ຄະນະກຳມະການອະໄພຍະໂທດລະດັບຊາດ ໄດ້ຄົ້ນຄວ້າພິຈາລະນາ ຕໍ່ນັກໂທດຜູ້ທີ່ມີ ເງື່ອນໄຂ ແລະ ມີຜົນງານດີເດັ່ນໃນການປະຕິບັດໂທດຢູ່ບັນດາຄ້າຍຄຸມຂັງ-ດັດສ້າງທົ່ວປະເທດ ເພື່ອໃຫ້ປະທານປະເທດອອກດໍາລັດ ໃນການອະໄພຍະໂທດ ສະແດງອອກໃນປີ 2023 ນັກໂທດໄດ້ຮັບການອະໄພຍະໂທດ ຈໍານວນ 1.800 ກວ່າຄົນ.
ກອງປະຊຸມສະຫຼຸບວຽກງານອະໄພຍະໂທດ ປະຈຳປີ 2023 ແລະ ທິດທາງວຽກງານຈຸດສຸມປະຈຳປີ 2024, ຈັດຂຶ້ນໃນວັນທີ 16 ມັງກອນ 2024, ເປັນປະທານໂດຍ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະ ມົນຕີ ລັດ ຖະມົນຕີກະຊວງ ປກສທັງເປັນປະທານຄະນະກຳມະການອະໄພຍະໂທດລະດັບຊາດ; ເຊິ່ງໃນພິທີ, ທ່ານ ໄຊຊະ ນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ຮອງປະທານຄະນະກໍາມະການອະໄພຍະໂທດລະດັບຊາດ ໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານອະໄພຍະໂທດປະຈໍາປີ 2023 ແລະ ທິດທາງວຽກງານຈຸດສຸມ ປີ 2024 ວ່າ: ນັກໂທດທີ່ໄດ້ຮັບການໃຫ້ອະໄພຍະໂທດ ປະຈໍາປີ 2023 ຕາມລັດຖະດໍາລັດຂອງປະທານປະເທດ ສະບັບເລກທີ 219/ປປທລົງວັນທີ 21 ພະຈິກ 2023 ມີຈໍານວນທັງໝົດ 1.824 ຄົນ ຍິງ 238 ຄົນ, ຕ່າງປະເທດ 16 ຄົນ, ນັກໂທດຕະຫຼອດຊີວິດ 4 ຄົນ ຍິງ 2 ຄົນ, ນັກໂທດປະຫານຊີວິດ 9 ຄົນ ຍິງ 2 ຄົນ; ໃນນີ້, ນັກ ໂທດທີ່ໄດ້ຮັບເງື່ອນໄຂຫຼຸດຜ່ອນໂທດ ມີທັງໝົດ 1.602 ຄົນ ຍິງ 200 ຄົນ, ຕ່າງປະ ເທດ 13 ຄົນ ແລະ ນັກໂທດຕະຫຼອດຊີວິດ 4 ຄົນ ຍິງ 2 ຄົນຄື: ນັກໂທດຄະດີຢາເສບ ຕິດ ຈໍານວນ 1.554 ຄົນ ຍິງ 188 ຄົນ, ຕ່າງປະເທດ 13 ຄົນ ແລະ ນັກໂທດຄະດີທົ່ວ ໄປ ຈໍານວນ 48 ຄົນ ຍິງ 12 ຄົນ; ນັກໂທດທີ່ໄດ້ຮັບເງື່ອນໄຂປ່ອຍຕົວ ມີທັງໝົດ 222 ຄົນ ຍິງ 38 ຄົນ, ຕ່າງປະເທດ 3 ຄົນ ຄື: ນັກໂທດຄະດີຢາເສບຕິດ 213 ຄົນ ຍິງ 37 ຄົນ ຕ່າງປະເທດ 3 ຄົນ ແລະ ນັກໂທດຄະດີທົ່ວໄປຈໍານວນ 9 ຄົນ ຍິງ 1 ຄົນ; ສ່ວນນັກໂທດທີ່ຖືກສານຕັດສິນປະຫານຊີວິດ ໄດ້ຮັບອະໄພຍະໂທດມາເປັນ ໂທດຕັດອິດສະລະພາບຕະຫຼອດຊີວິດ ຕາມລັດຖະດຳລັດ ຂອງປະທານປະເທດ ສະບັບເລກທີ 220/ປປທ ລົງວັນທີ 21 ພະຈິກ 2023 ມີຈໍານວນ 9 ຄົນ ຍິງ 2 ຄົນ ເຊິ່ງເປັນນັກໂທດຄະດີຢາເສບຕິດທັງໝົດ.
