ພົຕ ຄຳກິ່ງ ຜຸຍຫຼ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕໍາຫຼວດ ກະຊວງ ປກສ ໄດ້ມີຄຳເຫັນໂອ້ລົມຕໍ່ຄະນະພັກ-ຄະນະບັນຊາກົມຕຳຫຼວດຄຸມຂັງ-ດັດສ້າງ ແລະ ບັນດາຄ້າຍຄຸມຂັງທົ່ວປະເທດ ໃນໂອກາດທີ່ທ່ານໄດ້ເຂົ້າຮ່ວມກອງປະຊຸມສະຫຼຸບວຽກງານຄຸມຂັງ-ດັດສ້າງ ປະຈຳປີ 2023 ແລະ ວາງທິດທາງແຜນການວຽກງານ ຈຸດສຸມ ປີ 2024 ໃນວັນທີ 12 ມັງ ກອນນີ້, ໂດຍເນັ້ນໃຫ້ສຸມໃສ່ປັບປຸງວຽກງານວິຊາສະເພາະໃຫ້ເຂັ້ມແຂງຂຶ້ນກວ່າເກົ່າ ເພື່ອຮັບປະກັນບໍ່ໃຫ້ນັກໂທດແຫກຄຸກໂຕນໜີ.
ໃນພິທີ, ພົຕ ຄຳກິ່ງ ຜຸຍຫຼ້າ ມະນີວົງ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານບັນ ດາສະຫາຍທີ່ຍາດມາໄດ້ຕະຫຼອດ 1 ປີຜ່ານມາ, ພ້ອມທັງເນັ້ນໃຫ້ເອົາໃຈໃສ່ປັບປຸງພາຍໃນກໍາລັງໃຫ້ມີຄວາມເຂັ້ມແຂງຂຶ້ນຕື່ມໃນການປັບປຸງກໍ່ສ້າງ ພາຍໃນກໍາລັງຕຳ ຫຼວດຄຸມຂັງ-ດັດສ້າງ, ຕ້ອງສຸມໃສ່ປັບປຸງກໍ່ສ້າງທາງດ້ານການເມືອງ-ແນວຄິດຂອງນາຍ ແລະ ພົນຕຳຫຼວດໃຫ້ມີຄວາມໜັກແໜ້ນ ມີຄຸນທາດການເມືອງດີ, ມີຈັນຍາບັນ, ເປັນກຳລັງປະກອບອາວຸດຂອງພັກ, ເປັນກໍາລັງຕຳຫຼວດຂອງປະຊາຊົນ ໂດຍປະຊາຊົນ ແລະ ຮັບໃຊ້ປະຊາຊົນຢ່າງແທ້ຈິງ.
ນອກນີ້, ຕ້ອງຄົ້ນຄວ້າປັບປຸງ ແລະ ສັບຊ້ອນ ຈັດວາງບຸກຄະລາກອນຄືນໃໝ່ ເພື່ອໃຫ້ແທດເໝາະກັບເງື່ອນໄຂຄວາມຮູ້, ຄວາມສາມາດພາຍໃນຄ້າຍ, ສຸມໃສ່ປັບປຸງວຽກງານວິຊາສະເພາະໃຫ້ເຂັ້ມແຂງຂຶ້ນກວ່າເກົ່າ ໂດຍສະເພາະການຈັດຕັ້ງປະຕິ ບັດໂຄງການວຽກງານຄຸມຂັງ-ດັດສ້າງທີ່ໄດ້ຫັນເປັນແຜນການ ແລະ ກຳນົດ 12 ກິດຈະ ກຳ ເພື່ອປະຕິບັດແຕ່ລະໜ້າວຽກ ງານໃຫ້ໜັກແໜ້ນ ໂດຍເລັ່ງໃສ່ວຽກງານປ້ອງ ກັນຄວາມປອດໄພຂອງຄ້າຍ ຮັບປະກັນບໍ່ໃຫ້ມີເຫດການນັກໂທດແຫກຄຸກໂຕນໜີ, ເກີດການຈາລະຈົນ, ການປະທ້ວງ ແລະ ອື່ນໆ; ຄຽງຄູ່ກັນນີ້, ຕ້ອງເອົາໃຈໃສ່ຄຸ້ມຄອງນັກໂທດ, ຜູ້ຖືກຫາດ້ວຍລະ ບຽບວິໄນທີ່ເຂັ້ມງວດ ແລະ ຮັດກຸມ, ມີການຈັດສັນເຂດ ຄຸ້ມຄອງແຕ່ລະເປົ້າໝາຍຢ່າງລະອຽດ, ລະບົບການຄຸ້ມຄອງສະຖິຕິ ແລະ ສຳນວນສໍາເນົານັກໂທດ ເຫັນດີໃຫ້ສ້າງເປັນຖານຂໍ້ມູນທີ່ສາມາດເຊື່ອມຕໍ່ຫາກັນໄດ້ລະຫວ່າງຄ້າຍ ແລະ ກົມ ເພື່ອສະດວກໃນການຄຸ້ມຄອງ, ຕິດຕາມ, ກວດກາ.
ທ່ານຮອງລັດຖະມົນຕີ ກ່າວຕື່ມອີກວ່າ; ນອກຈາກວຽກງານດັ່ງກ່າວແລ້ວຮຽກຮ້ອງໃຫ້ບັນດາຄ້າຍຄຸມຂັງ-ດັດສ້າງ ຈົ່ງສືບຕໍ່ເອົາໃຈໃສ່ໃນການສ້າງພະລາທິການກັບທີ່ ເພື່ອໃຫ້ສາມາດເພິ່ງຕົນເອງ, ກຸ້ມຕົນເອງໃນລະດັບທີ່ແນ່ນອນ ໂດຍສຸມໃສ່ການຜະລິດທີ່ມີຢູ່ແລ້ວ ແລະ ພະຍາຍາມຄົ້ນຄ້ວາຊອກຫາການຜະລິດໃໝ່ຕື່ມອີກ ໃຫ້ຫຼາຍຂຶ້ນກ່ວາເກົ່າ ເພື່ອເຮັດໃຫ້ຊີວິດການເປັນຢູ່ຂອງນາຍ ແລະ ພົນຕຳຫຼວດຢູ່ພາຍໃນຄ້າຍ ແລະ ຊີວິດການເປັນຢູ່ຂອງນັກໂທດ-ດັດສ້າງມີຊີວິດການເປັນຢູ່ທີ່ດີຂຶ້ນກວ່າເກົ່າ.
