ກະຊວງ ປກສ ໄດ້ຈັດພິທີປະກາດຍົກຍ້າຍ-ແຕ່ງຕັ້ງນາຍຕໍາຫວດ ຂັ້ນນໍາພາ-ບັນຊາຂອງກະຊວງປ້ອງກັນຄວາມສະຫງົບ ໃນວັນທີ 12 ທັນວາ 2024 ເປັນປະທານໂດຍ ພົທ ກົງທອງ ພົງວິຈິດ ກໍາມະການສູນກາງພັກ ຮອງລັດຖະມົນຕີກະຊວງ ປກສ, ມີຄະນະປະຈໍາພັກ-ຄະນະພັກກະຊວງ, ກົມໃຫຍ່, ຫ້ອງວ່າການ, ກອງບັນຊາການ, ວິທະຍາຄານ ແລະ ຫົວໜ້າ-ຮອງຫົວໜ້າກົມກອງອ້ອມຂ້າງກະຊວງເຂົ້າຮ່ວມ.
ພັອ ສົມພອນ ແກ້ວພູທອນ ຫົວໜ້າກົມພະນັກງານ ກົມໃຫຍ່ການເມືອງ ປກສ ໄດ້ຜ່ານດໍາລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງນາຍຕໍາຫວດກະຊວງປ້ອງກັນຄວາມສະຫງົບ ດັ່ງລຸ່ມນີ້:
1. ແຕ່ງຕັ້ງ ພົຈວ ຊາຍຄອງ ເພັດຊະວົງ ເປັນຮອງຫົວໜ້າກົມໃຫຍ່ການເມືອງ ປ້ອງກັນຄວາມສະຫງົບ,
2. ແຕ່ງຕັ້ງ ພັອ ແສງທອງ ເກື້ອບຸນລໍ້າ ເປັນຮອງຫົວໜ້າຫ້ອງວ່າການກະຊວງປ້ອງກັນຄວາມສະຫງົບ,
3. ແຕ່ງຕັ້ງ ພັອ ສຸກນິລັນດອນ ກຸນລະວົງ ເປັນຫົວໜ້າອໍານວຍການວິທະຍາຄານການເມືອງ ປ້ອງກັນຄວາມສະຫງົບ,
4. ແຕ່ງຕັ້ງ ພັອ ສຸພັນທອງ ໄຄ້ຍະວົງ ເປັນຫົວໜ້າກົມກວດກາ-ກວດການ.
ໃນພິທີ, ພົທ ກົງທອງ ພົງວິຈິດ ກຳມະການສູນກາງພັກ ຮອງລັດຖະມົນຕີ ກະຊວງປ້ອງກັນຄວາມສະຫງົບ ໄດ້ເນັ້ນໃຫ້ ນາຍຕໍາຫຼວດທີ່ໄດ້ຮັບການແຕ່ງຕັ້ງໃໝ່ ຈົ່ງເອົາໃຈໃສ່ເຊີດຊູຄວາມຮັບຜິດຊອບການເມືອງໃຫ້ຫຼາຍຂຶ້ນ, ບຸກບືນຜ່ານຜາຂໍ້ຫຍຸ້ງຍາກ, ສາມັກຄີແໜ້ນແກ່ນກັບໝູ່ຄະນະ, ພ້ອມພຽງຮຽງໜ້າກັນ ນໍາພາກົມກອງໃຫ້ມີຜົນສໍາເລັດ ແລະ ສົມກັບຄວາມເຊື່ອໝັ້ນຂອງການຈັດຕັ້ງ, ເວລາໃດກໍຕ້ອງມີຄວາມເປັນແບບຢ່າງ, ມີຄວາມເສຍສະຫຼະສູງ, ຮູ້ນໍາພາ-ບັນຊາອ້າຍນ້ອງ ດ້ວຍຄວາມສັດຊື່, ທ່ຽງທຳ, ສະເໝີຕົ້ນສະເໝີປາຍຕໍ່ການປະຕິວັດ ກໍຄືອຸດົມການຂອງພັກ; ຕັ້ງໜ້າຊອກຮູ້ຮໍ່າຮຽນຝຶກຝົນຫຼໍ່ຫຼອມຕົນເອງ ຢູ່ສະເໝີ, ຕ້ອງຮູ້ນໍາພາ, ຮູ້ປຶກສາຫາລື, ຮູ້ຂໍທິດຊີ້ນໍາ, ກ້າຄິດ, ກ້າເຮັດ ແລະ ກ້າຮັບຜິດຊອບ ພ້ອມກັນເຮັດສຳເລັດໜ້າທີ່ ການເມືອງຂອງຕົນ.