ໃນພິທີ, ພົອ ວິໄລ ຫຼ້າຄຳຟອງ ຍັງໄດ້ເນັ້ນໃຫ້ບັນດາຄະນະກໍາມະການອະໄພຍະໂທດຂັ້ນຕ່າງໆ ແລະ ບັນດາກອງເລຂາຄະ ນະກໍາມະການອະໄພຍະໂທດ ເອົາໃຈເພີ່ມທະວີຄວາມຮັບຜິດຊອບໃນການປະຕິບັດໜ້າທີ່ວຽກງານຂອງຕົນໃຫ້ທັນຕາມກໍານົດເວ ລາ ໂດຍການເອົາໃຈໃສ່ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອໃຫ້ມີຂໍ້ມູນທີ່ຊັດເຈນຮັບໃຊ້ເຂົ້າໃນການຄົ້ນຄວ້າ; ເອົາໃຈໃສ່ຄົ້ນຄວ້າກໍາແໜ້ນເນື້ອໃນຂອງກົດ ໝາຍ, ລັດຖະບັນຍັດ ວ່າດ້ວຍການໃຫ້ອະໄພຍະໂທດ ແລະ ນິຕິກໍາຕ່າງໆທີ່ກ່ຽວຂ້ອງກັບວຽກງານອະໄພຍະໂທດໃຫ້ເລິກເຊິ່ງ, ຈັດຕັ້ງປະຕິບັດໃຫ້ຖືກຕ້ອງ ແລະ ຄົບຖ້ວນ ໂດຍສະເພາະບັນດາເງື່ອນ ໄຂ, ຂັ້ນຕອນ ແລະ ລະບຽບການພິຈາລະນາ; ຍົກສູງຄວາມຮັບຜິດຊອບໃນການຄົ້ນຄວ້າພິຈາລະນານັກໂທດຜູ້ທີ່ມີເງື່ອນໄຂສະເໜີໃຫ້ອະໄພຍະໂທດຕ້ອງຮັບປະກັນຄວາມຖືກຕ້ອງ, ໂປ່ງໃສ, ຍຸຕິທໍາ, ຄັດເລືອກເອົານັກໂທດຜູ້ທີ່ປະພຶດໂຕດີ ແລະ ຮູ້ ສຶກກິນແໜງແຄງໃຈຕໍ່ການກະທໍາຜິດຂອງຕົນແທ້ ເພື່ອສະ ເໜີຂໍອະໄພຍະໂທດຈາກປະທານປະເທດ; ປັບປຸງແກ້ໄຂບັນຫາທີ່ຍັງຄົງຄ້າງຈຳນວນໜຶ່ງທີ່ຄະນະຮັບຜິດຊອບແຕ່ລະຂັ້ນ ໄດ້ປະສົບພົບພໍ້ໃນເວລາຈັດຕັ້ງປະຕິບັດຕົວຈິງ ແລະ ຕາມການຕີລາ ຄາຂອງກອງປະຊຸມໃນມື້ນີ້ ເຮັດໃຫ້ບັນຫາທີ່ຫຍຸ້ງຍາກຕ່າງໆໄດ້ຮັບການແກ້ໄຂຢ່າງຖືກຕ້ອງຕາມຈິດໃຈບຸກທະລຸ ແລະ ການຫັນປ່ຽນທີ່ດີຂຶ້ນກວ່າເກົ່າ.
ຂ່າວ: ລັດດາວັນ
