ວັນທີ 12 ກໍລະກົດ 2024 ກະຊວງປ້ອງກັນຄວາມສະຫງົບ ສປປ ລາວ ແລະ ກະຊວງປ້ອງກັນຄວາມສະຫງົບ ສສ ຫວຽດ ນາມ ໄດ້ຮ່ວມກັນຈັດພິທີວາງສີລາລຶກ ໂຄງການກໍ່ສ້າງສູນປິ່ນປົວບຳບັດ ແລະ ຟື້ນຟູສຸຂະພາບຜູ້ຕິດຢາເສບຕິດ ໂດຍແມ່ນທຶນຊ່ວຍເຫຼືອ ຈາກພັກ, ລັດຖະບານ ແລະ ປະຊາຊົນຫວຽດນາມ ມອບໃຫ້ພັກ, ລັດຖະບານ ແລະ ປະຊາຊົນລາວ; ເປັນກຽດເຂົ້າຮ່ວມໂດຍທ່ານ ພົນເອກ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະ ມົນຕີກະຊວງປ້ອງກັນຄວາມສະຫງົບລາວ ແລະ ທ່ານ ພົນໂທ ເລືອງ ຕາມ ກວາງ ກຳມະການສູນກາງພັກກອມມູນິດຫວຽດນາມ ລັດຖະມົນຕີກະຊວງປ້ອງກັນຄວາມສະຫງົບ ຫວຽດນາມ, ພ້ອມດ້ວຍບັນດາສະຫາຍການນຳຂັ້ນສູງ ຈາກກະຊວງປ້ອງກັນຄວາມສະຫງົບລາວ, ຫວຽດນາມ ແລະ ການນຳແຂວງວຽງຈັນ ເຂົ້າຮ່ວມ.
ໃນພິທີ, ທ່ານ ພັນເອກ ຫງຽນ ເລ ກວາງ ຮອງຫົວໜ້າກົມຄຸ້ມຄອງກໍ່ສ້າງ ແລະ ຄ້າຍຄູ ກະຊວງປ້ອງກັນຄວາມສະຫງົບ ຫວຽດນາມ ໄດ້ລາຍງານໃຫ້ຮູ້ວ່າ: ໂຄງການກໍ່ສ້າງ ສູນປິ່ນປົວບຳບັດ ແລະ ຟື້ນຟູສຸຂະພາບຜູ້ຕິດຢາເສບຕິດ ຢູ່ແຂວງວຽງຈັນ ໃນຄັ້ງນີ້, ປະກອບມີເນື້ອທີ່ກໍ່ສ້າງທັງໝົດ: 23,7 ເຮັກຕາກວ່າ, ສ່ວນການກໍ່ສ້າງແມ່ນຈະໄດ້ກໍ່ສ້າງອາຄານ ປະກອບມີເຂດບໍລິຫານ; ເຂດສາທາລະນະສຸກ; ເຂດຢ້ຽມພົບ, ຕ້ອນຮັບ; ເຂດຫ້ອງສະໂມສອນ, ຮໍ່າຮຽນ; ເຂດຄຸ້ມຄອງຄົນບຳບັດການຕິດຢາເສບຕິດ; ເຂດສອນວິຊາຊີບ ແລະ ເຂດຮັບປະກັນຄວາມປອດໄພອັກຄີໄພ.
>>>ໃນໂອກາດດັ່ງກ່າວທ່ານ ພົນໂທ ເລືອງ ຕາມ ກວາງ ກໍໄດ້ມີຄຳເຫັນວ່າ: ການວາງສີລາລຶກໂຄງການກໍ່ສ້າງສູນປິ່ນປົວບຳບັດ ແລະ ຟື້ນຟູສຸຂະພາບຜູ້ຕິດຢາເສບຕິດ ຢູ່ເມືອງໂພນໂຮງ ແຂວງວຽງຈັນ ໃນຄັ້ງນີ້ ເປັນອີກໜຶ່ງໂຄງການ ທີ່ພັກ, ລັດຖະບານ ແລະ ປະຊາຊົນຫວຽດນາມ ໃຫ້ການຊ່ວຍເຫຼືອດ້ານທຶນໃນການກໍ່ສ້າງ ແລະ ມອບໃຫ້ເປັນຂອງຂວັນ ໃຫ້ແກ່ພັກ, ລັດຖະບານ ແລະ ປະຊາຊົນລາວ, ໂດຍສະເພາະແມ່ນກະຊວງປ້ອງກັນຄວາມສະຫງົບລາວ ເພື່ອນຳໃຊ້ເຂົ້າໃນການປິ່ນປົວ ບຳບັດ ແລະ ຟື້ນຟູສຸຂະພາບຂອງຜູ້ຕິດຢາເສບຕິດ.
