ໃນວັນທີ 4 ມີນາ 2024, ກະຊວງປ້ອງກັນຄວາມສະຫງົບ ໄດ້ຈັດກອງປະຊຸມຕິດຕາມກວດ ກາຄວາມຄືບໜ້າຂອງບັນດາອະນຸ ກຳມະການສຳລັບການກະກຽມ ເປັນເຈົ້າພາບ ແລະ ເປັນປະທານ ກອງປະຊຸມອາຊຽນ 3 ລະດັບທີ່ນອນໃນຄວາມຮັບຜິດຊອບຂອງ ກະຊວງ ປກສ ໂດຍການເປັນປະທານຂອງ ພົທ ກົງທອງ ພົງວິຈິດ ກໍາມະການສູນກາງພັກ ຮອງລັດຖະມົນຕີກະຊວງ ປກສ, ມີຄະ ນະຫ້ອງວ່າການ, ກົມໃຫຍ່, ກົມ ກອງອ້ອມຂ້າງກະຊວງ ແລະ ບັນດາອະນຸກຳມະການຕ່າງໆເຂົ້າຮ່ວມ.
ພັອ ກີ້ ຈັນທະວົງ ຫົວໜ້າກົມພົວພັນຕ່າງປະເທດ ໄດ້ຜ່ານບົດລາຍງານຄວາມຄືບໜ້າວ່າ: ການກະກຽມຄວາມພ້ອມການເປັນເຈົ້າພາບ ແລະ ເປັນປະທານກອງປະຊຸມອາຊຽນ 3 ລະດັບ ທີ່ນອນຢູ່ໃນຄວາມຮັບຜິດຊອບຂອງກະຊວງ ປກສ ຄື: ລະ ດັບໜ່ວຍງານວິຊາການທີ່ຈະຈັດຂຶ້ນໃນວັນທີ 26-27 ມີນາ 2024 ແລະ 1 ເມສາ 2024 ຕາມລໍາດັບ; ກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 24 ທີ່ຈະຈັດຂຶ້ນໃນລະຫວ່າງວັນທີ 24-29 ມິຖຸນາ 2024 ແລະ ກອງປະຊຸມ ລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ທີ່ຈະຈັດຂຶ້ນໃນລະຫວ່າງວັນທີ 26-30 ສິງຫາ 2024 ມາຮອດປັດຈຸບັນນີ້ກໍແມ່ນມີຄວາມຄືບໜ້າເປັນຢ່າງດີ. ແຕ່ລະອະນຸກຳມະການໄດ້ ມີການກະກຽມບັນດາໜ້າວຽກທີ່ຈຳ ເປັນໄດ້ສຳເລັດຫຼາຍອັນ ເປັນຕົ້ນແມ່ນການກະກຽມເນື້ອໃນຮັບໃຊ້ກອງປະຊຸມ, ການ ບັນຈຸບຸກຄະລາກອນຮັບໃຊ້ວຽກງານກອງເລຂາ, ການຄົ້ນຄວ້າສະຖານທີ່ປະຊຸມ ແລະ ທີ່ພັກສຳລັບຄະນະຜູ້ແທນ, ການກະກຽມພະນັກງານປະສານງານ LO, ພະນັກງານຂັບລົດ, ການວາງແຜນຈັດ ວາງກຳລັງປ້ອງກັນຢູ່ຈຸດສຳຄັນ ຕ່າງໆ, ການຮັບປະກັນດ້ານສຸຂະ ພາບ ແລະ ການກະກຽມບັນທຶກພາບ ແລະ ອອກຂ່າວ ແລະ ການສະແດງສິລະປະວັນນະຄະດີຕະຫຼອດຮອດວຽກງານແຂ່ງ ຂັນຍ້ອງຍໍ.
ພົທ ກອງທອງ ພົງວິຈິດ ໄດ້ມີຄຳເຫັນຕໍ່ກອງປະຊຸມ; ເຊິ່ງທ່ານໄດ້ເນັ້ນໜັກໃຫ້ແຕ່ລະອະນຸກຳມະການສືບຕໍ່ຈັດຕັ້ງປະຕິບັດໜ້າວຽກທີ່ຍັງຄົງຄ້າງຂອງຕົນໃຫ້ສຳເລັດທັນເວລາ ພ້ອມທັງຮັບປະກັນເນື້ອໃນ, ຄວາມສະດວກໂລ່ງລ່ຽນ, ຄວາມສະຫງົບປອດ ໄພ ແລະ ສ້າງຄວາມປະທັບໃຈໃຫ້ແກ່ຄະນະຜູ້ແທນອາຊຽນ ແລະ ປະເທດຄູ່ຮ່ວມເຈລະຈາ ແລະ ຝາກຄວາມຫວັງໃນການກະກຽມກອງປະຊຸມອາຊຽນໄວ້ກັບບັນດາສະຫາຍ ແລະ ການປະກອບສ່ວນຈາກບັນດາສະຫາຍແມ່ນມີຄວາມສໍາຄັນເປັນຢ່າງຍິ່ງ ແລະ ເປັນປັດໃຈຕັດສິນຜົນສຳ ເລັດຂອງການເຮັດໜ້າທີ່ປະທານອາຊຽນຂອງ ສປປ ລາວ.
ຂ່າວ: ບຸນພະຈັນ
