ໃນວັນທີ 22 ມີນາ 2024, ພົອ ວິໄລ ຫຼ້າາຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະ ມົນຕີກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ລົງມາຢ້ຽມຢາມ ແລະ ພົບປະໂອ້ລົມພະນັກງານແພດໝໍ ແລະ ໃຫ້ກໍາລັງຄົນເຈັບ ຢູ່ໂຮງໝໍ 5 ເມສາ ເນື່ອງໃນໂອກາດສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 63 ປີ (5 ເມສາ 1961-5 ເມສາ 2024), ໂດຍການຕ້ອນຮັບ ຂອງ ພັອ ດຣ ນາງ ພຸດມາລາ ພັນທະມິດ ຫົວໜ້າອຳນວຍການໂຮງໝໍ 5 ເມສາ ພ້ອມດ້ວຍພະນັກງານແພດໝໍ ໃຫ້ການຕ້ອນຮັບ.
ໃນໂອກາດທີ່ລົງມາຢ້ຽມຢາມ ແລະ ພົບປະໂອ້ລົມພະນັກງານແພດໝໍໃນຄັ້ງນີ້, ພົອ ວິໄລ ຫຼ້າຄໍາຟອງ ໄດ້ຮັບຟັງການລາຍງານກ່ຽວກັບ ການເຄື່ອນໄຫວປະຕິບັດໜ້າທີ່ວຽກງານ ຂອງພະນັກງານແພດໝໍ ໃນໄລຍະ 1 ປີຜ່ານມາ, ໂດຍ ຄະນະພັກ-ຄະນະບັນຊາ ໄດ້ເອົາໃຈໃສ່ສຶກສາອົບຮົມການເມືອງ-ນຳພາແນວຄິດໃຫ້ແກ່ພະນັກງານແພດໝໍ ໃຫ້ມີລະບຽບວິໄນເຂັ້ມງວດ, ເຮັດສຳເລັດໜ້າທີ່ຕາມການມອບໝາຍ, ຮັກສາໄດ້ຈັນຍາບັນ, ຈັນຍາທຳ, ມີນ້ຳໃຈບໍລິສຸດສັດຊື່, ຮັກແພງເບິ່ງແຍງຄົນເຈັບຄືຍາດພີ່ນ້ອງຂອງຕົນ ແລະ ບໍລິການຮັບໃຊ້ດ້ວຍຄວາມບໍລິສຸດໃຈ, ເອົາໃຈໃສ່ປັບປຸງວຽກງານບໍລິການຮັບໃຊ້ໃຫ້ດີຂຶ້ນເທື່ອລະກ້າວ ເພື່ອຮັບປະກັນສຸຂະພາບຂອງນາຍ ແລະ ພົນຕຳຫຼວດ ຕະຫຼອດຮອດປະຊາຊົນທີ່ເຂົ້າມາໃຊ້ບໍລິການ ໃຫ້ໄດ້ຮັບຜົນດີຕາມຄຳຂວັນ 5 ດີ 1 ພໍໃຈ ຄື: ຮັບຕ້ອນດີ, ບໍລິການດີ, ສະອາດ ແລະ ສະດວກດີ, ບົ່ງມະຕິຊັດເຈນດີີ, ປີ່ນປົວດີ ແລະ ຄົນເຈັບມີຄວາມເພີ່ງພໍໃຈໃນການມາໃຊ້ບໍລິການ.
ໃນໄລຍະ1 ປີຜ່ານມາ, ມີຄົນເຈັບມາກວດເຂດນອກ 11.404 ເທື່ອຄົນ, ກວດສຸກເສີນ 6.131ເທື່ອຄົນ, ຖືກຫາ-ນັກໂທດ 494 ເທື່ອຄົນ, ສັນນະສູດຊາກສົບຄົນຕາຍ 18 ສົບ, ຮັບຄົນເຈັບເຂົ້ານອນໂຮງໝໍທັງໝົດ 1.152 ເທື່ອຄົນ, ປິ່ນປົວດີກັບຄືນກົມກອງ 927 ເທື່ອຄົນ, ກວດຢັ້ງຢືນສຸຂະພາບ 2.021 ເທື່ອຄົນ, ປິ່ນປົວກາຍະບໍາບັດ 2.077 ເທື່ອຄົນ, ກວດສຸຂະພາບການນໍາ ປະຈໍາປີ 1.283 ທ່ານ.