ຈາກນັ້ນ, ທ່ານ ພົນເອກ ວິໄລ ຫຼ້າຄຳຟອງ ກໍໄດ້ມີຄຳເຫັນ: ເຊິ່ງກ່ອນອື່ນສະຫາຍກໍສະແດງຄວາມຍ້ອງຍໍຊົມເຊີຍມາ ຍັງຄະນະຮັບຜິດຊອບໂຄງການຝ່າຍລາວ ແລະ ຫວຽດນາມ ທີ່ໄດ້ເອົາໃຈໃສ່ ພ້ອມກັນປະສານສົມທົບ ໃນການລົງສໍາຫຼວດພື້ນທີ່, ເປີດກອງປະຊຸມປຶກສາຫາລືເປັນເອກະພາບດ້ານຊື່ໂຄງການ, ສະຖານທີ່, ຂຶ້ນແຜນງົບປະມານໃນການກໍ່ສ້າງ ແລະ ບັນດາເນື້ອໃນອື່ນໆ ທີ່ກ່ຽວພັນເຖິງໂຄງການ ສາມາດຈັດຕັ້ງພິທີວາງສີລາລຶກ ທັນກັບທິດຊີ້ນໍາຂອງການນໍາທັງສອງປະເທດ. ພ້ອມທັງສະແດງຄວາມຂອບໃຈຕໍ່ການຊ່ວຍເຫຼືອດ້ານທຶນຈາກພັກ, ລັດຖະບານ ແລະ ປະຊາຊົນຫວຽດນາມ ໂດຍສະເພາະແມ່ນກະຊວງປ້ອງກັນຄວາມສະຫງົບ ຫວຽດນາມ ແລະ ໃຫ້ຄໍາໝັ້ນສັນຍາວ່າ: ພາຍຫຼັງການກໍ່ສ້າງໂຄງການສຳເລັດ, ກະ ຊວງປ້ອງກັນຄວາມສະຫງົບລາວ ຈະນໍາໃຊ້ສູນແຫ່ງນີ້ ເຂົ້າໃນວຽກງານປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດ ໃຫ້ເກີດຜົນປະໂຫຍດສູງສຸດ; ເຮັດໃຫ້ຜູ້ຕິດຢາເສບຕິດ ຫາຍດີ, ບໍ່ກັບໄປພົວພັນກັບບັນຫາຢາເສບຕິດອີກ, ມີວິຊາຊີບ, ມີເງື່ອນ ໄຂກັບຄືນສູ່ຄວາມອົບອຸ່ນຂອງຄອບຄົວ ແລະ ດຳລົງຊີວິດຮ່ວມກັບສັງຄົມຢ່າງເປັນປົກກະຕິ.
ໂອກາດນີ້, ຄະນະຜູ້ແທນທັງ 2 ຝ່າຍກໍໄດ້ຮ່ວມກັນວາງສີລາລຶກໂຄງການກໍ່ສ້າງສູນປິ່ນປົວບຳບັດ ແລະ ຟື້ນຟູສຸຂະພາບຜູ້ຕິດຢາເສບຕິດ ເພື່ອຄວາມເປັນສີລິມຸງຄຸນໃຫ້ແກ່ການກໍ່ສ້າງໂຄງການດັ່ງກ່າວໃຫ້ມີຜົນສຳເລັດຕາມລະດັບຄາດໝາຍນັບແຕ່ນີ້ເປັນຕົ້ນໄປ.
ພາບ: ບຸນເຫຼືອ