຍງານການເມືອງສະຫຼຸບຕີລາຄາຜົນນໍາພາ-ຊີ້ນໍາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ III ຕໍ່ກອງປະຊຸມໃຫຍ່ ຄັ້ງທີ IV ຂອງໜ່ວຍພັກຮາກຖານຫ້ອງການເມືອງ, ເຊິ່ງສະຫາຍໄດ້ຍົກໃຫ້ເຫັນດ້ານດີຜົນງານ, ຜົນສໍາເລັດທີ່ພົ້ນເດັ່ນບາງດ້ານ ເປັນຕົ້ນ: ການນໍາພາວຽກງານກໍ່ສ້າງພັກ-ກໍ່ສ້າງພະນັກງານ ຕິດພັນກັບວຽກງານວິຊາສະເພາະ ໄດ້ເອົາໃຈໃສ່ຍົກສູງບົດບາດການນໍາພາຂອງພັກເຂົ້າວຽກງານຕົວຈິງ ຄະນະໜ່ວຍພັກໄດ້ມີວິທີການນໍາພາທີ່ຖືກຕ້ອງ ໂດຍປະຕິບັດຕາມ 5 ຫຼັກການ ແລະ 3 ທິດນໍາ ຕິດພັນກັບການຂະຫຍາຍພັກ, ຄຸ້ມຄອງ-ປ້ອງກັນພັກ, ຄົ້ນຄວ້າ, ວາງແຜນນໍາສະເໜີຂັ້ນເທິງປັບປຸງກົງຈັກການຈັດຕັ້ງເບື້ອງພັກ ໃນແຕ່ລະຮາກຖານພັກ ເພື່ອໃຫ້ສອດຄ່ອງກັບສະພາບຕົວຈິງ ເຊັ່ນ: ໄດ້ບົ່ງຕົວແຕ່ງຕັ້ງຜູ້ກວດກາໜ່ວຍພັກຂຶ້ນເປັນຮອງເລຂາ ແລະ ຄະນະພັກ ຫ້ອງວ່າການ ຂຶ້ນເປັນຄະນະປະຈຳພັກພັກຫ້ອງວ່າການ 2 ສະຫາຍ, ໄດ້ຕິດຕາມ-ຊຸກຍູ້ບັນດາໜ່ວຍພັກຮາກຖານອ້ອມຂ້າງຫ້ອງວ່າການ ໃນການປະຕິບັດເນື້ອໃນ 4 ຄາດໝາຍ 4 ບຸກທະລຸ ຕິດພັນກັບຂະບວນການກໍ່ສ້າງໜ່ວຍປອດໃສ ເຂັ້ມແຂງ ໜັກແໜ້ນ, ຮູ້ນໍາພາຮອບດ້ານ ສະແດງອອກຄື:
ໃນປີຜ່ານມາ, ສາມາດຍາດໄດ້ນາມມະຍົດໜ່ວຍພັກປອດໃສ ເຂັ້ມແຂງ ໜັກແໜ້ນ 8 ໜ່ວຍພັກຮາກຖານ ແລະ ສາມາດຍາດໄດ້ນາມມະຍົດໜ່ວຍພັກປອດໃສເຂັ້ມແຂງ ໜັກແໜ້ນ 2 ປີຕິດຕໍ່ກັນ, ໄດ້ຮັບທຸງໄຊ 1 ໜ່ວຍພັກ. ພ້ອມນີ້, ກໍໄດ້ເອົາໃຈໃສ່ເຮັດວຽກງານຂະຫຍາຍພັກ ໃນນັ້ນສາມາດສ້າງໄດ້ມະຫາຊົນຜູ້ກ້າວໜ້າເຂົ້າເປັນສະມາຊິກພັກສຳຮອງໄດ້ 45 ສະຫາຍ ຍິງ 20 ສະຫາຍ. ໃນນັ້ນ, ເລື່ອນສະມາຊິກພັກສຳຮອງ ຂຶ້ນເປັນສະມາຊິກພັກສົມບູນ ໄດ້ 43 ສະຫາຍ ຍິງ 8 ສະຫາຍ, ຄົ້ນຄວ້ານໍາສະເໜີຂັ້ນເທິງປັບປຸງກົງຈັກການຈັດຕັ້ງແຕ່ລະຂັ້ນຂອງຫ້ອງການເມືອງ ຫ້ອງວ່າການ ເຊິ່ງມີນາຍຕໍາຫຼວດໄດ້ຮັບການເລື່ອນຕຳແໜ່ງ ແລະ ແຕ່ງຕັ້ງໃໝ່ 11 ສະຫາຍ, ຄົ້ນຄວ້ານາຍ ແລະ ພົນຕຳຫຼວດຜູ້ຄົບມາດຖານເງື່ອນໄຂ ແລະ ສະເໜີຂັ້ນເທິງໄປຄົ້ນຄວ້າ, ສຶກສາຮໍ່າຮຽນຍົກລະດັບວິຊາສະເພາະ ປກສ ຢູ່ພາຍໃນໄດ້ 17 ສະຫາຍ ຍິງ 7 ສະຫາຍ.
ຄຽງຄູ່ກັນນີ້, ຍັງໄດ້ເປັນເສນາທິການໃຫ້ແກ່ ຄະນະພັກຫ້ອງວ່າການ ໃນການຄົ້ນຄວ້າວາງແຜນການກ່ຽວກັບວຽກງານສຶກ ສາອົບຮົມການເມືອງນໍາພາ-ແນວຄິດ, ວຽກງານກໍ່ສ້າງພັກ-ພະນັກງານ, ອົງການຈັດຕັ້ງມະຫາຊົນ, ຄົ້ນຄວ້າສະຫຼຸບສະ ພາບການເມືອງ-ແນວຄິດ, ສ່ອງແສງລາຍງານ, ຄົ້ນຄວ້າຈັດຕັ້ງນະໂຍບາຍດ້ານຕ່າງໆ, ໂຄສະນາເຜີຍແຜ່ ແລະ ຄຸ້ມຄອງ, ປ້ອງກັນ, ກວດກາສະມາຊິກພັກ, ນາຍ ແລະ ພົນຕຳຫຼວດ, ຕິດຕາມການຊຸກຍູ້ການປະຕິບັດແຜນການວຽກງານພັກ, ວຽກ ງານການເມືອງໃຫ້ຫ້ອງວ່າການ ແລະ ກະຊວງປ້ອງກັນຄວາມສະຫງົບ ວາງອອກແຕ່ລະໄລຍະ ໃຫ້ປະກົດຜົນເປັນຈິງ.
ພ້ອມນີ້, ກອງປະຊຸມຍັງໄດ້ປ່ອນບັດຄັດເລືອກເອົາ ຄະນະໜ່ວຍພັກຮາກຖານ ຫ້ອງການເມືອງ ຫ້ອງວ່າການ ກະຊວງປ້ອງກັນຄວາມສະຫງົບ ຊຸດໃໝ່ ເຊິ່ງມີຜູ້ລົງສະໝັກ 7 ສະຫາຍ, ເລືອກເອົາ 5 ແລະ ສາມາດເລືອກໄດ້ ສະຫາຍ ພັອ ສະໝານ ດວງປັນຍາ ເປັນເລຂາ, ພັທ ລັດສະໝີ ສີຫາວົງ ເປັນຮອງເລຂາ, ພັທ ຄໍາລອນ ທໍາມະວົງ ເປັນປະທານກວດກາພັກ, ພັທ ດວງຈິດ ຂັນຊະນະວົງ ແລະ ພັອ ນາງ ກົງຈີນ ລີນາວົງ ເປັນຄະນະ.
