ໃນວັນທີ 21 ກຸມພາ 2024, ກະຊວງ ປກສ ຈັດກອງປະຊຸມທາບທາມຄວາມຄິດເຫັນໃສ່ 2 ຮ່າງດໍາລັດວ່າດ້ວຍການຈັດຕັ້ງປະຕິບັດກົດໝາຍ ວ່າດ້ວຍຢາເສບຕິດ ແລະ ດໍາລັດ ວ່າດ້ວຍກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ; ເປັນປະ ທານໂດຍ ພົຕ ສົມວັນ ສາຍລ້ອງພາ ຮອງລັດຖະມົນຕີ ກະຊວງ ປກສ, ມີຜູ້ຕາງໜ້າອົງ ການໄອຍະການ, ສານປະຊາຊົນສູງ ສຸດ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ພັອ ວິໄລຄໍາ ສີຊານົນ ຫົວໜ້າກົມນິຕິກໍາ ແລະ ກົດໝາຍ ຫ້ອງວ່າການ ກະຊວງ ປກສ ຂຶ້ນຜ່ານບົດສະເໜີ 2 ຮ່າງດໍາລັດວ່າ: ການທາບທາມຄວາມຄິດເຫັນໃນຄັ້ງນີ້ ກໍຄືການບູລະນະອຳນາດລັດ ໃຫ້ມີຄວາມເຂັ້ມແຂງແນໃສ່ປຸກລະດົມ, ຂົນຂວາຍທຸກກຳລັງແຮງ ສັງລວມເຂົ້າໃນການແກ້ໄຂບັນຫາຢາເສບຕິດທີ່ລະບາດເປັນວົງກວ້າງ ແລະ ຮຸນແຮງໃຫ້ຫຼຸດລົງຫຼາຍທີ່ສຸດ ເວົ້າສະເພາະ ກໍຄືການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ; ຜ່ານມານັ້ນ, ໄດ້ຄົ້ນຄວ້າປັບປຸງບັນດານິຕິກຳລຸ່ມກົດໝາຍທີ່ຕິດພັນຄື: ດຳລັດການຈັດຕັ້ງປະຕິບັດກົດໝາຍຢາເສບຕິດ (ສະບັບປີ 2009), ເຊິ່ງໄດ້ຈັດ ຕັ້ງປະຕິບັດມາເປັນໄລຍະເວລາ 14 ປີ ແລະ ດຳລັດ ວ່າດ້ວຍກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ (ສະບັບປີ 2014) ກໍໄດ້ຈັດຕັ້ງປະຕິບັດມາເປັນໄລຍະເວລາ 9 ປີແລ້ວ, ເຊິ່ງບາງໝວດ, ບາງ ມາດຕາຂອງດຳລັດສະບັບດັ່ງກ່າວບໍ່ສອດ ຄ່ອງກັບກົດໝາຍ ແລະ ສະພາບຄວາມເປັນຈິງ ໂດຍສະເພາະກ່ຽວກັບກົງຈັກການຈັດຕັ້ງ ຫຼື ການເຄື່ອນໄຫວວຽກງານວິຊາ ສະເພາະຂອງຄະນະກຳມະການແຫ່ງຊາດ ເພື່ອຄວບຄຸມ ແລະ ສະກັດກັ້ນຢາເສບຕິດທີ່ໄດ້ຖືກມອບໂອນມາຍັງກະຊວງປ້ອງ ກັນຄວາມສະຫງົບ ຕາມທີ່ໄດ້ກຳນົດໄວ້ໃນມາດ ຕາ 2 ຂໍ້ທີ 6 (ການຄຸ້ມຄອງ ແລະ ນໍາໃຊ້ກອງທຶນຄວບຄຸມ ສະກັດກັ້ນ ແລະ ຕ້ານ ຢາເສບຕິດ) ແລະ ຂໍ້ທີ 8 (ອົງການຄຸ້ມຄອງວຽກງານຢາເສບຕິດ) ຂອງກົດໝາຍວ່າດ້ວຍການປັບປຸງບາງມາດຕາຂອງກົດໝາຍ ວ່າດ້ວຍຢາເສບຕິດສະບັບ 2021, ສິດ ແລະ ໜ້າທີ່ຂອງບັນດາກະຊວງ ແລະ ຂະແໜງການທີ່ກ່ຽວຂ້ອງດັ່ງທີ່ໄດ້ກຳນົດໃນວາລະແຫ່ງຊາດ ແລະ ປະເພດຂອງຢາເສບຕິດໃນປັດຈຸບັນ, ເຊິ່ງມີຫຼາຍຮູບແບບ ຫຼາຍສີສັນເກີດຂຶ້ນຈໍານວນຫຼາຍ; ເຊິ່ງບັນຫາດັ່ງກ່າວຈຶ່ງໄດ້ກຳນົດເຂົ້າໃນຮ່າງດໍາລັດວ່າດ້ວຍການຈັດຕັ້ງປະຕິບັດກົດໝາຍ ວ່າດ້ວຍຢາເສບຕິດ ແລະ ກົດໝາຍ ວ່າດ້ວຍການປັບປຸງບາງມາດຕາຂອງກົດໝາຍ ວ່າດ້ວຍຢາເສບຕິດ ເພື່ອເປັນບ່ອນອີງໃນການນໍາເອົາຜູ້ກະທຳຜິດມາລົງໂທດຕາມກົດໝາຍ.
ຮ່າງດຳລັດ ວ່າດ້ວຍກອງທຶນຄວບຄຸມ, ສະກັດກັ້ນ ແລະ ຕ້ານ ຢາເສບຕິດ ກໍເປັນວຽກງານໜຶ່ງທີ່ມີຄວາມສຳຄັນຫຼາຍ. ໃນນີ້, ໄດ້ກຳນົດກ່ຽວກັບຫຼັກການ, ລະບຽບ ການໃນການຄຸ້ມຄອງ, ນຳໃຊ້ ແລະ ຕິດຕາມກວດກາການເຄື່ອນໄຫວຂອງກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດທີ່ໄດ້ຈາກການລະດົມຂົນຂວາຍທຶນຈາກ ທຸກພາກສ່ວນໃນສັງຄົມທັງພາຍໃນ ແລະ ຕ່າງປະເທດ ເຂົ້າມາຮັບໃຊ້ໃນວຽກງານຄວບຄຸມ, ສະກັດກັ້ນ ແລະ ຕ້ານຢາເສບຕິດ ລວມທັງການປິ່ນປົວ, ຟື້ນຟູສຸຂະ ພາບ ແລະ ຝຶກວິຊາຊີບເບື້ອງຕົ້ນໃຫ້ແກ່ຜູ້ບຳບັດຢາເສບຕິດ, ເຮັດໃຫ້ສັງຄົມປອດຈາກຢາເສບຕິດ ແລະ ມີຄວາມສະຫງົບປອດໄພ.
ຮ່າງດໍາລັດ ວ່າດ້ວຍການຈັດຕັ້ງປະຕິບັດກົດໝາຍ ວ່າດ້ວຍຢາເສບຕິດ ປະກອບມີ 7 ໝວດ 59 ມາດຕາ. ໃນນັ້ນ, ໄດ້ປັບປຸງ 42 ມາດຕາ, ສ້າງໃໝ່ 15 ມາດຕາ ແລະ ຍັງຮັກສາໄວ້ 2 ມາດຕາ; ສໍາລັບຮ່າງດໍາລັດ ວ່າດ້ວຍກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດປະກອບມີ 5 ໝວດ ແລະ 27 ມາດຕາ; ໃນນັ້ນ, ປັບປຸງ 21 ມາດຕາ, ສ້າງໃໝ່ 3 ມາດຕາ ແລະ ຍັງຮັກ ສາ 3 ມາດຕາ.
ຂ່າວ: ບຸນຖິນ
