ກອງປະຊຸມຄົບຄະນະບໍລິຫານງານພັກກົມໃຫຍ່ການເມືອງປ້ອງກັນຄວາມສະຫງົບ ຄັ້ງທີ VII ສະໄໝທີ VI ຈັດຂຶ້ນໃນວັນທີ 16 ມັງກອນ 2024, ໂດຍການເປັນປະທານຂອງສະຫາຍ ພົຈວ ປອ ສຸວັນນີ ສີສຸພາບມີໄຊ ຄະນະປະຈຳພັກກະຊວງ ເລຂາຄະນະ ພັກ ຫົວໜ້າກົມໃຫຍ່ການເມືອງ ປກສ, ມີບັນດາສະຫາຍຄະນະພັກກະຊວງ, ຄະນະບໍລິຫານງານພັກກົມໃຫຍ່ການເມືອງເຂົ້າຮ່ວມ.
ພົຈວ ປອ ສຸວັນນີ ສີສຸພາບມີໄຊ ກ່າວວ່າ: ກອງປະຊຸມຄັ້ງນີ້ຈະໄດ້ພ້ອມກັນຕີລາຄາການນໍາພາ-ຊີ້ນຳຂອງຄະນະບໍລິຫານງານພັກກົມໃຫຍ່ການເມືອງ ປກສ ໃນໄລຍະປີ 2023 ແລະ ກຳນົດທິດທາງແຜນການວຽກງານຈຸດສຸມໃນປີ 2024 ພ້ອມທັງຮຽກ ຮ້ອງໃຫ້ບັນດາສະຫາຍ ຈົ່ງເຊີດຊູຄວາມຮັບຜິດຊອບ, ສຸມທຸກເຫື່ອແຮງ, ສະຕິປັນຍາເຂົ້າໃນການຄົ້ນຄວ້າປະກອບຄຳເຫັນຢ່າງພາວະວິໄສ ແລະ ຊອກເຫັນບັນຫາທີ່ຍັງຄົງຄ້າງ ເພື່ອເປັນບ່ອນອີງພື້ນຖານໃຫ້ການດຳເນີນວຽກງານແນວຄິດ, ບູລະນະການຈັດຕັ້ງ ແລະ ປັບປຸງແບບແຜນວິທີເຮັດວຽກໃຫ້ທັນສະໄໝ ເຮັດໃຫ້ກອງປະຊຸມໃນຄັ້ງນີ້ ເຕັມໄປດ້ວຍເນື້ອໃນ, ບັນຍາກາດທີ່ສ້າງສັນ ແລະ ມີຜົນສຳເລັດຢ່າງຈົບງາມ.
ໃນໂອກາດດຽວກັນນີ້, ສະຫາຍ ພົຈວ ຄອນສະຫວັນ ສົມພາໄຊ ຄະນະພັກກະຊວງ ຮອງເລຂາຄະນະພັກ ຮອງຫົວໜ້າກົມໃຫຍ່ການເມືອງ ປກສ ກ່າວວ່າ: ໃນໄລຍະ 1 ປີຜ່ານມາ, ຄະນະພັກກົມໃຫຍ່ການເມືອງປ້ອງກັນຄວາມສະຫງົບ ໄດ້ຖືເອົາວຽກງານສຶກສາອົບຮົມການເມືອງ-ແນວຄິດເປັນກົກ, ນໍາພາ-ຊີ້ນໍາບັນດາຮາກຖານພັກດໍາເນີນວຽກງານການເມືອງ-ແນວຄິດເປັນປົກກະຕິ ໄປຄວບຄູ່ກັບການດໍາເນີນຊີວິດການເມືອງພາຍໃນພັກເປັນປະຈຳ, ຖືເອົາການຕຳນິຕິຊົມຕົນເອງ ແລະ ຕິຊົມກັນຢ່າງແຂງແຮງ.
