ວັນທີ 13 ມີນາ 2024, ຄະນະນຳກະຊວງປ້ອງກັນຄວາມສະຫງົບ ນຳໂດຍ ທ່ານ ພົຕ ສົມວັນ ສາຍລ້ອງພາ ຮອງລັດຖະມົນຕີກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ເດີນທາງສູ່ຣາຊະອານາຈັກກຳປູເຈຍ ເພື່ອກະກຽມຄວາມພ້ອມໃຫ້ແກ່ລັດ ຖະມົນຕີຂອງສອງກະຊວງໄດ້ພົບປະ ແລະ ຮ່ວມລົງນາມບົດບັນທຶກການຮ່ວມມື ລະຫວ່າງກະຊວງພາຍໃນຣາຊະອານາ ຈັກກຳປູເຈຍ ແລະ ກະຊວງປ້ອງກັນຄວາມສະຫງົບ ສປປ ລາວ ປະຈຳປີ 2024.
ໃນຕອນເຊົ້າວັນທີ 14 ມີນາ 2024, ເຈົ້້າໜ້າທີ່ອາວຸໂສທັງສອງກະຊວງ ໄດ້ເຂົ້າຮ່ວມກອງປະຊຸມ ເພື່ອກຽມຄວາມພ້ອມໃຫ້ແກ່ກອງປະຊຸມຮ່ວມມືສອງຝ່າຍ ລະຫວ່າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງພາຍໃນ ແຫ່ງຣາຊະ ອານາຈັກກຳປູເຈຍ, ເປັນປະທານ ຝ່າຍລາວ ໂດຍ ທ່ານ ພົຕ ສົມວັນ ສາຍລ້ອງພາ ຮອງລັດຖະມົນຕີກະຊວງປ້ອງກັນຄວາມສະຫງົບ ລາວ, ຝ່າຍກຳປູເຈຍ ນຳໂດຍທ່ານ ອົມ ມາຣາ ຮອງລັດຖະມົນຕີກະຊວງພາຍໃນກຳປູເຈຍ ພ້ອມດ້ວຄະນະທັງສອງຝ່າຍ.
ທ່ານ ອົມ ມາຣາ ຮອງລັດຖະມົນຕີກະຊວງພາຍໃນ ໄດ້ສະແດງຄວາມຕ້ອນຮັບຢ່າງອົບອຸ່ນຕໍ່ຄະນະເຈົ້າໜ້າທີ່ອາວຸໂສກະຊວງປ້ອງກັນຄວາມສະຫງົບ ສປປ ລາວ ທີ່ໄດ້ມາເຄື່ອນໄຫວຢ້ຽມຢາມ ແລະ ກະກຽມຄວາມພ້ອມໃຫ້ແກ່ກອງປະຊຸມຮ່ວມມືສອງຝ່າຍ ປະຈຳປີ 2024; ຈາກນັ້ນ, ເຈົ້າໜ້າທີ່ອາວຸໂສທັງສອງຝ່າຍ ກໍໄດ້ພ້ອມກັນທົບທວນຄືນການຈັດຕັ້ງປະຕິບັດບັນທຶກການຮ່ວມມືສອງຝ່າຍລະຫວ່າງກະຊວງ ປກສ ລາວ ແລະ ກະຊວງພາຍໃນ ຣາຊະອານາຈັກກຳປູເຈຍ ໃນປີ 2023.
ທ່ານ ພົຕ ສົມວັນ ສາຍລ້ອງພາ ຮອງລັດຖະມົນຕີກະຊວງປ້ອງກັນຄວາມສະຫງົບ ລາວ ໄດ້ມີຄຳເຫັນວ່າ: ໃນໄລຍະໜຶ່ງປີຜ່ານມາ, ທັງສອງຝ່າຍໄດ້ພ້ອມກັນຈັດຕັ້ງປະຕິບັດຕາມເນື້ອໃນຂອງບົດບັນທຶກການຮ່ວມມືປະຈຳປີ 2023 ທີ່ສອງກະຊວງໄດ້ລົງນາມຮ່ວມກັນ ຢ່າງຫ້າວຫັນ ແລະ ມີຜົນສຳເລັດໃນຫຼາຍດ້ານ; ນັບທັງສູນກາງ ແລະ ທ້ອງຖິ່ນ ທີ່ມີເຂດແດນຕິດຈອດກັນ; ເຊິ່ງເປັນການປະກອບສ່ວນອັນໃຫຍ່ ຫຼວງເຂົ້າໃນການເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ເວົ້າລວມ, ເວົ້າສະເພາະແມ່ນລະຫວ່າງສອງກະຊວງ ນັບມື້ນັບແໜ້ນແຟ້ນຂຶ້ນເລື້ອຍໆ; ຈາກຜົນສຳເລັດດັ່ງກ່າວນັ້ນ ໄດ້ເຮັດໃຫ້ສະພາບສັງຄົມຂອງແຕ່ລະປະ ເທດມີຄວາມສະຫງົບສຸກ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ; ນອກນັ້ນ, ຄະນະຜູ້ແທນຂັ້ນສູງ, ຄະນະຫ້ອງວ່າການກະຊວງ, ຂັ້ນກົມ-ກອງວິຊາສະເພາະຂອງສອງກະຊວງ, ຂັ້ນທ້ອງຖິ່ນ ກໍ່ໄດ້ມີການແລກປ່ຽນການຢ້ຽມຢາມເຊິ່ງກັນ ແລະ ກັນ ຕະຫຼອດເຖິງການແລກປ່ຽຂໍ້ມູນຂ່າວສານ ແລະ ປະສານສົມທົບໃນການຮ່ວມມືກັນແກ້ໄຂບັນຫາປະກົດການຫຍໍ້ທໍ້ດ້ານຕ່າງໆ ຢູ່ໃນສັງຄົມ ເພື່ອຮັບປະກັນຄວາມສະຫງົບ-ປອດໄພຂອງສອງປະເທດ.
ເພື່ອສືບຕໍ່ເສີມຂະຫຍາຍສາຍພົວພັນຮ່ວມມືສອງຝ່າຍໃຫ້ເເໜ້ນແຟ້ນ, ເລິກເຊິ່ງ ແລະ ມີປະສິດທິຜົນສູງ ໃນກອງປະຊຸມຄັ້ງນີ້ ຍັງໄດ້ພ້ອມກັນປຶກສາຫາລືບັນຫາທີ່ຕ່າງຝ່າຍໃຫ້ຄວາມສົນໃຈ ພ້ອມທັງພິຈາລະນາຮ່າງບົດບັນທຶກວ່າດ້ວຍການຮ່ວມມື ລະຫວ່າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງພາຍໃນ ແຫ່ງ ຣາຊະອານາຈັກກຳປູເຈຍ ປະຈຳປີ 2024 ຢ່າງລະອຽດຖີຖ້ວນ ແລະ ມີຄວາມເປັນເອກະພາບຮ່ວມກັນໂດຍພື້ນຖານ ເພື່ອນໍາສະເໜີໃຫ້ລັດຖະມົນຕີທັງສອງກະຊວງພິຈາລະນາ ແລະ ລົງນາມຮ່ວມກັນ.