ສັງລວມແລ້ວ, ການປິ່ນປົວຄົນເຈັບໃນໄລຍະຜ່ານມາ ແມ່ນໄດ້ປະຕິບັດຕາມຫຼັກການວິຊາສະເພາະ, ເຕັກນິກ ແລະ ມີທ່າກ້າວຂຶ້ນ ສະແດງອອກຕໍ່ຜົນງານທີ່ພະນັກງານແພດໝໍເຮັດໄດ້ ເປັນຕົ້ນ ຜ່າຕັດຍົກມົດລູກ, ຜ່າຕັດກ້ອນເບົ້າ, ຜ່າຕັດໄຂ່ຫຼັງ ແລະ ຜ່າຕັດປ້າງ ໄດ້ເລີ່ມລົງມືເຮັດນັບແຕ່ຕົ້ນປີ 2020 ເປັນຕົ້ນມາ.
ໂອກາດນີ້, ພົອ ວິໄລ ຫຼ້າຄໍາຟອງ ກໍໄດ້ມີຄຳເຫັນໂອ້ລົມ ແລະ ເນັ້ນພະນັກງານແພດໝໍ ໃຫ້ສຸມສະຕິປັນຍາຄວາຍຮູ້ຄວາຍສາມາດນ້ຳໃຊ້ເຄື່ອງມືອຸປະກອນການແພດ ກວດກາບົ່ງມະຕິພະຍາດ ໃຫ້ມີຄວາມຊັດເຈນ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນເງື່ອນໄຂໃໝ່, ໃຫ້ເອົາໃຈໃສ່ປັບປຸງກໍ່ສ້າງກໍາລັງໃນທຸກດ້ານ ໃຫ້ມີຄຸນນະພາບ ແລະ ມີການຫັນປ່ຽນຢ່າງຕັ້ງໜ້າ, ສຸມໃສ່ຄົ້ນຄວ້າທາງດ້ານເຕັກນິກ-ວິທະຍາສາດການແພດ, ວິຊາການ-ວິຊາສະເພາະທີ່ກ່ຽວຂ້ອງ ໃຫ້ພະນັກງານວິຊາການເປັນປະຈໍາ ເພື່ອຍົກສູງຄຸນນະພາບຂອງການປິ່ນປົວ ໃຫ້ທຽບເທົ່າກັບໂຮງໝໍສູນກາງ ແລະ ສາກົນ. ພ້ອມນັ້ນ, ຕ້ອງໄດ້ເອົາໃຈໃສ່ຕິດຕາມ-ກວດກາ, ຄຸ້ມຄອງ, ປົກປັກຮັກສາ, ບົວລະບັດບັນດາອຸປະກອນ, ເຄື່ອງປະກອບ ກໍຄື ຕຶກອາຄານ ໃຫ້ຮັບປະກັນໃນການປິ່ນປົວ ແລະ ນໍາໃຊ້ໄດ້ຍາວນານ.
ຈາກນັ້ນ, ພົອ ວິໄລ ຫຼ້າຄໍາຟອງ ກໍໄດ້ຢ້ຽມຢາມພະນັກງານ ແລະ ຄົນເຈັບ ທີ່ເຂົ້າມາປິ່ວປົວຢູໂຮງໝໍ 5 ເມສາ ເພື່ອເປັນກໍາລັງໃຈໃຫ້ແກ່ນາຍ ແລະ ພົນຕຳຫຼວດທີ່ກຳລັງປີ່ນປົວ ໃຫ້ຊ່ວງເຊົາຈາກພະຍາດ ແລະ ກັບຄືນສູ່ກົມກອງຂອງຕົນໂດຍໄວ.