ຜ່ານການສຶກສາອົບຮົມການເມືອງ-ແນວຄິດຢ່າງຕັ້ງໜ້າ, ເຮັດໃຫ້ສະມາຊິກພັກ, ນາຍ ແລະ ພົນຕຳຫຼວດໃນທົ່ວກົມໃຫຍ່ການເມືອງປ້ອງກັນຄວາມສະຫງົບ ມີທັດ ສະນະຫຼັກໝັ້ນການເມືອງ, ຄຸນສົມບັດສິນທຳປະຕິວັດ, ປະຕິບັດໜ້າທີ່ດ້ວຍຄວາມເອົາ ໃຈໃສ່, ມີສະຕິຕໍ່ການຈັດຕັ້ງ, ເຄົາລົບລະບຽບວິໄນ, ສະດຸ້ງໄວຕໍ່ເລ່ລ່ຽມກົນອຸບາຍມ້າງເພທໍາລາຍຂອງກຸ່ມຄົນບໍ່ດີ ແລະ ຕີຖອຍໄດ້ປາກົດການຫຍໍ້ທໍ້ຕ່າງໆ; ເອົາໃຈໃສ່ຕໍ່ວຽກງານກໍ່ສ້າງພັກ ຕິດພັນກັບການນໍາພາ-ຊີ້ນໍາ ບູລະນະກົງຈັກພັກໃຫ້ເຂັ້ມແຂງ, ເປັນລະບົບຄົບຊຸດ, ປັບປຸງກໍ່ສ້າງ ແລະ ຂະຫຍາຍພັກຕາມ 5 ຫຼັກການ, 3 ທິດນໍາຂອງພັກວາງອອກ; ໃນນັ້ນ, ອອກມະຕິສ້າງຕັ້ງໜ່ວຍພັກຮາກຖານ 1 ໜ່ວຍ, ໜ່ວຍພັກຂຶ້ນກັບຄະນະພັກຮາກຖານ 2 ໜ່ວຍ, ບົ່ງຕົວແຕ່ງຕັ້ງຄະນະພັກກົມໃຫຍ່ 3 ສະຫາຍ, ຄະນະພັກກົມ, ຫ້ອງ, ໂຮງຮຽນ ແລະ ຄະນະໜ່ວຍພັກຂຶ້ນກັບຄະນະພັກຮາກຖານ 10 ສະຫາຍ, ຍິງ 3 ສະຫາຍ; ອະນຸມັດມະຫາຊົນກ້າວໜ້າຮຽນສະໜັບ ສະ ໜູນ 52 ສະຫາຍ, ຍິງ 25 ສະຫາຍ, ຮຽນກົດລະບຽບພັກ 50 ສະຫາຍ, ຍິງ 27 ສະ ຫາຍ, ຟື້ນຟູການເຄື່ອນໄຫວຂອງສະມາຊິກພັກ 2 ສະຫາຍ, ເຂົ້າພັກສຳຮອງ 40 ສະຫາຍ, ຍິງ 20 ສະຫາຍ, ເລື່ອນເປັນສະມາຊິກພັກສົມບຸນ 77 ສະຫາຍ, ຍິງ 36 ສະຫາຍ, ຍົກຍ້າຍຮ່ວມຊີວິດພັກ 206 ສະຫາຍ, ຍິງ 46 ສະຫາຍ; ບັນຫາທີ່ພົ້ນເດັ່ນຄະນະບໍລິຫານງານພັກກົມໃຫຍ່ການເມືອງ ປກສ ຮັກສາໄດ້ຄວາມສາມັກຄີພາຍໃນ, ເຄົາລົບ ແລະ ປະຕິບັດຫຼັກການລວມສູນປະຊາທິປະໄຕຂອງພັກຢ່າງເຂັ້ມງວດ, ທຸກເດືອນຈັດກອງປະຊຸມສ່ອງແສງ ແລະ ກອງປະ ຊຸມຄະນະປະຈຳພັກ ເພື່ອຕົກລົງບັນຫາສໍາຄັນ ແນໃສ່ປັບປຸງປົວແປງພັກໃຫ້ປອດໃສ, ຈັດກອງປະຊຸມກາງສະໄໝ ປ່ອນບັດທາບທາມຄວາມໄວ້ວາງໃຈ, ສຳຫຼວດກວດກາພາຍໃນຄະນະບໍລິຫານງານພັກ ແລະ ດຳເນີນກອງປະຊຸມຕີລາຄາປະເພດສະມາຊິກພັກ ແລະ ຄັດເລືອກໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023 ສຳເລັດ.
ນອກຈາກນັ້ນ, ໃນກອງປະຊຸມຍັງໄດ້ຜ່ານແຜນການກະກຽມດໍາເນີນກອງປະຊຸມໃຫຍ່ ສະບັບເລກທີ 394/ຄພ-ກມປສ, ລົງວັນທີ 18 ທັນວາ 2023 ແລະ ມະຕິຕົກລົງແຕ່ງຕັ້ງຄະນະຮັບຜິດຊອບກະກຽມດໍາເນີນກອງປະຊຸມໃຫຍ່ຂອງອົງຄະນະພັກກົມໃຫຍ່ການເມືອງ ປກສ ຄັ້ງທີ VII ສະບັບເລກທີ 393/ຄພ-ກມປສ, ລົງວັນທີ 18 ທັນວາ 2023; ຜ່ານບັນດາມະຕິຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບລົງຊີ້ນໍາ ແລະ ເຂົ້າຮ່ວມການດໍາເນີນກອງປະຊຸມໃຫຍ່ຂັ້ນຮາກຖານພັກອ້ອມຂ້າງອົງ ຄະນະພັກກົມໃຫຍ່ການມືອງ ປກສ; ມະຕິຕົກລົງ ວ່າດ້ວຍການອະນຸມັດຄະນະພັກ, ປະທານກວດກາ ແລະ ຮອງປະທານກວດກາພັກ ໃຫ້ບັນດາຮາກຖານພັກ; ມະຕິຕົກລົງ ວ່າດ້ວຍການກໍານົດຜູ້ແທນເຂົ້າຮ່ວມກອງປະຊຸມໃຫຍ່ ຄັ້ງທີ VII ຂອງອົງຄະ ນະພັກກົມໃຫຍ່ການເມືອງ ປກສ.
